فۋتبولدان قازاقستان ۇلتتىق قۇراماسى 15 جانە 18 قاراشا كۇندەرى بيىلعى ۇلتتار ليگاسىنداعى سوڭعى ماتچتارىن وتكىزەدى. 15 قاراشادا سىرت الاڭدا البانيامەن ويناسا, 18 قاراشادا الماتىنىڭ ورتالىق ستاديونىندا ليتۆا قۇراماسىن قابىلدايدى.
ميحال بيلەك شاكىرتتەرى البانيا فۋتبولشىلارىمەن وتەتىن ويىننىڭ الدىندا 11 قاراشا پودگوريتسادا چەرنوگوريامەن جولداستىق ماتچ وتكىزەدى. كۇنى كەشە ۇلتتىق قۇرامانىڭ باس باپكەرى الداعى ءۇش ويىنعا شاقىرتىلعان فۋتبولشىلاردىڭ ءتىزىمىن جاريالادى.
ۇلتتىق قۇراماعا ءوز كوماندالارىنىڭ كەيىنگى ويىندارىندا جاقسى ناتيجەمەن كوزگە ءتۇسىپ, باس باپكەردىڭ كوڭىلىنەن شىققان فۋتبولشىلاردىڭ شاقىرتۋ الاتىنى بەلگىلى. ماسەلەن, بۇل ايدا م.بيلەك ءۇش جاڭا فۋتبولشىنى جاسىل الاڭدا سىناپ كورۋدى ءجون دەپ شەشكەن ەكەن. اتاپ ايتار بولساق, ولار – قاقپاشى مۇحاممەدجان سەيسەن, قورعاۋشى يۋري لوگۆينەنكو جانە جارتىلاي قورعاۋشى سەرىكجان مۇجىقوۆ. كەيىنگى ەكى فۋتبولشى بۇعان دەيىن دە ۇلتتىق قۇراما ساپىندا تالاي حالىقارالىق باسەكەلەردە ويناعان تاجىريبەلى جىگىتتەر. ال «تاراز كلۋبىنىڭ قاقپاشىسى مۇحاممەدجان سەيسەن بيىل ءبىرىنشى رەت ەرەسەكتەر اراسىنداعى ۇلتتىق قۇرامانىڭ جەيدەسىن كيمەك. ول بۇعان دەيىن قازاقستان جاستار قۇراماسىنىڭ (21 جاس) كاپيتانى ءارى نەگىزگى قاقپاشىسى بولىپ كەلگەن. جاس ەرەكشەلىگىنە بايلانىستى كەلەسى جىلدان باستاپ جاستار قۇراماسىندا ويناي المايتىندىقتان, بيلەك ونى ەرتە باستان ەرەسەكتەر دۋىنا قوسقاندى قۇپ كورىپتى.
ال جاراقاتىنان ايىعىپ, «استانانىڭ» نەگىزگى قۇرامىنا قايتا ورالعان قورعاۋشى يۋ.لوگۆينەنكو مەن «توبىلدىڭ» جارتىلاي قورعاۋشىسى س.مۇجىقوۆ ۇلتتار ليگاسىنىڭ قىركۇيەك جانە قازان ايلارىنداعى ويىندارىنا شاقىرىلماي, رەزەرۆتە قالىپ قويعان بولاتىن. ەندى مىنە, ەكەۋى دە قايتادان ۇلتتىق قۇراماعا ورالىپ وتىر.
قاقپاشىلار: ستاس پوكاتيلوۆ («قايرات»), دميتري نەپوگودوۆ («استانا»), مۇحاممەدجان سەيسەن («تاراز»).
قورعاۋشىلار: عافۋرجان سۇيىمباەۆ, نۇرالى ءالىپ (ەكەۋى دە – «قايرات»), ابزال بەيسەبەكوۆ, يۋري لوگۆينەنكو (ەكەۋى دە – «استانا»), مارات بىستروۆ («احمات», رەسەي), يان ۆوروگوۆسكي («بەەرسحوت», بەلگيا), سەرگەي مالىي, تەمىرلان ەرلانوۆ (ەكەۋى دە – «توبىل»), الەكساندر ماروچكين («قايسار»), ولجاس كەرىمجانوۆ («جەتىسۋ»), تيمۋر دوسماعامبەتوۆ («ورداباسى»).
جارتىلاي قورعاۋشىلار: باۋىرجان يسلامحان ء(«ال-اين», ءباا), باحتيەر زاينۋتدينوۆ (تسسكا, رەسەي), يسلامبەك قۋات («حيمكي», رەسەي), ۆلاديسلاۆ ۆاسيلەۆ («رۋح», بەلارۋس), ايبول ابىكەن («قايرات»), اسحات تاعىبەرگەن, دۋمان نارزىلداەۆ (ەكەۋى دە – «قايسار»), سەرىكجان مۇجىقوۆ («توبىل»).
شابۋىلشىلار: ابات ايىمبەتوۆ («قايرات»), الەكسەي ششيوتكين («استانا»), ماكسيم فەدين («قايسار»), سەرگەي حيجنيچەنكو («ورداباسى»).
وتكەن ايدا نەگىزگى قۇرامعا شاقىرتىلعان قاقپاشى ۆلاديمير پلوتنيكوۆ («ورداباسى») بۇل جولى رەزەرۆكە ءتۇسىپ قالعان. سونداي-اق الدىڭعى جىلدارى ۇلتتىق قۇرامانىڭ نەگىزگى فۋتبولشىلارى سانالعان دميتري شومكو («استانا»), يۋري پەرتسۋح («استانا»), ازات نۇرعاليەۆ («توبىل»), ەركەبۇلان تۇڭعىشباەۆ («قايرات»), ايبار جاقسىلىقوۆ («جەتىسۋ»), توقتار جاڭعىلىشباي («ورداباسى»), رومان مۇرتازاەۆ, ورالحان ومىرتاەۆ (ەكەۋى دە – «توبىل») سەكىلدى فۋتبولشىلار دا رەزەرۆتە قالىپ قويدى. دەسە دە بۇل ويىنشىلار كەز كەلگەن ۋاقىتتا نەگىزگى قۇرامنىڭ جىگىتتەرى جاراقات الىپ قاتاردان شىعىپ قالسا, ولاردىڭ ورنىنا قۇراماعا شاقىرتۋ الادى.
ايتا كەتەيىك, ۇلتتار ليگاسىنىڭ س ديۆيزيونىندا باق سىنايتىن قازاقستان ۇلتتىق قۇراماسى ءتورت تۋردان كەيىن توپتا ءتورتىنشى ورىندا كەلە جاتىر.