قىس الەگى – قار تازالاۋ

وبلىس بويىنشا قىس بويى قامقور­لىق­قا الىنىپ, قاداعالانىپ وتىراتىن جولداردىڭ جالپى ۇزىندىعى – 8 996 شاقىرىم. ونى ساقتاۋعا بيىل 943 ملن تەڭگە قاراستىرىلعان. سالىستىرۋ ءۇشىن ايتار بولساق, بۇل – 2018 جىلى بولىنگەن سومادان 1,6 ەسە ارتىق.

اقشا قارى سىقىرلاعان سولتۇستىكتىڭ تاس جولدارىنىڭ ەڭ قاۋىپتى جەرى – كوك­تاي­عاق. ۇستىندەگى قارىن سىپىرىپ تاس­تا­عاندا قالعان جۇقا قار كوپ كولىكتىڭ قىزۋىمەن كۇندىز ءجىبىپ, تۇندە قاتادى. ال ەرتەسىنە جارقىراعان كوك مۇز بولماسا دا كوگەرگەن تايعاق بولىپ تۇرادى. ول ۇلكەن جولداردا عانا ەمەس, قالا مەن اۋىلداردىڭ ىشىندەگى جاياۋ جولدار­دا دا قاۋىپتى. وسى كوكتايعاقتان تالاي ادام مەرتىگىپ جاتادى. مىنە, جولدار­دى ساقتاۋشىلار الدىمەن وسىعان قار­سى كۇرەسۋلەرى كەرەك. بۇگىنگى تاڭعا دە­يىن 3 900 توننا كوكتايعاققا قارسى قول­دا­نى­لا­تىن ماتەريالدار ۇيىلگەن ەكەن. بۇل – قۇم, تۇز ارالاسقان ۇيىندىلەر. وسىلار قاۋىپتى ايماقتاردا جولعا سەبىلەدى. تۇز ەرىگەن قاردى قاتىرمايدى.

سولتۇستىك قازاقستان وبلىسىندا قىس­قى جو­لدىڭ تاعى ءبىر قاۋپى – قارلى بوراندار. اشىق دالادا ونداي بوراندار كەيبىر جىلدارى توقتاپ قالعان ماشي­نا­لار­دىڭ ۇستىنەن دە ءجۇرىپ كەتەدى. ءبىزدىڭ وبلىستا ونداي ۋچاسكىلەر سانى –549. وسى­لاردىڭ ءبارىن جولشى كاسىپو­رىن­­دار عانا ەمەس, جەرگىلىكتى بيلىك, پاترۋلدىك پوليتسيا مەن تج قىزمەتتەرى باقىلاۋعا الادى. «مەن بارلىق اكىمدەر اۋىلدار اراسىنداعى جولداردىڭ اشىق بولۋىن قاتاڭ باقىلاۋعا الۋى كەرەك ەكەنىن ەسكەرتەمىن», دەدى وبلىس اكىمى قۇمار اقسا­قالوۆ جول ماسەلەسىنە ارنالعان وتى­رىستا.

قىزىلجار قالاسىندا بارلىعى 300 شا­قىرىمداي تاس جول بار. ولاردى ساق­تاۋ­عا قاجەتتى ارناۋلى تەحنيكالار سانى بيىل بىلتىرعىعا قاراعاندا 20%-عا ارت­قان.

مەردىگەر كاسىپورىندار كەيدە قار جي­نا­عاندى سىلتاۋ قىلىپ, بۋل­دو­زەر­لەرىن باس-كوز جوق جۇرگىزىپ, وتىرعىزىلعان اعاشتاردى, گازوندار مەن جول جيەگىندەگى بورديۋلەردى دە قيراتىپ جاتادى. ق.اقسا­قا­لوۆ قالا اكىمى ب.جۇمابەكوۆتى وسى جاعىنا دا مۇقيات بولۋدى ەسكەرتتى.

بيىل سولتۇستىكقازاقستاندىق قوعام­دىق بەلسەندىلەر توسەلگەن جولداردىڭ ساپاسىن تەكسەرۋگە ارنالعان قوعامدىق كوميسسيا قۇرعان بولاتىن. ول ءبىرشاما پايدالى جۇمىس ىستەپ, كەيبىر ساپاسىز توسەلگەن اسفالتتاردى قايتا توسەتكەن. «قىسقى جولدى ساقتاۋعا دا وسىنداي قو­عام­دىق باقىلاۋ كەرەك سياقتى. كوشە­لەر­دىڭ قاردان تازالانۋىن باقىلاۋ بويىنشا حالىققا كورسەتىپ وتىراتىن كارتا جاسالۋى كەرەك. سوندا حالىق كوممۋنالدىق قىزمەتتەردىڭ جۇمىسىن ءبىلىپ وتىراتىن بولادى», دەدى اكىم.

سونىمەن بىرگە ق.اقساقالوۆ حالىققا قانشا تەكشە مەتر قار شىعارىلعانى, قانشا توننا قۇم سەبىلگەنى تۋرالى اقپاراتتار ەمەس, كوشەنىڭ قاردان تازا­لان­عانى كەرەك دەدى. شىنىندا كوم­مۋ­نال­دىق قىزمەتتىڭ كەيبىر باسشىلارى وسىنداي كورسەتكىشتەردى العا تارتىپ, اقپارات بەرۋگە قۇمار. مۇندايدىڭ ەش­كىمگە دە كەرەگى جوق. حالىققا كەرەگى – ناتيجە, ياعني قاردان تازالانعان جول­دار مەن كوكتايعاققا قۇلاتپايتىن ما­تەريالداردىڭ سەبىلگەنى.

جينالىستا قاردى كوكتەمگە قال­دىر­ماي, قىس بويى تازالاپ تۇرۋ كەرەكتىگى دە شەگەلەنىپ ايتىلدى. ايتپەسە, كەيبىر جىلدارى قار تازالاۋشىلار كوشەگە قار­دى ءۇيىپ قويىپ, ونى الىسقا تاسۋدى كوك­تەمگە قالدىراتىن.

بيىل قول كۇشى مەن تەحنيكانىڭ ارتقانىنا قاراپ سولتۇستىكتە قار مەن بوراننىڭ كەسىرىنەن جامانات بولماس دەگەن ويدامىز. كوشەدەگى كوكتايعاق تا ەڭسەرىلۋگە ءتيىس.

سولتۇستىك قازاقستان وبلىسى