ەرتەڭ شىمكەنتتە بوكستان قازاقستان چەمپيوناتىنىڭ جالاۋى جەلبىرەيدى. ەرلەر اراسىنداعى باسەكەلەر 10 سالماق دارەجەسى بويىنشا وتەدى, دەپ حابارلايدى Egemen.kz.
ءبىر اپتاعا سوزىلاتىن جارىس بارىسىندا 200-دەن اسا بىلعارى قولعاپ شەبەرلەرى ونەر كورسەتەدى. سولاردىڭ قاتارىندا حالىقارالىق دودالاردا دارالانعان گۇرزى جۇدىرىقتى جىگىتتەر دە بار.
ۇلتتىق قۇرامانىڭ باس باپكەرى عالىمبەك كەنجەباەۆتىڭ ايتۋىنشا, ەل بىرىنشىلىگىندە ساقا سپورتشىلار وزدەرىنىڭ مىقتىلىعىن پاش ەتۋگە تىرىسسا, جالىندى جاستار رەسپۋبليكامىزدىڭ باس كومانداسىنا قابىلدانۋعا لايىق ەكەندەرىن دالەلدەۋگە تالپىنۋعا ءتيىس.
بيىلعى جارىستىڭ جۇلدە قورى 20 ميلليون تەڭگەنى قۇراپ وتىر. باس جۇلدە العان بوكسشى 500 مىڭ السا, كۇمىس جۇلدەگەر 300 مىڭدى قالتاعا باسادى. ال قولاعا قول سوزعاندار 100 مىڭ تەڭگەگە يەلىك ەتەدى. سونىمەن قاتار, شىمكەنتتە ايەلدەر دە جۇدىرىقتاسادى. ەلىمىزدىڭ ءار ايماعىنان جينالعان 110 بۇرىمدى وسى دودادا كۇش سىناسۋعا نيەت بىلدىرگەن ەكەن.