قۇرلىقتىق حوككەي ليگاسىنىڭ (قحل) الدىڭعى جىلعى جانە بىلتىرعى ماۋسىمىن ءساتتى وتكىزىپ, جانكۇيەرلەردىڭ قوشەمەتىنە بولەنگەن ەلوردانىڭ «بارىسى» بيىلعى بىرىنشىلىكتە سۇرەڭسىز ويىن كورسەتۋدە. 2019/2020 جىلعى ماۋسىمنىڭ شىعىس كونفەرەنتسياسىندا ەكى مارتە ەكىنشى ورىندى يەلەنگەن جەرلەستەرىمىز پلەي-وفف كەزەڭىندە دە جارقىن ويىندارمەن كوزگە تۇسكەن-ءدى.
ماسەلەن, بىلتىر گاگارين كۋبوگى جولىنداعى باسەكەدە العاشقى كەزەڭدە ماگنيتوگورسكىنىڭ «مەتاللۋرگ» كلۋبىن 4:1 ەسەبىمەن جەڭىپ, جارىس جولىنان شىعارىپ جىبەرگەن-ءدى. ەكىنشى اينالىمدا ءسىبىردىڭ «سيبير» كومانداسىمەن باق سىناۋى كەرەك بولاتىن. الايدا كوروناۆيرۋس پاندەمياسىنا بايلانىستى بۇكىل جارىستار توقتاتىلىپ, قحل تاريحىندا ءبىرىنشى رەت جەڭىمپاز كوماندا انىقتالعان جوق.
وكىنىشكە قاراي, بيىل «بارىستان» بىلتىرعىداي قارقىندى بايقاي الماي وتىرمىز. جەرلەستەرىمىزدىڭ بيىلعى تۋرنير كەستەسىندە جوعارى ورىننان كورىنۋى بىلاي تۇرسىن, ءتىپتى ۇزدىك 8 كلۋبتىڭ قاتارىنا ىلىنە الماي قالاما دەگەن كۇدىك باسىم بولىپ تۇر. بىراق سول كۇدىكتى «بارىستىڭ» كەيىنگى ەكى جەڭىسى از بولسا دا سەيىلتكەندەي. ايتپەسە جەڭىلىستەن كوز اشپاي كەلە جاتقان كوماندا ءوز ويىنىن ەندى تاپقانداي. ەلوردادا وتكەن العاشقى باسەكەدە «بارىس» قىتايدىڭ «كۋنلۋن» كومانداسىنان 2:1 ەسەبىمەن باسىم تۇسسە, كەيىننەن ريگانىڭ «ديناموسىنىڭ» قاقپاسىنا جاۋاپسىز ءۇش شايبا سوقتى.
بيىلعى ماۋسىمنىڭ ساتسىزدىگىنە ماماندار ءارتۇرلى بولجام جاساپ جاتىر. ماسەلەن, ءبىرى بىلتىر كوماندانى ورگە سۇيرەگەن بىرقاتار حوككەيشىنىڭ كوماندادان كەتكەنى جانە ولاردىڭ ورنىن باساتىن لايىقتى ويىنشىلاردى الماعاننىڭ زاردابىن تارتىپ جاتىر دەيدى. ءتىپتى ەكس-باس باپكەر اندرەي سكابەلكانىڭ دا كوماندادان كەتۋى «بارىستىڭ» ويىنىنا كەرى اسەرىن تيگىزگەنى دە جانكۇيەرلەر اراسىندا ايتىلۋدا. سونداي-اق كەي ماماندار پاندەمياعا بايلانىستى كوماندانىڭ دايىندىعى از بولعانىن دا العا تارتىپ جاتىر.
ماۋسىم باستالعالى بەرى «بارىس» شىعىس كونفەرەنتسياسىندا بۇگىنگە دەيىن 18 كەزدەسۋ وتكىزىپ ۇلگەردى. قازىرگى كەزدە 20 ۇپايمەن 10-ورىندا كەلە جاتىر. يۋري ميحايليس شاكىرتتەرى ونىڭ ىشىندە 9 ماتچتى ءوز ايدىنىندا وتكىزگەن, 9 ويىندا قوناققا بارعان. قازاقستان كومانداسى وسى ارالىقتا قارسىلاس قاقپاسىنا 41 شايبا سوعىپ, ءوز قاقپاسىنا 46 شايبا وتكىزىپ العان. ارينە, سالىستىرمالى تۇردە الىپ قارايتىن بولساق, بۇل جاقسى ناتيجە ەمەس. شايبا سوعۋ كورسەتكىشى بويىنشا ورتاشا ەسەپپەن ءار ويىنعا 2 شايبادان كەلەدى. ەلورداداعى 9 ويىندا قارسىلاستار قاقپاسىن 22 رەت نىساناعا السا ( ءبىر ويىندا – 2,44), وزدەرى 23 گول (2,55) جىبەرگەن. سىرتتاعى ماتچتارىندا شابۋىلشىلاردىڭ دا, قورعاۋشىلاردىڭ دا ناتيجەلەرى كوڭىل كونشىتپەيدى. 9 ويىندا 19 شايبا سوعىپ (1,1), وزدەرى 23 شايبا (2,55) وتكىزىپ العان.
