جۋىردا س.بايىشەۆ اتىنداعى وبلىستىق امبەباپ عىلىمي كىتاپحاناسىنىڭ ءماجىلىس زالىندا اقجايىقتىڭ «اق شاعالاسى» اتانعان اقىن, مەملەكەتتىك سىيلىقتىڭ لاۋرەاتى اقۇشتاپ باقتىگەرەەۆانىڭ جانە «دارىن» مەملەكەتتىك جاستار سىيلىعىنىڭ لاۋرەاتى, جاس اقىن ولجاس قاسىموۆتىڭ قاتىسۋىمەن «قالامگەرلەر الەمى» اتتى ادەبي كەش ءوتتى.
كەشتى اقىن, كىتاپحانا قىزمەتكەرى تالعات تىلەۋلەسوۆ جۇرگىزدى. شاراعا مادەنيەت قايراتكەرى ەركىن قۇرمانبەك, اقىن نۇرلىبەك قالاۋوۆ, اقتوبە وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ باسشىسى التىناي يۋنيسوۆا جانە كىتاپحانا قىزمەتكەرلەرى, پوەزيانى سۇيەتىن, اسەمدىككە جانى قۇمار جاستار قاتىستى.
اقىن اقۇشتاپ باقتىگەرەەۆا ءومىر مەكتەبىندە كەزدەسەتىن وزەكتى ماسەلەلەردى قوزعاپ, ولەڭسۇيەر قاۋىمدى ءبىر سەرپىلتىپ تاستادى. اسىرەسە بۇگىنگى انالاردىڭ ۇلت بولاشاعى بولىپ سانالاتىن قىز تاربيەسىنە ەرەكشە دەن قويىپ قاراۋىن ايتا وتىرىپ, الاڭداۋشىلىق ءبىلدىردى. اقىننىڭ ايتۋى بويىنشا قىز بالاسى وزىنە ءتان نازىكتىكتى, بيازىلىقتى, تازالىقتى ەشقاشان لايلاماۋى كەرەك. سوناۋ زاماننان كەلە جاتقان تەكتىلىك پەن قايسارلىقتى بويىنا جيناعان قازاق قىزدارىنىڭ ءىزىن جالعايتىن, ۇلتىمىزدىڭ قانىن ساقتاپ قالاتىن ناعىز «قازاق قىزى» دەگەن اتقا لايىق بولۋ كەرەكتىگىن جەتكىزدى. اقۇشتاپ باقتىگەرەەۆا ءوزىنىڭ اياۋلى اناسىنا دەگەن ساعىنىشىن ولەڭ جولدارىمەن جەتكىزە وتىرىپ, اسىل انالاردى قاستەرلەي بىلۋگە, جۇرەكتەرىنە سىزات تۇسىرمەۋگە شاقىردى. اقىن ادام ومىرىنە ازىق بولارلىق دۇنيەلەردى ايتا وتىرىپ, ءوز شىعارماشىلىعىنان سىرعا تولى ولەڭدەرىن وقىدى.
جاس اقىن ولجاس قاسىموۆ اقتوبە جەرىنە العاش رەت كەلگەنىندە ءدال وسىنداي ادەمى, اسەرلى كەشتە جولىققانىنا ريزاشىلىعىن بىلدىرە وتىرىپ, كورەرمەندەرگە ولەڭ جولدارىن تارتۋ ەتتى. ادەبي كەشكە جينالعان ولەڭدى ساعىنعان كورەرمەندەر ءۇشىن بۇل رۋحاني دەمالىس بولدى. كيەلى وردامىزدا وسىنداي شارالاردىڭ سانى ارتا ءتۇسسىن دەمەكپىز!
مارال جالعاسقىزى,
س.بايىشەۆ اتىنداعى اقتوبە وبلىستىق امبەباپ عىلىمي كىتاپحاناسىنىڭ قىزمەتكەرى