باتىس قازاقستان وبلىسىنىڭ بوكەي ورداسى اۋدانى ورتالىعىندا اقىن قايرات جۇماعاليەۆكە ەسكەرتكىش-بيۋست ورناتىلدى.
كورنەكتى اقىن, اۋدارماشى قايرات جۇماعاليەۆتىڭ تۋعان جەرى – باتىس قازاقستان وبلىسى وردا اۋدانىنا قاراستى جيەكقۇم اۋىل كەڭەسىنىڭ بەسقۇدىق اۋىلى. 1952 جىلى كاپۋستين يار اسكەري پوليگونىنىڭ اشىلۋىنا بايلانىستى نارىن قۇمىن جايلاعان حالىقتى قوزعاعان كەزدە بولاشاق اقىننىڭ وتباسى وڭتۇستىك قازاقستان وبلىسىنا كوشىرىلگەن.
تاعدىردىڭ جازۋىمەن تۋعان جەرىنەن جاستاي اجىراپ, اتاجۇرتتان الىستا وسسە دە قايرات اعا تۋعان جەرىن, نارىن قۇمىن ەرەكشە جاقسى كورەتىن. 2009 جىلى تۋعان جەرىنە ورالىپ, ءومىرىنىڭ سوڭىنا دەيىن «جايىق پرەسس» مەكەمەسىندە قىزمەت ەتتى. كاپۋستين يار اسكەري پوليگونىنىڭ جابىلۋىن, نارىن قۇمىنداعى شالعاي اۋىلدارعا تابيعي گاز, تازا سۋ, جول سەكىلدى وركەنيەت يگىلىكتەرىن جەتكىزۋ ماسەلەسىن ۇنەمى كوتەرىپ جۇرەتىن. اسىرەسە قايرات اعانىڭ كۇيقۇمارلىعى كەرەمەت ەدى. دومبىرانىڭ قوس ىشەگىنەن توگىلگەن كۇي ەستىلسە, ەكى كوزىن جۇمىپ الىپ, ىرعالا بالقىپ وتىراتىن بەينەسى كوز الدىمىزدا. اقىننىڭ تۋعان جەرىندەگى ەسكەرتكىش بەينەسى سايقىن اۋىلىنداعى كۇيشىلەر اللەياسىنا ورناتىلۋى دا تەگىن ەمەس شىعار.
– قادىرلى جەرلەستەر! الەمدەگى وسىنداي كۇردەلى پاندەميا كەزىندە ءوز جەرىنىڭ ءبىرتۋار ۇلىن ۇمىتپاعان ەلدەن اينالايىن! وسى شاراعا اتسالىسقان بارشا ازاماتتارعا وتە ريزامىز. ءبىزدىڭ وتباسىمىزدىڭ ايتار العىسىن سوزبەن جەتكىزۋ قيىن. اكەمىزدىڭ كىندىك قانى تامعان توپىراقتا وسىنداي ەسكەرتكىش تۇرعانى – ءبارىمىز ءۇشىن ۇلكەن قۋانىش, ادامنىڭ باۋىرى ەزىلىپ, تەبىرەنتەتىن جايت, – دەدى اقىننىڭ قىزى, وسى شاراعا ورال قالاسىنان ارنايى كەلگەن بەكزات بايبۋرينا.