ساڭلاقتاردىڭ باسىن قوسقان سايىس

«كلاسسيكتەر» اراسىنداعى سايىستا 10 سالماق دارەجەسىنىڭ جۇلدەلەرى ساراپقا سالىنادى. اڭگىمەمىزدى وليمپيا ويىندارى باعدارلاماسىنا ەنگەن سالماقتاردان باستاعانىمىز ءجون. سەبەبى كەلەسى جىلى توكيودا ونەر كورسەتەتىن بالۋانداردىڭ بابى قالاي ەكەنىن ءبىلۋ بىزدەر ءۇشىن دە, باسقالار ءۇشىن دە وتە ماڭىزدى. بارشا قازاقستاندىق جانكۇيەر دە قازىرگى كەزدە سول ساڭلاقتاردىڭ ءوزارا تارتىسىن تاعاتسىزدانا كۇتۋدە.

60 كيلو سالماقتىڭ فاۆوريتتەرى مەيرامبەك ايناعۇلوۆ پەن ايدوس سۇلتانعالي ەكەنى ءسوزسىز. ەكەۋى دە دۇنيەجۇزىلىك دودالاردا دارالانعان دۇلدۇلدەر. 26 جاستاعى مەيرامبەك 2017 جانە 2019 جىلدارى جۇلدەگەرلەر قاتارىنا قوسىلدى. پاريجدە ول كۇمىس السا, نۇر-سۇلتاندا قولاعا قول سوزدى. ودان بولەك, اقتوبە وبلىسىنىڭ وكىلى ازيا ويىندارىندا ءۇشىنشى ساتىعا تابان تىرەسە, ازيا بىرىنشىلىگىندە ءبىر كۇمىس پەن ەكى قولانى قورجىنعا سالدى. 24 جاستاعى ايدوس 2018 جىلى بۋداپەشتتە ۇيىمداستىرىلعان الەم چەمپيوناتىندا قولا مەدالدى موينىنا ءىلدى. ايتۋلى قوس ساڭلاقپەن يىق تىرەسۋگە تەك ەرنار فيداحمەتوۆتىڭ عانا شاما-شارقى جەتەدى دەگەن ويدامىز. كەندى التايدىڭ سايىپقىرانى دا تالاي دۇرمەكتەردە ىسىلعان اككى بالۋان.

ءداپ قازىر دۋالى اۋىز مامانداردىڭ وزدەرى دە 67 كيلو سالماقتاعى المات كەبىسباەۆ پەن مەيىرجان شەرماحانبەتتىڭ قايسىسى جەڭەتىنىن ءدوپ باسىپ ايتا الماي وتىر. ويتكەنى ەكەۋى دە مىقتى. جاسى 33-كە تاياپ قالعان الماتتىڭ حالىقارالىق ارەنادا قازاق ەلى نامىسىن قورعاپ جۇرگەنىنە 12 جىلدان استى. شىعىستىڭ شىمىر جىگىتى سول ارالىقتا الەم چەمپيوناتىندا ءتورت رەت, ازيا ويىندارىندا ەكى رەت جۇلدە الدى. اراسىندا كۇمىسى مەن قولاسى دا بار. تەك التىن عانا جوق. كەبىسباەۆ ەكى مارتە ازيا چەمپيونى اتانىپ, تاعى ەكى رەت كۇمىسپەن كۇپتەلدى. لوندون مەن ريو وليمپيادالارىندا باق سىنادى. كەيىنگى جارىسىندا ول بەسىنشى ورىنعا تابان تىرەدى. ال مەيىرجان 2018 جىلعى الەمدىك دودادا قولا مەدالدى موينىندا جارقىراتتى. بۋداپەشتتەگى جارىستا ول اتاعىنان ات ۇركەتىن نەبىر مىقتىلاردىڭ اياعىن كوكتەن كەلتىرىپ, بارشا كورەرمەننىڭ ىستىق ىقىلاسىنا بولەندى. سونىمەن قاتار بۇل سالماقتا دانيار قالەنوۆ, ءادىلحان ساتاەۆ جانە نۇربەك قىزىروۆ سىندى جۇلقىنىپ تۇرعان جىگىتتەر بار.

