الماتىداعى «دوستىق» سپورت كەشەنىندە وتكەن ەركىن كۇرەستەن قازاقستان چەمپيوناتى ءوز مارەسىنە جەتتى, دەپ حابارلايدى Egemen.kz.
92 جانە 125 كيلو سالماق دارەجەلەرىندەگى بەلدەسۋلەردىڭ ناتيجەلەرى مىناداي بولدى:
92 كيلو سالماق دارەجەسىندە ماڭعىستاۋلىق ەلحان اسادوۆتىڭ اسىعى الشىسىنان ءتۇستى. فينالدا ول نۇر-سۇلتاننىڭ بالۋانى ەرالى ابدراشەۆتەن ايلاسىن اسىردى. ءۇشىنشى ورىندا – وسكەمەندىك ءشاميل ماگامادوۆ پەن ەلوردالىق نۇرعالي نۇرعايىپ ۇلى.
125 كيلو سالماقتا پاۆلودارلىق داۋلەت شابانباي, شىعىسقازاقستاندىق ولەگ بولتين, قاراعاندىلىق ەرمۇحامبەت ىڭكار جانە اقتوبەلىك يۋسۋپ باتىرمۇرزاەۆ سىندى الىپتار بولدى. ولاردىڭ بارلىعى دا اسا ءىرى حالىقارالىق جارىستاردا جۇلدە الىپ جۇرگەن دۇلدۇلدەر. سولاردىڭ اراسىنان داۋلەت پەن ولەگ وزىپ شىقتى. 37 جاستاعى شابانبايدىڭ كەزىندە وليمپيادادا قولا مەدالدى يەلەنىپ, ازيا ويىندارىندا ءبىر رەت جانە قۇرلىق بىرىنشىلىگىندە بەس رەت جۇلدەگەرلەر ساناتىنان كورىنگەنىن جانكۇيەرلەر جاقسى بىلەدى. بولتين ودان ون جاس كىشى. بۇل تارتىس جاس جولبارىستىڭ پايداسىنا شەشىلدى. ولەگ بولتين – التىن, داۋلەت شابانباي – كۇمىس جانە يۋسۋپ باتىرمۇرزاەۆ پەن تۇركىستاندىق باقداۋلەت وسەرباي – قولا مەدالداردى مويىندارىنا ءىلدى.