اتىراۋدا Suleimen Promotions كومپانياسىنىڭ ۇيىمداستىرۋىمەن وتكەن كاسىپقوي بوكس كەشىندە اۋەسقوي بوكستان قازاقستان ۇلتتىق قۇراماسىنىڭ مۇشەلەرى بەكزات نۇرداۋلەتوۆ پەن ابىلايحان ءجۇسىپوۆ ونەر كورسەتىپ, قارسىلاستارىن ايقىن جەڭدى.
بوكس كەشىنىڭ شىمىلدىعىن 2019 جىلعى الەم چەمپيونى بەكزات نۇرداۋلەتوۆ پەن 28 جاستاعى تانزانيالىق يبراگيم ماوكولا اشىپ بەردى. كاسىپقوي بوكستا 24 جەكپە-جەك وتكىزگەن ماوكولا ونىڭ 14-ىندە جەڭىسكە جەتىپ, توعىزىندا قارسىلاسىنا جول بەرگەن. ءبىر كەزدەسۋىندە تەڭ تