جەتىسۋلىق ستۋدەنتتەر پولشا ۋنيۆەرسيتەتىنىڭ ديپلومىن الدى

ماسەلەن, 2016 جىلدان بەرى ءبىلىم ورداسى قوس ديپلومدى وقىتۋ جۇيەسىنە قوسىلعان بولاتىن. وسى جىلدان باستاپ ءىلياس جانسۇگىروۆ اتىنداعى جەتىسۋ ۋنيۆەرسيتەتى مەن پولشانىڭ لينگۆيستيكا-تەحنيكالىق ۋنيۆەرسيتەتى ىنتىماقتاستىققا قول قويىپ, جەتىسۋلىق ستۋدەنتتەردىڭ ەكى جاقتى ءبىلىم الۋىنا جاعداي جاساعان ەدى. ناتيجەسىندە قوس ۋنيۆەرسيتەتتىڭ ديپلومىن الىپ شىققان جاس مامان سانى ءوسىپ وتىر. وتكەن 4 جىلدا 9 ستۋدەنت ىنتىماقتاستىق اياسىندا ديپلوم قورعاپ, قاجەتتى ماماندىق يەسى اتانعان ەكەن. بۇل ءداستۇر 2019-2020 وقۋ جىلىندا دا جالعاسىن تاپقان. جاقىندا تاعى بىرنەشە ستۋدەنت ەكى ۋنيۆەرسيتتىڭ ديپلومىنا يە بولدى.

- ءبىزدىڭ ۋنيۆەرسيتەت پەن پولشانىڭ وقۋ ورنى اراسىنداعى كەلىسىم ءوز جالعاسىن تاپتى. اتاپايتقاندا,  «قازاق ءتىلى جانە ادەبيەتى» ماماندىعىنىڭ ماگيسترانتتارى گالىموۆا اليما مەن قاجىبەكوۆا اقبوتا, «تاريح»  ماماندىعىنىڭ ماگيسترانتتارى ۆاليتوۆ سۋلتان مەن ابسەمەتوۆ ابدەل جانە  «قۇقىقتانۋ» ماماندىعىنىڭ ماگيسترانتى ءجۇنىس نۇرجان پولشا رەسپۋبليكاسىنداعى لينگۆيستيكا-تەحنيكالىق ۋنيۆەرسيتەتى مەن ءى.جانسۇگىروۆ اتىنداعى جەتىسۋ ۋنيۆەرسيتەتىندە 2 جىل كولەمىندە ءبىلىم الىپ شىقتى. ماگيسترانتتار قوس ديپلومدى ءبىلىم بەرۋ باعدارلاماسىنىڭ بارلىق تالاپتارى مەن ەرەجەلەرىن ساقتاي وتىرىپ, ەكى ماگيسترلىك ديسسەرتاتسيا جازىپ, ونى ءساتتى قورعادى. ولارعا ماۋسىم ايىندا ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ديپلومى بەرىلگەن, ال جاقىندا ەۋروپالىق ۇلگىدەگى ديپلومدار تۇلەكتەر قولىنا ءتيدى. وسىعان وراي, سالتاناتى جيىن ءوتىپ, ء ى.جانسۇگىروۆ اتىنداعى جەتىسۋ ۋنيۆەرسيتەتىنىڭ اكادەميالىق ماسەلەلەر جونىندەگى پرورەكتورى دانيار قالدياروۆ جاستاردى قۇتتىقتادى. ەكى ۋنيۆەرسيتەت اراسىنداعى ءوزارا ىنتىماقتاستىق جانە قوسديپلومدى ءبىلىم بەرۋ ءىسى الداعى ۋاقىتتا دا ءوز جالعاسىن تاپپاق, - دەيدى ۋنيۆەرسيتەتتىڭ ءباسپاسوز قىزمەتىنىڭ جەتەكشىسى بايان شايانباەۆا.

جالپى, ۋنيۆەرسيتەتتىڭ ءوز ستۋدەنتتەرىنە قولايلى ءبىلىم الۋ ءۇشىن جاعداي جاساپ وتىرعانىنا جاستار دا, اتا-انالار دا ءدان ريزا. اسىرەسە, جاتاقحانامەن قامتۋ ىسىندە ءبىلىم ورداسىنىڭ  تابىسى ءبىرشاما. بيىل ستۋدەنتتەرگە ارنالعان 288 ورىندىق كوپقاباتتى جاڭا جاتاقحانا عيماراتى پايدالانۋعا بەرىلدى. بۇل نىسان ەلباسى نۇرسۇلتان نازارباەۆتىڭ «بەس الەۋمەتتىك باستاماسىنىڭ» اياسىندا ىسكە قوسىلعان بولاتىن. جاتاقحانا قۇرىلىسى وتكەن جىلى قولعا الىنىپ, بۇل ماقساتقا وبلىستىق بيۋدجەتتەن 2,3 ملرد تەڭگە جۇمسالدى. سونىڭ ناتيجەسىندە اينالاسى ءبىر جىلدىڭ ىشىندە 13 قاباتتى, ساۋلەتى كەلىستى جاڭا جاتاقحانا بوي كوتەردى.

ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى ءۇشىن بەرىلىپ وتىرعان بۇل نىسان بىلىمگەرلەردىڭ ءومىر ءسۇرۋ جاعدايىن جاقسارتىپ, ءبىلىم ساپاسىن ارتتىراتىنى ءسوزسىز. قازىر مۇندا «اينالايىن» بالالار ءۇيىنىڭ تاربيەلەنۋشىلەرى اراسىنان شىققان ستۋدەنتتەر مەن ينتەرنەت جىلدامدىعى باياۋ شالعاي ەلدى مەكەندەردەن كەلگەن 13 ءبىلىم الۋشى جاس تۇرىپ جاتىر ەكەن.

الماتى وبلىسى