فۋتبولدان قازاقستان ۇلتتىق قۇراماسى ۇلتتار ليگاسىنىڭ كەزەكتى تۋر ويىنى قارساڭىندا سىرت الاڭدا چەرنوگوريا قۇراماسىمەن جولداستىق كەزدەسۋ وتكىزىپ, تاريحتا تۇڭعىش رەت «قاراتاۋلىقتارمەن» تەڭ وينادى.
چەرنوگوريا قۇراماسىن قايدام, بۇل كەزدەۋدە جەرلەستەرىمىز ءۇشىن جەڭىس ەمەس, الداعى جاۋاپتى ويىن الدىندا ويىن تاجىريبەسى مەن فۋتبولشىلاردى ءبىر تەكسەرىپ الۋ اسا ماڭىزدى بولدى. ال جەڭىس – ەكىنشى ورىندا تۇردى. دەسە دە قارسىلاستان باسىم ءتۇسۋ كىمنىڭ تاقياسىنا تار كەلسىن!. بىراق باس باپكەر ءۇشىن ەڭ باستىسى – ماقساتتىڭ ورىندالعانى كەرەك ەدى. سول ءۇشىن دە ميحال بيلەك جاسىل الاڭعا نەگىزگى ەمەس, كومانداعا ەندى عانا شاقىرىلعان ارالاس قۇرامدى شىعاردى. ءسويتىپ كەيبىر فۋتبولشىلارعا ءوزىن كورسەتۋگە مۇمكىندىك, ال قۇرامنىڭ وزگە ويىنشىلارىنا دەمالىس بەردى. ونىسى دا دۇرىس شىعار, ويتكەنى ماڭىزدى ويىن الدىندا جاراقات الىپ قالۋى دا ابدەن مۇمكىن.
سونىمەن كەشەگى ويىندا بيلەك كىمدەردى سىناقتان وتكىزدى؟ ەڭ الدىمەن قاقپاشى – دميترو نەپوگودوۆ. چەح مامانى «استانانى» جاتتىقتىرعاندا نەپوگودوۆتى قاتارىنان ءۇش ويىندا قاقپانى سەنىپ تاپسىردى. الايدا ءۇش كەزدەسۋدە قاقپاسىنا 5 گول وتكىزىپ العان سوڭ, ونى قايتا قوسالقى قۇرامعا وتىرعىزىپ قويدى. ءتىپتى ۇلتتار ليگاسىنىڭ بىردە-ءبىر ويىنىندا الاڭعا شىعارعان جوق. سوندىقتان وسى ماتچتا «استانا» قاقپاشىسىنا ءوزىنىڭ نەگىزگى قۇرامدا ونەر كورسەتۋگە الەۋەتى تولىق جەتەتىنىن كورسەتۋگە مۇمكىندىك بەردى. جانە ول باس باپكەردىڭ سەنىم ۇدەسىنەن شىعا ءبىلدى دەپ ويلايمىز. سەبەبى, قاقپاسىنا گول وتكىزگەن جوق جانە گول سوعاتىن بىرنەشە ساتتە سەيۆ جاساپ, كومانداسىن جەڭىلىستەن قۇتقارىپ قالدى.
سونداي-اق ءبىر جىلدىق ۇزىلىستەن سوڭ قۇراماعا قايتا ورالعان قورعاۋشى يۋري لوگۆينەنكو, جارتىلاي قورعاۋشى اسلان داراباەۆ, شابۋىلشىلار توقتار جاڭعىلىشباي, الەكسەي ششەتكين جانە سەرگەي حيجنيچەنكو سەكىلدى فۋتبولشىلار ءبىرىنشى مينۋتتان باستاپ ونەر كورسەتتى. قورعاۋشىلار قاقپاعا گول وتكىزبەگەنىن ەسكەرسەك, ءتاپ-ءتاۋىر ويىن ورنەگىن كورسەتتى دەپ ايتا الامىز. شابۋىلشىلار گول سوقپاسا دا, بىرنەشە قاۋىپتى ءسات جاساي الدى. ءتىپتى ءبىرىنشى تايمنىڭ 15-مينۋتىندا سەرگەي حيجنيچەنكو گول سوققان بولاتىن, الايدا تورەشى گول ويىننان تىس جاعدايدا سوعىلدى دەپ ەسەپتەمەي تاستادى. سونىمەن قاتار ءبىرىنشى تايمدا مارات بىستروۆتىڭ دا گول سوعاتىن تاماشا ەكى مۇمكىندىگى بولعان. وكىنىشكە قاراي, ەكەۋىندە دە دوپتى قاقپاعا ەنگىزە المادى. جالپى ويىن دەڭگەيى تابلوداعى ەسەپكە ساي بولدى دەسەك, ارتىق ايتقاندىق ەمەس شىعار.
ەكى قۇراما بۇعان دەيىن جاسىل الاڭدا ءۇش رەت كەزدەسىپ, ۇشەۋىندە دە چەرنوگوريا قۇراماسى جەڭىسكە جەتكەن بولاتىن. ءتورتىنشى ويىندا قازاقستان قۇراماسى تەڭ ناتيجە كورسەتىپ, جەڭىلىس سەرياسىنا نۇكتە قويدى.
كەزدەسۋدەن كەيىن ميحال بيلەك ءباسپاسوز ءماسليحاتىندا چەرنوگوريامەن وتكەن جولداستىق كەزدەسۋدىڭ ناتيجەسى تۋرالى پىكىرىن ورتاعا سالىپ, شاكىرتتەرى وتە جاقسى ماتچ وتكىزگەنىن ايتتى. «بۇگىن ءتارتىپتى, ۇيىمشىل ءارى ساپالى ويىن كورسەتتىك. گول سوعاتىن بىرنەشە مۇمكىندىگىمىز بولعانىمەن, ونى جۇزەگە اسىرا المادىق. ءبىرىنشى تايم وتە جاقسى ءوتتى. ءبىزدىڭ ويىنشىلار كوپ پرەسسينگ جاساپ, دوپتى ءجيى تارتىپ الىپ, جىلدام شابۋىلدار جاسادى. ەكىنشى تايمدا قارسىلاس قىسىم جاساي باستادى. بىراق مەنىڭ ويىنشىلارىم تاباندىلىق تانىتتى. ءتورت كۇننەن كەيىن ءبىزدى البانيا قۇراماسىمەن ماڭىزدى ماتچ كۇتىپ تۇر. سودان كەيىن ليتۆالىقتارمەن ۇيدە وينايمىز. سوندىقتان بۇگىن كەيبىر فۋتبولشىلار ويناعان جوق», دەدى ول.
ەندى جەرلەستەرىمىز 15 قاراشادا سىرت الاڭدا البانيا قۇراماسىمەن, 18 قاراشادا ورتالىق ستاديوندا ليتۆا فۋتبولشىلارىمەن وينايدى. ايتا كەتەيىك, ءبىزدىڭ توپتاعى تۋرنير كەستەسىندە 7 ۇپايى بار بەلارۋس قۇراماسى ءبىرىنشى ورىندا كەلەدى. بەس-بەس ۇپايدان يەلەنگەن ليتۆا مەن البانيا ەكىنشى جانە ءۇشىنشى ورىندى ءبولىسىپ تۇر. ال قازاقستان قۇراماسى 4 ۇپايمەن توپتاعى سوڭعى ءتورتىنشى ورىندا قالىپ قويدى.