اقتوبەدە كاسىپكەرلەر كوبەيدى

بيزنەس اشۋعا بايلانىستى ءتيىمدى مەملەكەتتىك باعدارلاما­لاردىڭ ىسكە قوسىلۋى, نەسيەلەۋ­دىڭ پايىزدىق مولشەرلەمەسىنىڭ ازايتىلۋى, شاعىن جانە ورتا بيزنەس نىسانىن تىركەۋ كەزىن­دەگى قۇجاتتاردىڭ ازايتىلىپ, تىركەۋ مەرزىمىنىڭ وڭايلاتىلۋى كوپ­تەگەن تۇرعىنداردى ءوز ىستەرىن باستاۋعا ىنتالاندىردى.

وبلىستىق كاسىپكەرلىك باس­قار­ما­سىنىڭ باسشىسى نۇرحان تىلەۋمۇراتوۆتىڭ ايتۋىنشا, قازىر وڭىردە 60 مىڭعا جۋىق شاعىن جانە ورتا كاسىپكەرلىك نىساندارى جۇمىس ىستەپ جاتىر. سالىس­تىرا ايتقاندا, بيىل وڭىردەگى شاعىن كاسىپكەرلەردىڭ ۇلەسى وتكەن جىلمەن سالىستىرعاندا 2,7 پايىزعا ارتقان. كوپشىلىك ازاماتتار «بيزنەستىڭ جول كارتاسى», «قاراپايىم زاتتار ەكونوميكاسى» جانە «ەڭبەك» باعدارلامالارى بويىنشا از پايىزبەن ۇزاق مەرزىمگە نەسيەلەر راسىمدەپ, بىردەن جۇمىس باستاپ كەتتى. كوبىنەسە از قامتىلعان وتباسىلار, كوپبالالى انالار, جۇمىسسىز جۇرگەن ازاماتتار وقۋ كۋرستارىنان ءوتىپ, جەكە كاسىپكەر رەتىندە تىركەلىپ, از پايىزدىق مولشەرلەمەمەن نەسيەلەر الىپ, ءوز كاسىپتەرىن اشىپ ۇلگەردى. تۇرعىندار قۇجات­تارىن راسىمدەۋگە نەسيە بەرۋشى ۇيىمداردىڭ قىزمەتكەرلەرى, حالىققا قىزمەت كورسەتۋ ورتا­لىقتارىنىڭ ماماندارى جاق­سى اتسالىسىپ, دەر كەزىندە جانە ساپالى جۇمىس اتقاردى. سونىڭ ارقاسىندا كاسىپتى تىركەۋگە جانە نەسيە الۋعا قۇجاتتاردى راسىمدەۋ مەرزىمدەرى قىسقاردى.

اقتوبە وبلىسىندا بىل­تىر «بيزنەستىڭ جول كار­تاسى» باع­دارلاماسى بو­يىن­شا كاسىپكەر­لەرگە 2,4 ملرد تەڭگە بولىنسە, بيىل وسى قاراستىرىلعان قارجى كولەمى 3,3 ملرد تەڭگەگە ارت­قان. ۇستى­مىزدەگى جىلى وسى باع­دار­لاما بويىنشا 492 ءوتىنىم ماقۇلدانىپ, بىلتىرعى جىل­مەن سالىستىرعان­دا جاڭا جوبا­لار سانى 59 پايىز­عا جوعارىلا­دى. «بيزنەستىڭ جول كار­تاسى» باعدارلاماسىنىڭ ەرەك­شەلىگى – جاڭادان كاسىپ باس­تاعان ءبىر ازامات 5-6 پايىزدىق جىلدىق مولشەرلەمەمەن 20 ملن تەڭگەگە دەيىن نەسيە الا الادى.

 قالادا دا, دالادا دا كاسىپ اشۋعا مۇمكىندىك بەرەتىن, نارىق­قا قاجەتتى ءونىم وندىرۋشىلەردى قولدايتىن «قاراپايىم زاتتار ەكونوميكاسى» بويىنشا بىلتىر 83 جوبا, بيىل 110 جوبا قول­داۋ العان. «ەڭبەك» باع­دار­لا­ماسى ارقىلى 960 جوبا ما­قۇل­دانىپ, جىل ىشىندە تۇرعىن­دارعا 4 ملرد تەڭگەدەن استام نەسيە بەرىلگەن. «ەڭبەك» باع­دار­لاماسى ەلدى مەكەندەردە تۇ­رىپ, مال شارۋاشىلىعىمەن اي­نا­لىس­قىسى كەلەتىندەر ءۇشىن تاپتىرماس جوبا. وسى جوبامەن قارجى الىپ, شاشتاراز, ناۋ­بايحانا, كيىم تىگەتىن اتەلە اشىپ, مال-قۇس ءوسىرىپ, جىلىجاي سالىپ كوكونىس وسىرەتىن قىز-كەلىنشەكتەر, كوپبالالى انالار كوبەيگەن.

«كاسىپكەرلەر پالاتاسى كوك­تەم­دە پاندەميا باستالعاننان باستاپ, جەدەل تەلەفون جانە الەۋمەتتىك جەلىدەگى پاراقشا­لارى ارقىلى كاسىپكەرلەردىڭ بار­لىق ساۋالدارىنا جاۋاپ بەرۋگە تىرىستى. ناۋرىز ايىنان باس­تاپ جۇمىستارىن توقتاتقان كاسىپكەرلەر نەسيە تولەۋ مەر­زىمىنە جەڭىلدىك سۇرادى, سالىق­تىڭ ازايتىلۋى مەن پاندەميا­دان كەيىنگى بيزنەستىڭ احۋالىن سۇرادى», دەيدى «اتامەكەن» ۇلت­تىق كاسىپكەرلەر پالاتاسىنىڭ اقتوبە وبلىستىق فيليالىنىڭ ساراپ­شىسى راحات تاجىباەۆ.

ۇلتتىق ەكونوميكا مينيستر­لىگىنىڭ ساراپتاۋىمەن ەلىمىزدە ەڭ كوپ زارداپ شەككەن 29 كاسىپ­كەرلىك ءتۇرى بويىنشا سالىق جەڭىل­دىكتەرىنىڭ بەرىلۋى, نەسيە قارىزدارى بار كاسىپكەرلەردىڭ 1 قاراشاعا دەيىن ونى تولەۋ مەرزىمدەرىنىڭ ۇزارتىلۋى, مەم­لەكەت مەنشىگىنەن نە كۆازيسەك­تورلىق مەنشىكتەن جالعا الىپ وتىرعان كاسىپكەرلەرگە جالداۋ اقىسىنان ءۇش ايعا بوساتىلۋى – پاندەميا كەزىندەگى شەكتەۋلەرگە بايلانىستى توقتاپ تۇرعان شاعىن جانە ورتا كاسىپكەرلىك نىساندارىنا جاقسى قولداۋ بولدى.

اقتوبە