12 جەلتوقساندا ارالاس جەكپە-جەكتەن رەسەيدە اسا ءتۋرنيرى وتەدى. ازىرگە جارىستىڭ ناقتى قاي قالادا ۇيىمداستىرىلاتىنى انىقتالماعانىمەن, قازىردىڭ وزىندە قاتىسۋشىلاردىڭ دەنى بەلگىلى. ەڭ باستىسى, بۇل دودادا قازاقستاننىڭ ەكى سپورتشىسى ونەر كورسەتەدى. ولار – «الاش پرايد» كلۋبىنىڭ مۇشەلەرى نۇرسۇلتان قاسىمحانوۆ پەن ەۆگەني ەگەمبەرديەۆ.
ەۆگەني ەگەمبەرديەۆ – كوپتەن بەرى كوزگە ءتۇسىپ جۇرگەن ساقا سپورتشى. كەزىندە ول بوكستان جاستار اراسىنداعى الەم بىرىنشىلىگىنىڭ كۇمىس جۇلدەگەرى اتاندى. كەيىننەن ارالاس جەكپە-جەككە مىقتاپ دەن قويىپ, بىرقاتار بايراقتى باسەكەدە كۇش سىناستى. وسى كۇنگە دەيىن رەسمي تۇردە 12 جەكپە-جەك وتكىزىپ, 9 رەت جەڭىسكە جەتتى. تاراز ءوڭىرىنىڭ تۋماسى قازىرگى كەزدە جارتىلاي اۋىر سالماقتا اسا رەيتينگىندە ءتورتىنشى ساتىعا جايعاسقان. ەۆگەني بۇل جارىستا ليۋك بارناتتپەن ايقاسادى. ۇلىبريتانيانىڭ وكىلى وكتاگوندا 27 كەزدەسۋ وتكىزىپ, 17 رەت باسىمدىق تانىتقان. كەزىندە بارناتت الەمنىڭ ەڭ ۇزدىك پروموۋشەنى – UFC-دە باق سىناعان.
نۇرسۇلتان قاسىمحانوۆ تا سوڭعى كەزدەرى ورەلى ونەرىمەن كوزگە ءتۇسىپ جۇرگەن جالىندى جاستاردىڭ ءبىرى. بىلتىرعى جىلدىڭ قوڭىر كۇزىندە الماتىدا وتكەن اسا جارىسىندا قازاقستاندىق سپورتشىلار تەگىستەي ۇتىلعاندا ءداپ وسى قازاقتىڭ قايسار ۇلى عانا قارسىلاسىن كوكالا قويداي ەتىپ ساباپ, ايقىن جەڭىسكە قول جەتكىزدى. سول كەزدەن باستاپ نۇرسۇلتانعا دەگەن جانكۇيەرلەردىڭ ىقىلاسى ەرەكشە. ايقاس الاڭىندا بارلىعى 10 كەزدەسۋ وتكىزگەن جەتىسۋ ءوڭىرى ورەنىنىڭ 8 مارتە مەرەيى ۇستەم بولدى. قاسىمحانوۆ ايتۋلى جارىستا اليحان سۋلەيمانوۆپەن شەبەرلىك بايقاسادى. چەشەنستاننىڭ تۋماسى 13 باسەكەنىڭ تەك ۇشەۋىندە عانا ۇتىلعان.
ال وسى جارىستاعى باستى جەكپە-جەك رەسەيدىڭ ەكى سپورتشىسى – ماگومەد يسمايلوۆ پەن يۆان شتىركوۆ اراسىندا وتەدى. ولاردىڭ ەكەۋى دە نەبىر مىقتىلاردى ۇتىپ, جانكۇيەرلەر جۇرەگىن الدەقاشان جاۋلاعان جاۋىنگەرلەر. ماسەلەن, يسمايلوۆ بيىل اتىشۋلى الەكساندر ەمەليانەنكونى وڭدىرماي ساباسا, شترىكوۆ تياگو سيلۆا, فابيو مالدونادو, انتونيو سيلۆا سىندى ساڭلاقتاردان باسىم ءتۇستى.