77 كيلو سالماقتىڭ دا مىقتىسىن ءدوپ باسىپ ايتۋ قيىن. ءيا, قازىرگى كەزدە تىزگىن اسحات دىلمۇحامەدوۆتىڭ قولىندا ەكەنى راس. ازيا چەمپيونى جانە سول جارىستىڭ ءۇش دۇركىن جۇلدەگەرى اتانعان الماتى وبلىسىنىڭ وكىلى الەمدىك دودالاردا جەڭىس تۇعىرىنا سىنىق سۇيەم قالعاندا ءسۇرىنىپ ءجۇر. بىلتىر نۇر-سۇلتانداعى جارىستا داڭقى جەر جارعان رومان ۆلاسوۆتىڭ ءوزىن سۇرىندىرگەندە ريزا بولماعان جانكۇيەر جوق-اۋ, ءسىرا! بىراق اسحاتتىڭ بۇل جولعى باسەكەلەستەرى دە وتە مىقتى. ولار – الەم چەمپيوناتىنىڭ كۇمىس جۇلدەگەرى دەمەۋ جادىراەۆ, ازيا چەمپيوندارى ماكسات ەرەجەپوۆ پەن تەمىرلان شادۋكاەۆ جانە دۇنيەجۇزىلىك ۋنيۆەرسيادا مەن قۇرلىق بىرىنشىلىگىنىڭ جۇلدەگەرى اسحات جاڭبىروۆ. بۇل جىگىتتەردىڭ دە «ولىسپەي بەرىسپەيتىنى» انىق.

مامانداردىڭ پايىمداۋىن­شا, 87 كيلو سالماقتىڭ باس جۇل­دەسى ءۇشىن تارتىس ازامات كۇس­تى­باەۆ پەن نۇرسۇلتان تۇرسىنوۆ اراسىندا وتۋگە ءتيىس. ونىڭ سىرتىندا باۋىرجان مۋسين مەن ەلمار ۋكالي بار. 97 كيلو سالماق دارەجەسىنىڭ ۇزدىگى ەرۇلان ىسقاقوۆ. وعان قۇرمانسەيىت اداي لايىقتى قارسىلىق كورسەتۋى مۇمكىن.

اسا اۋىر سالماقتاعى الەم چەمپيوناتىنىڭ ءۇش دۇركىن قولا جۇلدەگەرى, ازيا ويىندارىنىڭ ەكى دۇركىن جەڭىمپازى, ازيانىڭ ەكى دۇركىن چەمپيونى, دۇنيەجۇزىلىك ۋنيۆەرسيادانىڭ قولا جۇلدەگەرى نۇرماحان تىناليەۆتى جىلى ور­نى­نان ىعىستىرۋ ءۇشىن ءالىم­حان سىزدىقوۆ پەن مانسۇر شادۋ­كاەۆ­تىڭ ەش ايانىپ قالمايتىنى انىق.

قالعان ءتورت سالماق دارەجەسى وليمپيا ويىندارىنىڭ باعدار­لاماسىنا ەنبەگەن. دەسەك تە بۇل سالماقتاردا دا مىقتى بالۋاندار از ەمەس. وليمپياداعا بارماسا دا, ولار الەم جانە قۇر­لىق چەمپيوناتتارىندا كۇش سىناسادى. بۇل جارىستاردىڭ دا مارتەسى زور. ايتۋلى دودالاردا ەل نامىسىن قورعاۋعا لايىق ەكەندەرىن دالەلدەۋ ءۇشىن الماتى تورىندە ونەر كورسەتەتىن سايىپ­قىراندار دا بارىن سالادى. بۇل رەتتە ءبىز قورلان جا­قانشا, جانسەرىك سارسەنبيەۆ, امانعالي بەكبولاتوۆ (55 كيلو), ەرنۇر فيداحمەتوۆ, جولدىباي توقباەۆ, باعلان جاقانشا (63 كيلو), قاھارمان قيسمەتوۆ, ازات سادىقوۆ, ابراگيم ماگامادوۆ (72 كيلو), ميراس بارشىلىقوۆ پەن ەۆگەني پوليۆادوۆ (82 كيلو) سىندى بالۋانداردى ەرەكشە اتاپ وتەر ەدىك.