سقو تايىنشا اۋدانى پوليتسيا ءبولىمىنىڭ كەزەكشى قىزمەتىنە كيروۆ اۋىلىنىڭ سانيتارلىق بەكەتىندە Mercedes اۆتوماشيناسى توقتاتىلعاندا وندا وسىمدىك تەكتەس كەپتىرىلگەن زات سالىنعان پاكەت بارى انىقتالعانى جەتكىزىلگەن.
مۇنىڭ ەسىرتكىلىك زات ەكەنىن سەزگەن بەكەتتەگى قىزمەتكەرلەر پوليتسيا بولىمىنە حابارلاعان ەكەن. كولىك جۇرگىزۋشى كيروۆ اۋىلىنىڭ 50 جاستاعى تۇرعىنى پاكەتكە سالىنعان جابايى قاراسورانى تاسىمالداعان, دەپ حابارلايدى Egemen.kz.
سوت-حيميالىق ساراپتامانىڭ ناتيجەسىنە قاراعاندا پاكەتتەگى زات - سالماعى 680 گرامم بولاتىن كەپتىرىلگەن ماريحۋانا بولىپ شىقتى.
تايىنشا اۋدانى پوليتسيا ءبولىمىنىڭ باستىعى, پوليتسيا پودپولكوۆنيگى نۇرلىجان اقتانوۆتىڭ ايتۋىنا قاراعاندا وسى فاكتى بويىنشا قىلمىستىق كودەكستىڭ 296-بابىنىڭ 2-بولىگىمەن قىلمىستىق ءىس قوزعالعان. ۇستالعان ادامعا قاتىستى مىندەتتى كەلۋ تۇرىندەگى بۇلتارتپاۋ شاراسى تاڭدالدى.
سولتۇستىك قازاقستان وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ مالىمەتىنشە, جىل باسىنان بەرى وبلىس پوليتسەيلەرى زاڭسىز اينالىمنان 398 كەلىدەن استام ءتۇرلى ەسىرتكى زاتتارىن, ونىڭ ىشىندە 349 كەلى ماريحۋانا تاركىلەگەن.