ەركىن كۇرەستەن الماتىداعى «دوستىق» سپورت كەشەنىندە ءوتىپ جاتقان قازاقستان چەمپيوناتىنىڭ سوڭعى كۇنىنندە جۇلدەلى ورىندار ءۇشىن تالاساتىن بالۋاندار بەلگىلى بولدى, دەپ حابارلايدى Egemen.kz.
74 كيلو سالماقتىڭ نەگىزگى فاۆوريتتەرى ۇشەۋ ەدى. ولار – نۇرلان بەكجانوۆ, نۇرقوجا قايپانوۆ جانە دانيار قايسانوۆ. ۇشەۋى دە الەم چەمپيوناتىنىڭ جۇلدەگەرى اتانعان اپايتوستەر. نۇرلان بۇل اتاققا 2016 جىلى بۋداپەشتە قول جەتكىزدى.
2019 جىلى نۇر-سۇلتاندا وتكەن دودادا نۇرقوجا كۇمىس السا, دانيار قولا مەدالدى موينىنا ءىلدى. بىراق ول كەزدە قايپانوۆ 70 كيلو سالماقتا كۇرەسكەن ەدى. ودان بولەك, ەسىمدەرى اتالعان ورەندەردىڭ بارلىعى دا قۇرلىقتىق دەڭگەيدەگى جارىستاردا جاسىنداي جارقىرادى. بىراق العاشقى اينالىمنان كەيىن قايسانوۆ جارىستى جالعاستىرۋدان باس تارتتى. سەبەبى, بىرنەشە كۇن بويى ونىڭ بەلى اۋىرىپ, مازاسىزدانعان ەكەن. سودان جاراقاتىن اسقىندىرىپ المايىن دەپ, وسىنداي شەشىم قابىلدادى.
وسى جاعدايدى نۇرقوجا قايپانوۆ ۇتىمدى پايدالاندى. قارسىلاستارىنىڭ بارلىعىن قاپى قالدىرعان سولتۇستىك كازاقستان وبلىسىنىڭ وكىلى فينالدا قىزىلوردالىق قانات مۇسابەكوۆتى ۇتىپ, التىن تۇعىرعا كوتەرىلدى. نۇر-سۇلتاندىق نۇرلان بەكجانوۆ پەن الماتىلىق دارحان ەسەنعالي ءۇشىنشى ساتىلارعا جايعاستى.