قىزىلوردادا بۇدان جارتى ايدان استام ۋاقىت بۇرىن «گەليوس» جانار-جاعارماي قۇيۋ بەكەتىنە شابۋىل جاساعان كۇدىكتىلەر قولعا ءتۇستى.
قىزىلوردادا بۇدان جارتى ايدان استام ۋاقىت بۇرىن «گەليوس» جانار-جاعارماي قۇيۋ بەكەتىنە شابۋىل جاساعان كۇدىكتىلەر قولعا ءتۇستى.
«وقيعا بيىلعى جىلعى 12 قاراشا كۇنى ساعات 04:40 كەزىندە «اقمەشىت» شاعىن اۋدانىندا ورنالاسقان «گەليوس» جانار-جاعارماي قۇيۋ بەكەتىندە ورىن الدى. بەتپەردە كيىپ العان بەلگىسىز ەكى ادام بەكەتكە كىرىپ كەلىپ, كاسسا جانىنداعى قوراپقا سالىنعان 780 778 تەڭگە اقشانى تارتىپ الادى. كەتىپ بارا جاتقاندارىندا الدارىنان شىعىپ, قارسىلىق كورسەتكەن كاسسير ي.نۇرتازاەۆتىڭ كەۋدە تۇسىنان بەلگىسىز اتىس قارۋىمەن وق اتقان. ناتيجەسىندە زارداپ شەگۋشى وقيعا ورنىندا قايتىس بولعان», – دەدى وسىعان وراي وبلىستىق ىشكى ىستەر دەپارتامەنتى ءباسپاسوز قىزمەتىندەگىلەر.
قىزىلوردا قالالىق ىشكى ىستەر باسقارماسى اتالمىش فاكتىگە بايلانىستى قىلمىستىق كودەكستىڭ 96-بابى 2-بولىگى «ج, ز» تارماقتارىمەن (ادامدار توبى, الدىن الا ءسوز بايلاسۋ ارقىلى قاراقشىلىقپەن ۇشتاسقان كىسى ءولتىرۋ), 179-بابى 2-بولىگى «ا, گ» تارماقتارىمەن (ادامدار توبىنىڭ الدىن الا ءسوز بايلاسۋ بويىنشا قارۋ رەتىندە پايدالاناتىن زاتتاردى قولدانۋمەن جاسالعان قاراقشىلىق) قىلمىستىق ءىس قوزعادى.
ءباسپاسوز قىزمەتىنىڭ مالىمدەۋىنشە, جەدەل-ىزدەستىرۋ شارالارىنىڭ ناتيجەسىندە اتالعان اسا اۋىر ساناتتاعى قىلمىسقا قاتىسى بار دەگەن 3 كۇدىكتىگە قاتىستى جيناقتالعان دالەلدەمەلەر تەرگەۋ بارىسىندا ناقتى ايعاقتارمەن بەكىتىلگەن. قازىر ءىس بويىنشا ايعاق زاتتار الىنىپ, تەرگەۋ امالدارى جۇرگىزىلىپ جاتىر.
قۇرىش نۇرىمبەت.