سەنات دەپۋتاتتارى ناريمان تورەعاليەۆ پەن دينار نوكەتاەۆا پالاتا جانىنان قۇرىلعان جاس ساراپشىلار كلۋبىنىڭ مۇشەلەرىمەن كەزدەستى. وندا قازاقستان رەسپۋبليكاسىنىڭ جاڭا الەۋمەتتىك كودەكسىنىڭ تۇجىرىمداماسى كەڭىنەن تالقىلاندى.
«مەملەكەت باسشىسىنىڭ تاپسىرماسى بويىنشا قازىر «الەۋمەتتىك كودەكستىڭ» جوباسى ازىرلەنىپ جاتىر. زاڭ جوباسىن دايىنداۋ كەزىندە ءبىز ساراپشىلاردىڭ پىكىرىن ەسكەرۋىمىز كەرەك. سونداي-اق الەۋمەتتىك ساياساتتىڭ بارلىق ماسەلەلەرىن ەگجەي-تەگجەيلى قاراستىرىپ, نورماتيۆتىك قۇقىقتىق اكتىلەردى ءبىر كودەكستە جۇيەلەۋ قاجەت. بۇل, ەڭ الدىمەن, ازاماتتارىمىز ءۇشىن قولايلى», دەدى ناريمان تورەعاليەۆ.
دەپۋتاتتار مەن ساراپشىلار «الەۋمەتتىك كودەكستە» زەينەتاقىمەن قامسىزداندىرۋ, الەۋمەتتىك كومەك پەن ساقتاندىرۋ, الەۋمەتتىك كەپىلدىكتەردى, سونداي-اق مينيمالدى الەۋمەتتىك ستاندارتتار مەن الەۋمەتتىك تاۋەكەلدەردى باسقارۋ جانە حالىقتى الەۋمەتتىك قورعاۋ سالاسىنداعى قوعامدىق قاتىناستاردىڭ كەڭ سپەكترى قامتىلۋى كەرەك دەپ ەسەپتەيدى.
«بۇل قۇجات ەڭ تومەنگى جالاقى, كۇنكورىس ءمينيمۋمى, كەدەيلىك شەگى ەنەتىن, ولاردى قالىپتاستىرۋ تەتىكتەرى ايقىن جانە حالىققا تۇسىنىكتى بولاتىن الەۋمەتتىك ستاندارتتارعا نەگىزدەلۋى كەرەك», دەيدى ەكونوميست اسقار قىسىقوۆ.
سونىمەن قاتار سەنات جانىنداعى جاس ساراپشىلار كلۋبىنىڭ وكىلدەرى «الەۋمەتتىك كودەكستە» قازاقستاندىقتاردىڭ الەۋمەتتىك-ەكونوميكالىق قۇقىقتارى مەن بالا قۇقىقتارىن قورعاۋدىڭ شارالارى بەلگىلەنىپ, قايىرىمدىلىق, ەرىكتىلەر جانە الەۋمەتتىك كاسىپكەرلىك ماسەلەلەرى ەسكەرىلۋى كەرەك دەگەن پىكىر قوستى, دەپ حابارلادى پارلامەنت سەناتىنىڭ ءباسپاسوز قىزمەتى.