قازاقستان مۇسىلماندارى ءدىني باسقارماسى مەن ورتا ازيا مۇفتيلەر كەڭەسىنىڭ توراعاسى, باس ءمۇفتي شەيح ءابساتتار قاجى دەربىسالى حازرەت قازاقستانداعى ميتروپوليتتىك ايماقتىڭ جاڭا باسشىسى, استانا جانە الماتى ارحيەپيسكوپى الەكساندر باستاعان دەلەگاتسيانى ولاردىڭ ءوتىنىشتەرى بويىنشا قابىلدادى. ءدىنباسى قازاقستانداعى جالپى ءدىني احۋال, ۇلتتار مەن ۇلىستار, دىندەرارالىق دوستىق پەن سىيلاستىق, ىنتىماق جايلى ءسوز ەتتى. قازاق ەلىنىڭ يسلام وركەنيەتىنىڭ ءبىر ءبولشەگى ەكەنىن, رەسپۋبليكا حالقىنىڭ 70%-ى يسلام ءدىنىن ۇستاناتىنىن, قالعان 30%-ى حريستيان ءدىنىندەگى ورىس, ۋكراين, نەمىس جانە ت.ب. ۇلتتار مەن ۇلىستاردان تۇراتىن ازاماتتاردىڭ ءوزارا سىيلاستىق پەن دوستىقتا, ىنتىماق پەن اۋىزبىرلىكتە ءومىر ءسۇرىپ وتىرعانىن, نۇر-مۇباراك ەگيپەت يسلام مادەنيەتى ۋنيۆەرسيتەتى مەن 7 مەدرەسە جۇمىس ىستەپ جاتقانىن ايتتى.
ارحيەپيسكوپ قازاقستاننىڭ ەگەمەندىك العالى بەرى قول جەتكىزگەن جەتىستىكتەرى مەن پرەزيدەنت ن.ءا.نازارباەۆتىڭ جەتەكشىلىگىمەن از ۋاقىتتا الەمدىك قوعامداستىقتان وزىنە لايىق ورىن العانىن تىلگە تيەك ەتتى. ول قازاقستان پرەزيدەنتى مەن ءدىنباسىنىڭ ۇلتتار مەن ۇلىستار, ءدىندەرارالىق دوستىق پەن ىنتىماق, سىيلاستىققا ۇلكەن ءمان بەرىپ وتىرعانىن جوعارى باعالايتىنىن مالىمدەدى. قازاقستاندا تاريحي قالىپتاسقان يسلام مەن پراۆوسلاۆيە ءدىني باسشىلارى اراسىنداعى تۇسىنىستىك پەن سىيلاستىقتى ەلدىڭ تۇراقتىلىعى مەن بەيبىت دامۋىنا جۇمسايتىنىن ءبىلدىردى.
باس ءمۇفتي شەيح ءابساتتار قاجى دەربىسالى 2003, 2006 جانە 2009 جىلدارى استانادا وتكەن الەمدىك جانە ءداستۇرلى دىندەر كوشباسشىلارىنىڭ سەزدەرى جانە ولاردىڭ ءمان-ماڭىزىنا توقتالدى. ارحيەپيسكوپ قازاقستاننىڭ باس قالاسىندا ەل پرەزيدەنتىنىڭ ۇيىتقى بولۋىمەن وتكەن بۇل ءىس-شارالارعا قىزىعۋشىلىق تانىتتى. سونىمەن قاتار, كوپۇلتتى, كوپكونفەسسيالى قازاقستان سياقتى كەڭ-بايتاق ەلدە ەتنوسارالىق تاتۋلىقتى, رۋحاني تۇراقتىلىقتى, بەيبىتشىلىك پەن ىنتىماقتى ساقتاپ وتىرعان مەملەكەتىمىزدىڭ دامۋ دەڭگەيىنە جوعارى باعا بەردى.
ۇشىراسۋدا ەكى ءدىن اراسىنداعى ءداستۇرلى ءدىني ىنتىماقتاستىق پەن ارىپتەستىك ماسەلەسى سەكىلدى جايتتەر ورتاق اڭگىمەگە وزەك بولدى.
قازاقستانداعى باستى ەكى ءدىنباسىلارى ەلىمىز حالقىنىڭ بىرلىگى مەن ىنتىماعىن, تاتۋلىعى مەن سىيلاستىعىن بۇدان دا بيىك بەلەستەرگە كوتەرۋ ءۇشىن جۇمىلا قىزمەت ەتۋدى نىساناعا الا بەرمەك بولىپ كەلىستى.
كەزدەسۋ سوڭىندا ەكى جاق سىي الماستى, دەپ حابارلادى قازاقستان مۇسىلماندارى ءدىني باسقارماسىنىڭ ءباسپاسوز قىزمەتى.