كەشە قازاقستان پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشەۆ بەينەكونفەرەنتسيا فورماتىندا وتكەن ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) قاۋىپسىزدىك كەڭەسى حاتشىلارى كوميتەتىنىڭ وتىرىسىنا قاتىستى.
ءىس-شاراعا رەسەي قاۋىپسىزدىك كەڭەسىنىڭ حاتشىسى ن.پاترۋشەۆ, ارمەنيا قاۋىپسىزدىك كەڭەسىنىڭ حاتشىسى ا.گريگوريان, قىرعىزستان قاۋىپسىزدىك كەڭەسىنىڭ حاتشىسى ر.مۋساەۆ, تاجىكستان قاۋىپسىزدىك كەڭەسىنىڭ حاتشىسى ن.ماحمۋدزودا, بەلورۋسسيانىڭ قاۋىپسىزدىك كەڭەسى مەملەكەتتىك حاتشىسىنىڭ ورىنباسارى م.پۋزيكوۆ جانە ۇقشۇ باس حاتشىسى س.زاس قاتىستى (2020 جىلى ۇقشۇ-عا رەسەي فەدەراتسياسى توراعالىق ەتكەنىن ەسكەرە وتىرىپ, وتىرىستى ماسكەۋ قالاسىندا وتكىزۋ جوسپارلانعان بولاتىن).
تاراپتار جيىن بارىسىندا حالىقارالىق جانە وڭىرلىك احۋالدىڭ نەگىزگى اسپەكتىلەرى تۋرالى پىكىر الىستى. وزەكتى سىن-تەگەۋرىندەر مەن قاتەرلەرگە قارسى ءىس-قيمىلداردىڭ, تەرروريستىك ارەكەتتەردىڭ, ەسىرتكىنىڭ زاڭسىز اينالىمىمەن كۇرەس جۇرگىزۋدىڭ پراكتيكالىق شارالارىنا, كيبەر- قاۋىپسىزدىك سالاسىنداعى بىرلەسكەن شارالارعا باستى نازار اۋدارىلدى.
اسەت يسەكەشەۆ ۇقشۇ-نىڭ ماڭىزدى باعىتتارى بويىنشا قازاقستاننىڭ اتقارىپ جاتقان جۇمىسى جايىندا ارىپتەستەرىن حاباردار ەتىپ, حالىقارالىق تەرروريزممەن جانە ەكسترەميزممەن كۇرەستە كەشەندى ءارى جۇيەلى ءتاسىل قاجەت ەكەنىن اتاپ ءوتتى.
جيىندا ۇقشۇ-عا مۇشە مەملەكەتتەردىڭ قاۋىپسىزدىك كەڭەستەرىنىڭ حاتشىلارى حالىقارالىق تەرروريزممەن, تەرروريزمنىڭ جانە ونىمەن بايلانىستى ەكسترەميستىك يدەولوگيالاردىڭ تاراۋىنا قارسى كۇرەس جۇرگىزۋ ماقساتىندا ىنتىماقتاستىق پەن ۇيلەستىرۋ كۇشتەرىن نىعايتۋ تۋرالى مالىمدەمە قابىلدادى.
سونداي-اق ۇيىم اياسىندا ءوزارا ءىس-قيمىلدى جەتىلدىرۋگە باعىتتالعان بىرقاتار قۇجاتقا قول قويىلدى.
كەزدەسۋ قورىتىندىسى بويىنشا ۇقشۇ-عا مۇشە مەملەكەتتەر باسشىلارىنىڭ قاتىسۋىمەن بيىلعى جىلدىڭ 2 جەلتوقسان كۇنىنە جوسپارلانعان ۇجىمدىق قاۋىپسىزدىك كەڭەسى سەسسياسىنىڭ كۇن ءتارتىبىنىڭ جوباسى كەلىسىلدى.
ۇقشۇ قاۋىپسىزدىك كەڭەسى حاتشىلارى كوميتەتىنىڭ كەزەكتى وتىرىسى 2021 جىلى تاجىكستان رەسپۋبليكاسىندا وتەدى, دەپ حابارلادى اقوردا سايتى.