نۇر-سۇلتان قالاسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى قالا اۋماعىندا ەسىرتكى ساتۋشىنى ۇستاۋ بويىنشا ارنايى وپەراتسيا وتكىزدى, – دەپ حابارلايدى Polisia.kz.
ءتارتىپ ساقشىلارى ارنايى وپەراتسيا بارىسىندا جەڭىس كوشەسىندە ەسىرتكى ساتقانى ءۇشىن بۇرىن سوتتالعان 39 جاستاعى قالا تۇرعىنىن ۇستادى. جەكە ءتىنتۋ بارىسىندا ونىڭ سومكەسىنەن گاشيش سالىنعان 13 پوليەتيلەن پاكەت تابىلدى. ەر ادامنىڭ تۇراتىن جەرىن تەكسەرگەن پوليتسەيلەر گاشيش سالىنعان ءۇش پوليەتيلەن پاكەتتى جانە وتكىزۋگە دايىنداپ قويعان, ولشەنىپ, بۋىلىپ-تۇيىلگەن 32 پوليەتيلەن ورامانى تاپقان.
ارنايى وپەراتسيانى وتكىزۋ ناتيجەسىندە زاڭسىز اينالىمنان 20 كەلىگە جۋىق ەسىرتكى تاركىلەندى. ونىڭ “قارا نارىقتاعى” باعاسى شامامەن 30 ملن. استام تەڭگەنى قۇرايدى. قازىرگى تاڭدا ەلىمىزدىڭ وڭتۇستىك وڭىرلەرىنەن ەسىرتكىنى جەتكىزۋگە جانە وتكىزۋگە قاتىسى بار قىلمىستىق تىزبەككە قاتىسۋشىلاردى انىقتاۋ بويىنشا جەدەل-ىزدەستىرۋ شارالارى جۇرگىزىلۋدە.
كۇدىكتىگە قاتىستى قر قك 296-بابىنىڭ 4-بولىگى (اسا ءىرى مولشەردەگى ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىنسىز زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ), قر قك 297-بابىنىڭ 3-بولىگى (اسا ءىرى مولشەردەگى ەسىرتكى, پسيحوتروپتىق زاتتاردى, سول تەكتەستەردى وتكىزۋ), قر قك 287-بابىنىڭ 2-بولىگى (جاراقات سالاتىن پاتروندارمەن اتۋ مۇمكىندىگى بار ۇڭعىسىز اتىس قارۋىن, گازدى قارۋدى, قىسقا ۇڭعىلى تەگىس ۇڭعىلى اتىس قارۋىن, سول سياقتى ونىڭ پاتروندارىن زاڭسىز يەمدەنۋ, بەرۋ, وتكىزۋ ساقتاۋ, تاسىمالداۋ نەمەسە الىپ ءجۇرۋ) بويىنشا سوتقا دەيىنگى تەرگەۋ امالدارى باستالدى. ۇستالعان ادام نۇر-سۇلتان قالاسىنىڭ پد ۋاقىتشا ۇستاۋ يزولتورىنا قامالدى.