تۇركىستان وبلىسى كەلەس اۋدانىنا قاراستى بوزاي اۋىلىنىڭ تۇرعىنى تالعات ءادىلحانوۆ شاعىن تراكتور قۇراستىرىپ شىقتى. جاعىمدى جاڭالىقتى ەستىگەن بويدا كەلەس اۋدانى اكىمدىگىنىڭ ءباسپاسوز قىزمەتى ارقىلى ونەرتاپقىشپەن حابارلاستىق.
اۋىل شارۋاشىلىعىنا قولايلى بۇل تەحنيكاسىن ول بىرنەشە كولىكتىڭ جيىنتىعىنان قۇراپتى. تراكتورعا «جيگۋليدىڭ» قوسالقى بولشەكتەرى مەن «نيۆانىڭ» قوزعالتقىشىن ورناتقان. الداعى ۋاقىتتا تالعاتتىڭ تراكتورعا قوسىمشا تىركەمەلەر جاساپ شىعارماق ويى بار. جوسپارى جۇزەگە اسسا, ول اۋىل شارۋاشىلىعى جۇمىستارىنا پايدالانىلىپ, شارۋانىڭ قولىن ۇزارتاتىنى انىق.
«بۇل تەحنيكانى جاساۋداعى ماقسات – ءۇي ىرگەسىندەگى باۋ-باقشالىق جەرلەردى جىرتۋ, ەگىن ەگۋگە دايىنداۋ, قول كۇشىن جەڭىلدەتىپ, ەڭبەك تيىمدىلىگىن ارتتىرۋ. سوقاعا قوسا, سۇرگىش قۇرىلعىسىن قويىپ جاتىرمىن, بۇيىرتسا بۇل تراكتورمەن مالدىڭ قيىن تازالاۋعا دا بولادى. كولىك جوندەۋگە بالا جاسىمنان قىزىقتىم. ەندى سونى كاسىپ ەتىپ, ناپاقا ايىرىپ وتىرمىز. اتام دا, اكەم دە تەمىر ۇستاسى بولعان جاندار. سولاردىڭ ىزىمەن كەلە جاتىرمىن», دەيدى تالعات اسانحان ۇلى.
ونەرتاپقىش جىگىت تۋرالى اۋىلداستارى دا جىلى پىكىر ءبىلدىردى. «تالعات تەحنيكانىڭ ءتىلىن بىلەدى. جەتى اتاسىنان بەرى قاراي ەرداۋىتتىڭ تەمىر ۇستا دۇكەنىن ۇستاپ كەلە جاتقان جاندار. اۋىل تۇرعىندارىنىڭ ءبارى تەحنيكاسىن وسى ىنىمىزگە الىپ كەلىپ, جوندەتەدى. قولاقىسى دا قىمبات ەمەس. ۇساق-تۇيەك جۇمىستارىن تەگىن ىستەپ بەرەتىنى بار, قول-قايىرى دا از ەمەس», دەيدى اۋىل اعاسى تاتتىبەك ادەەۆ.
اتىرگۇل ءتاشىم,
جۋرناليست