19-26 قاراشا ارالىعىندا الماتىدا كۇرەس تۇرلەرىنەن كەزەكتى قازاقستان چەمپيوناتى ۇيىمداستىرىلادى. گرەك-ريم كۇرەسىنەن ۇلتتىق قۇراما باس باپكەرى باقتيار بايسەيىتوۆتىڭ ايتۋىنشا, ەل بىرىنشىلىگىنە قۇراماداعى ۇزدىك سپورتشىلاردىڭ بارلىعى قاتىسادى.
ۇلتتىق وليمپيادا كوميتەتىنىڭ رەسمي سايتىنا بەرگەن سۇحباتىندا باس باپكەر الەم بىرىنشىلىگىنە قاتىسۋعا رۇقسات بەرىلگەن جاعدايدا ۇلتتىق قۇرامانىڭ بۇل سىنعا تاس-ءتۇيىن دايىن ەكەنىن ايتقان. «قازىرگى تاڭدا ۇلتتىق قۇراما مۇشەلەرى الماتى وبلىسى, ەڭبەكشىقازاق اۋدانىنداعى وليمپيادالىق دايارلاۋ ورتالىعىندا وقۋ-جاتتىعۋ جيىنىنا قاتىسىپ جاتىر. ەل بىرىنشىلىگىنە ۇلتتىق قۇراما ساپىنداعى بارلىق سپورتشى قاتىسادى. اتاپ ايتقاندا, ءوز سالماق دارەجەسىندە حالىقارالىق ارەنادا ەل نامىسىن قورعاپ جۇرگەن ۇزدىك بالۋانداردىڭ بارلىعى الماتى بوزكىلەمىنە شىعادى. قازاقستان چەمپيوناتى – الداعى ماۋسىمعا ۇلتتىق قۇرامانى جاساقتاۋعا تاپتىرماس دودا», دەيدى ب.بايسەيىتوۆ.