سەناتتىڭ الەۋمەتتىك-مادەني دامۋ جانە عىلىم كوميتەتىنىڭ باسشىسى مۇرات باقتيار ۇلىنىڭ توراعالىق ەتۋىمەن "ۇلتتىق قۇندىلىقتار – رۋحاني جاڭعىرۋدىڭ نەگىزى" تاقىرىبىنا ارنالعان دوڭگەلەك ۇستەل بولدى, دەپ حابارلايدى Egemen.kz.
بۇل شارا پارلامەنتتىك تىڭداۋعا دايىندىق اياسىندا وتكەن بولاتىن.
دوڭگەلەك ۇستەل وتىرىسىنا پارلامەنت سەناتىنىڭ دەپۋتاتتارىنان باسقا اقپارات جانە قوعامدىق دامۋ, مادەنيەت جانە سپورت, ءبىلىم جانە عىلىم مينيسترلىكتەرىنىڭ باسشىلىعى, سونداي-اق مامبەت قويگەلديەۆ, اسىلى وسمانوۆا, راحمان الشانوۆ, ءۋاليحان قاليجانوۆ, انار فازىلجانوۆاجانە باسقا دا كورنەكتى مەملەكەت جانە قوعام قايراتكەرلەرى مەن زيالى قاۋىم وكىلدەرى قاتىستى.
"بۇگىنگى عىلىم مەن ءبىلىمنىڭ, تەحنيكا مەن تەحنولوگيانىڭ دامىعان زامانىندا جاس ۇرپاق وتە ۇلكەن اقپارات اعىنىنىڭ استىندا قالىپ قويۋدا. بۇل رەتتە ءبىز ءوز ەلىمىزدىڭ ۇلتتىق قۇندىلىقتارىن ۇنەمى العى شەپكە شىعارىپ دارىپتەپ, ءتىرىلتىپ وتىرماساق, جاستاردى ۇلتتىق بولمىسىنان ايرىپ الۋ قاۋپى باسىم ەكەنىن ايتقىم كەلەدى. بۇگىن دە وسى ماسەلەلەر جايلى سىزدەردىڭ تەرەڭ, زەردەلى ۇسىنىستارىڭىزدى تىڭدايمىز دەپ ۇمىتتەنەمىن", دەدى كوميتەت توراعاسى مۇرات باقتيار ۇلى.
نەگىزگى بايانداما جاساعان سەناتور باقىتجان جۇماعۇلوۆ ەلىمىزدىڭ ءار وتباسىنا, جەكە ازاماتىنا قاتىستى ۇلتتىق جوبا قاجەت ەكەنىن ايتا كەلىپ, وسى تاقىرىپ بويىنشا پارلامەنتتىك تىڭداۋ وتكىزۋ يدەياسى تۋىنداعانىن اتاپ ءوتتى. سەناتور وزگەدەن گورى – ءوزىن, قوعامنان گورى – جەكە وتباسىنىڭ پايداسىن ويلايتىن, رۋحاني جاعىنان ءبىرشاما جۇدەۋ, ءبىلىم جاعىنان سايازداۋ ۇرپاق كوبەيگەنىنە الاڭداۋشىلىق ءبىلدىردى.
سەناتور قازاقستان رەسپۋبليكاسىنىڭ پرەزيدەنتى ق.توقاەۆتىڭ قازاقستان حالقىنا "جاڭا جاعدايداعى قازاقستان: ءىس-قيمىل كەزەڭى" اتتى جولداۋىندا "قازىرگى مىندەت – حالقىمىزدىڭ جاڭا بولمىسىن قالىپتاستىرۋ, تۇتاس ۇلت ساپاسىن ارتتىرۋ" دەگەنىن ەسكە سالا كەلىپ, ول جايىندا ءوز ويلارىن ورتاعا سالدى.
دەپۋتات دوڭگەلەك ۇستەلگە قاتىسۋشىلارعا " ۇلى دالانىڭ ۇلتتىق قۇندىلىقتارى" تۇجىرىمداماسىن تانىستىردى. سەناتوردىڭ پىكىرىنشە, ەل دامۋىنىڭ وسى كەزەڭىندە ماڭىزدى بولىپ تابىلاتىن بەس باعىت: تاۋەلسىزدىك جانە تاريحي تانىم; ەل مەن جەر; ءتىل جانە يماندىلىق; ۇلتتىق ءداستۇر جانە وتباسىلىق تاربيە; ءبىلىم مەن بىلىكتىلىك تۇجىرىمدامانىڭ نەگىزىن قۇرايدى.
سەناتور ۇلتتىق ءداستۇر, تاربيە, ءبىلىم ماسەلەلەرىنە ەرەكشە توقتالدى. "بالا – بەسىكتەن تاربيە الادى. ۇلتتىق ءداستۇردى بويعا سىڭىرەدى. انا جولدان تايسا – ۇلت جولدان تايادى. اكە جولدان تايسا – ۇلت توزادى. قوعام جولدان تايسا – تاۋەلسىزدىكتەن ايرىلادى. ۇلتتىق ءداستۇر جانە وتباسىلىق تاربيە – ءپاتريوتيزمنىڭ باستاۋى. بەسىكتەن تاربيەلەۋ – ۇلتتىق ۇعىم كەپىلى. ءبىلىمى جوق ەل – بەدەلسىز, عىلىمى جوق ەل – بەدەرسىز.قالىپتاسقان جاعدايدا ءبىلىم مەن عىلىمنىڭ جۇيەسىن قايتا قاراۋ كەرەك", دەدى سەناتورباقىتجان جۇماعۇلوۆ.
"ۇلتتىق قۇندىلىقتارىمىزدى قازاقستاننىڭ ءاربىر ازاماتىنىڭ ساناسىنا ەنگىزۋ جانە ورنىقتىرۋ قاجەت. بۇگىنگى دوڭگەلەك ۇستەلدىڭ دە كوزدەگەن ماقساتى وسى. بىرلەسە, ىرگەمىزدى ىدىراتپايتىن, ۇلتتىق قۇندىلىقتارىمىزدى ۇلىقتايتىن كوزقاراسقاجەت. ءاربىر قازاقستان ازاماتىنىڭ بويىنا ۇلتتىق ءپاتريوتيزمدى قالىپتاستىراتىن جولدارىن ايقىنداپ بەرگەن دۇرىس بولار ەدى. سوندا عانا, تاۋەلسىز ەلىمىزدە ۇلتتىق قۇندىلىقتارىمىزدى كۇندەلىكتى ومىرگە ەنگىزە الامىز", دەدى باقىتجان جۇماعۇلوۆ.
دوڭگەلەك ۇستەلدە "رۋحاني جاڭعىرۋ" باعدارلاماسىنداعى ارناۋلى جوبالاردى ىسكە اسىرۋ بارىسى دا تالقىلاندى. زيالى قاۋىم وكىلدەرى حالىقتىڭ بىرلىگىن نىعايتۋ مەن تاريحي تانىمىنا, سونداي-اق مەملەكەتتىك ءتىلدى دامىتۋعا قاتىستى ءوز ويلارىن ورتاعا سالدى.