27 جاستاعى قورعاۋشى داررەن ديتس – «بارىستىڭ» كورىنبەيتىن كوشباسشىسى. قازاقستان ازاماتتىعىن العان كانادالىق حوككەيشى ءوزىنىڭ شەبىندەگى ويىنشىلاردان ناتيجەلىگىمەن الدا تۇر. ءتىپتى كوپتەگەن شابۋىلشى ديتس سەكىلدى كورسەتكىشىمەن ماقتانا المايدى. ول 17 ويىندا قارسىلاستار قاقپاسىنا 8 شايبا سوعىپ, 2 رەت ارىپتەستەرىنىڭ كوزگە تۇسۋىنە جاعداي جاساعان. پايدالىلىق كوەفيتسيەنتى جاعىنان ديتس تەك «بارىستاعى» عانا ەمەس, ليگاداعى ۇزدىكتەردىڭ ءبىرى.
داررەن قورعاۋشى-بومبارديرلەر اراسىندا 10 ۇپايمەن ەكىنشى ورىندا كەلەدى. ۇزدىكتەر كوشىن 16 (8-8) ۇپايمەن ميككوتەك لەحتونەن («يوكەريت») باستاپ تۇر. سونداي-اق ديتس – «بارىس» ساپىندا ايدىندا ەڭ كوپ ۋاقىت وتكىزەتىن حوككەيشى. ورتاشا ەسەپپەن ءبىر ماتچتا 24 مينۋتتاي ايدىندا بولادى.
كوماندالىق ويىندا شابۋىلشىلارعا قاراعاندا, قورعاۋشىنىڭ گول سوعاتىنى ماقتانارلىق ناتيجە ەمەس. بىراق كوماندانى العا سۇيرەيدى دەگەن شابۋىلشى لەگيونەرلەر جارىتپاي جاتقاندا, قورعاۋشىلاردىڭ شايبا سوعۋى دا زاڭدىلىق شىعار. ماسەلەن, بيىل عانا «بارىستىڭ» جەيدەسىن كيگەن شۆەتسيالىق ياكوب ليليا مۇزايدىنعا 17 مارتە شىعىپ, قارسىلاستار قاقپاسىن نەبارى 5 مارتە ءدال كوزدەگەن. سونداي-اق بىلتىر «اك بارس» قۇرامىندا ونەر كورسەتىپ, بيىل «بارىسقا» قايتا ورالعان كانادالىق شابۋىلشى مەتت فرەتتين 18 ويىندا ەكى شايبا سوققان. ول ەكى گولىن دا كەيىنگى ەكى ويىندا سوققانىن ەسكەرسەك, كانادالىقتىڭ ويىنى جۇرە باستاعان سىڭايلى. قازىرگى تاڭدا كومانداداعى شابۋىلشىلاردىڭ اراسىندا ەڭ ناتيجەلى ويىن كورسەتىپ كەلە جاتقان – نيكيتا ميحايليس. 18 ويىننىڭ بارلىعىندا مۇزايدىنعا شىققان جەرلەسىمىز قارسىلاس كوماندالاردىڭ قاقپاسىن 7 مارتە ءدال كوزدەگەن. سونىمەن قاتار ەكى رەت ارىپتەستەرىنە ناتيجەلى پاس اسىرعان. كەيىنگى ورىنداردا رومان ستارچەنكو مەن كەرتيس ۆولك تۇر. ەكەۋى دە ءتورت شايبا سوققان.
باس باپكەر يۋري ءميحايليستىڭ قورعاۋشىلارعا دا, شابۋىلشىلارعا دا كوڭىلى تولمايتىنى انىق. سوندىقتان ول جاڭا جىلعا دەيىن كوماندا قۇرامىنىڭ تامىرىنا قان جۇگىرتۋ ءۇشىن ءبىر شابۋىلشى جانە ءبىر قورعاۋشى الدىرتتى. «بارىس» كلۋبىنىڭ ءباسپاسوز قىزمەتى 30 قازاندا 29 جاستاعى كانادالىق شابۋىلشى فيليپ ۆارونە مەن 2 قاراشادا 25 جاستاعى تاعى ءبىر كانادالىق قورعاۋشى ديللون حەتەرينگتونمەن كەلىسىمشارت جاسالعانىن حابارلادى. قازىرشە ەكى ويىنشى دا پاندەمياعا بايلانىستى قازاقستانعا كەلە الماي وتىر.
«بارىس» كومانداسى الداعى بەس ويىننىڭ ۇشەۋىن سىرت ايدىندا, ەكەۋىن «بارىس ارەنادا» وتكىزەدى. قازاقستاندا وتكەن ويىندارعا قاراعاندا, «بارىس» ءۇشىن سىرتتاعى ويىن قيىن بولعالى تۇر. ماسەلەن, جەكسەنبى كۇنى جەرلەستەرىمىز باتىس كونفەرەنتسياسىندا ءتورتىنشى ورىندا تۇرعان چەرەپوۆەتسكىنىڭ «سەۆەرستالىمەن» كەزدەسسە, ەكى كۇننەن كەيىن ءۇشىنشى ورىنداعى ءياروسلاۆلدىڭ «لوكوموتيۆ» كلۋبىمەن باق سىنايدى. ال 12 قاراشادا نيجنەكامسكىدە «نەفتەحيميكتىڭ» قوناعى بولادى. ەگەر وسى ءۇش ويىننىڭ ەكەۋىندە جەڭىسكە جەتىپ, ەلورادادا «دينامو» مينسك پەن ماگنيتوگورسكىنىڭ «مەتاللۋرگ» كلۋبتارىنان ۇپاي الاتىن بولسا, جەرلەستەرىمىز ۇزدىك سەگىزدىكتىڭ قاتارىنا ەنەتىنى ءسوزسىز.