وتكەن جەكسەنبى كۇنى تۇنگى ساعات وندار شاماسىندا قىزىلجاردىڭ قالالىق ساياباعىندا 45 جاستاعى ازاماتتى اراقتى بىرگە ىشكەن بوتەلكەلەسى - 30 جاستاعى جىگىت سوققىعا جىعىپ, 7 مىڭ تەڭگە اقشاسىن تارتىپ اكەتكەن. اراق ءىشۋ بارىسىندا جاڭا تانىسقان ەكەۋىنىڭ اراسىندا جانجال تۋعان ەكەن, دەپ جازادى Egemen.kz
وسى قىلمىستى پەتروپاۆلدىڭ پوليتسيالارى ءىزىن سۋىتپاي اشىپ, توناۋشىنى قىسقا مەرزىم ىشىندە قولعا ءتۇسىردى. ول بۇرىن سوتتالعان 1990 جىلى تۋعان ادام بولىپ شىقتى. بۇل ىسكە بەينەباقىلاۋ كامەرالارىنىڭ كومەگى ءتيدى. توناۋشىنىڭ بەينەسى ونىڭ بىرىنە ءتۇسىپ قالعان ەكەن.
اتالعان فاكتى قك 191-بابى "توناۋ" بويىنشا تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. ۇرلانعان زات قايتارىلىپ, كۇدىكتى ۋاقىتشا ۇستاۋ وقشاۋلاعىشىنا قامالدى. ايتا كەتەتىنى, كۇدىكتى دە, جابىرلەنۋشى دە قوعامدىق ورىندا ماساڭ كۇيىندە بولعان, بۇل ارەكەتتەرى ءۇشىن ەكەۋى دە اكىمشىلىك جاۋاپكەرشىلىككە تارتىلاتىن بولادى.
"توناۋلار كوبىنە دالادا جاسالادى, ونىڭ جارتىسى - كوپپاتەرلى ۇيلەردىڭ اۋلالارىندا بولادى. ادەتتە ولار ۇيالى تەلەفوندارعا, سومكەلەر مەن امياندارعا جاسالادى. جىل باسىنان وبلىس ورتالىعى اۋماعىندا 47 توناۋ فاكتىسى تىركەلدى. اتالعان قىلمىس ءتۇرىن اشۋ 91% قۇرايدى", دەيدى پەتروپاۆل قالاسىنىڭ پب باستىعى, پوليتسيا پولكوۆنيگى جاندوس مۇقاتوۆ.
پەتروپاۆل