ەلىمىزدەگى «بىرلىك» ساياسي پارتياسىنىڭ اتاۋى وزگەرتىلدى. بۇل شەشىم كەشە نۇر-سۇلتان قالاسىندا وتكەن ساياسي كەڭەستىڭ وتىرىسىندا قابىلداندى. وسىلايشا, كەڭەستىڭ قورىتىندىسىنا سايكەس «بىرلىك» پارتياسى بۇدان بىلاي «ادال» ساياسي پارتياسى دەپ اتالادى.
پارتيا توراعاسى سەرىك سۇلتانعاليدىڭ ايتۋىنشا, «بىرلىك» پارتياسى باسقارۋ ورگاندارىنا عانا ەمەس, مازمۇنىنا دا اسەر ەتەتىن قايتا جاڭعىرۋعا دايىن.
– ءبىز پارتيا اتاۋىن وزگەرتۋ ماسەلەسىنە (رەبرەندينگ) قاتىستى زەرتتەۋ جۇرگىزدىك. بۇل زەرتتەۋدى كاسىبي الەۋمەتتانۋشىلار جۇرگىزىپ, ولار اتاۋدىڭ 10-عا جۋىق جاڭا نۇسقاسىن قاراستىردى. تالداۋ ناتيجەسىندە اتاۋدىڭ «ادال» نۇسقاسى كوپ قولداۋعا يە بولدى. مۇنى الەۋمەتتانۋشى ساراپشىلار تۇرعىنداردىڭ جاڭاشىلدىققا, ادىلەتتىلىككە دەگەن سۇرانىسىمەن ءتۇسىندىرىپ وتىر. سولاي بولا تۇرا, ادامدار ادىلەتتىلىك ءسوزىنىڭ اياسىنا كوپ دۇنيەنى سىيدىراتىنى بايقالادى. ونى سىبايلاس جەمقورلىققا قارسى كۇرەستەن باستاپ, شەشىمدەر قابىلداۋداعى اشىقتىقپەن اياقتاۋعا بولادى, – دەدى پارتيا توراعاسى.
پارتيا اتاۋىن وزگەرتۋ تۋرالى ۇسىنىس ساياسي كەڭەس مۇشەلەرىنىڭ داۋىس بەرۋىنە شىعارىلىپ, ناتيجەسىندە ءبىراۋىزدان «ادال» دەپ وزگەرتۋ تۋرالى شەشىم قابىلداندى.
وتىرىس بارىسىندا پارتيانىڭ سايلاۋعا قاتىسۋعا دايىندىعى تۋرالى ماسەلە تالقىلانىپ, سايلاۋالدى ناۋقاننىڭ 7 باعىتى ۇسىنىلدى. بۇل باعىتتاردىڭ ىشىندە تۇرعىنداردىڭ كىرىسىن ارتتىرۋ, ادىلەتتى مەملەكەت قالىپتاستىرۋ, ءبىلىم بەرۋ مەن ادامي كاپيتالدى, ايماقتار مەن اگروونەركاسىپتىك كەشەندى دامىتۋ, جاستارعا جاعداي جاساۋ جانە سىبايلاس جەمقورلىقپەن كۇرەسۋ ماسەلەلەرى بار. ناۋقاننىڭ سوڭعى نۇسقاسى 16 قاراشادا سايلاۋ الدىنداعى سەزدە بەكىتىلەدى.
سەرىك سۇلتانعالي كۇن تارتىبىندەگى سايلاۋالدى ماسەلەلەردەن بولەك, ساياسي كەڭەسكە ەنگەن پارتيانىڭ 9 جاڭا مۇشەسىن تانىستىردى. ولاردىڭ قاتارىندا «اتامەكەن» ۇكپ باسقارما مۇشەسى ەلدار جۇماعازيەۆ, «شوپان اتا» ۇلتتىق قوي وسىرۋشىلەر قاۋىمداستىعىنىڭ توراعاسى الماسبەك سادىرباەۆ, تاجىريبەشىل ەكولوگتەر قاۋىمداستىعىنىڭ توراعاسى لاۋرا ماليكوۆا, «اتامەكەن» ۇكپ باسقارما توراعاسىنىڭ ورىنباسارى ولجاس ورداباەۆ, الەم چەمپيونى, قوعام قايراتكەرى ارداق نازاروۆ, تەلەجۋرناليست ماقسات تولىقباي, تەلەجۋرناليست, الەۋمەتتىك جوبالاردىڭ اۆتورى داۋلەت مۇقاەۆ, قوعام قايراتكەرى يگور شاتسكي, «ادال» پارتياسى فيليالىنىڭ باسشىسى مۇرات قوجامقۇلوۆ بار.
– قازىر ءبىز ءماجىلىس پەن ءماسليحاتتار ءۇشىن پارتيالىق تىزىمدەردى قالىپتاستىرۋدامىز. قورىتىندى بويىنشا ايەلدەر مەن جاستار ءۇشىن 30 پايىزدىق كۆوتا ساقتالادى. 30 قىركۇيەكتە وتكەن سەزدە ءوز كۇش-جىگەرىمىز, تاجىريبەمىز بەن كوزقاراسىمىز بار ەكەنىن ايتقان بولاتىنبىز. ءوز ءسوزىمدى, پارتيانىڭ جاڭارۋىن راستايمىن. جاڭا قۇرىلىمنىڭ ەنگىزىلۋى ءبىزدى ودان ءارى نىعايتا تۇسەدى. بۇگىن ءبىزدىڭ ساياسي كەڭەسىمىزگە ءوز تاجىريبەسىمەن, بىلىمىمەن بولىسە الاتىن ءتۇرلى سالاداعى جاڭا تۇلعالار, قوعام قايراتكەرلەرى ەندى. ءبىز سايلاۋعا قاتىسۋعا دايىندالىپ جاتىرمىز, ءتيىستى يدەولوگيالىق, تالداۋ جانە اقپاراتتىق-ءتۇسىندىرۋ جۇمىستارى باستالدى, – دەدى س.سۇلتانعالي.
وتىرىس سوڭىندا «ادال» پارتياسى مەن ەكولوگتەر قاۋىمداستىعى اراسىندا ىنتىماقتاستىق تۋرالى مەموراندۋمعا قول قويىلدى. قۇجاتتىڭ نەگىزگى ماقساتى – قازاقستانداعى قورشاعان ورتانىڭ ساپاسىن جاقسارتۋداعى ءوزارا ءىس-قيمىلدى كەڭەيتۋ, تاراپتاردىڭ ىنتىماقتاستىعىن ارتتىرۋ سانالادى. پارتيا مەن قاۋىمداستىق ەلىمىزدىڭ ەكولوگيالىق زاڭناماسىن جەتىلدىرۋ جونىندە بىرلەسكەن ۇسىنىستار ازىرلەيدى. سونداي-اق قورشاعان ورتانىڭ, ەكولوگيالىق زەرتتەۋلەر مەن ەكولوگيالىق مادەنيەتتىڭ ساپاسىن جاقسارتۋعا باعىتتالعان ءىس-شارالاردى جۇرگىزەدى.