اۋىر اتلەتيكادان ونلاين-فورماتتا ءوتىپ جاتقان قازاقستان چەمپيوناتىنىڭ ءۇشىنشى جارىس كۇنى اياقتالىپ, ەرلەر اراسىنداعى 67 كگ جانە ايەلدەر اراسىنداعى 64 جانە 71 كگ سالماق دارەجەلەرىندەگى جەڭىمپازدار مەن جۇلدەگەرلەر انىقتالدى.
ەرلەر اراسىنداعى 67 كگ سالماقتا 2019 جىلى تايلاندتا وتكەن الەم چەمپيوناتىنىڭ كۇمىس جۇلدەگەرى يگور سون (الماتى وبلىسى) قوسسايىستا 301 (136+165) كگ-نى ەڭسەرىپ, ەل چەمپيونى اتاندى. ەكىنشى ورىندى 269 (120+149) كگ زىلتەمىردى كوتەرگەن قوستاناي وبلىسىنىڭ وكىلى الەكسەي چۋركين يەلەنسە, ۇزدىك ۇشتىكتى قىزىلوردا وبلىسىنىڭ سپورتشىسى ايدوس تۇرسىنباي تۇيىندەدى. ول 265 (120+145) كگ-نى ەڭسەردى.
ال قىزدار اراسىنداعى 64 كگ سالماقتا گۇلنۇر ىبراي (الماتى وبلىسى) الدىنا جان سالمادى. ول قوسسايىس قورىتىندىسى بويىنشا 197 كگ (87+110) سالماقتى ەڭسەرىپ, ەل چەمپيونى اتاندى. كۇمىس پەن قولا جۇلدەلەردى قىزىلوردا وبلىسىنىڭ وكىلدەرى نۇراي قۇرمانباي (177 كگ) مەن رۋسالينا مۋليكوۆا (139 كگ) يەلەندى. 71 كگ سالماقتا ريو وليمپياداسىنىڭ قولا جۇلدەگەرى كارينا گوريچەۆا قارسىلاس شاق كەلتىرمەدى. الماتى وبلىسىنىڭ سپورتشىسى قوسسايىستا 225 (105+120) كگ-نى باعىندىردى. ەكىنشى ورىندى ايشا وماروۆا (208), ءۇشىنشى ورىندى داريا پاۆلوۆا (207) ەنشىلەدى.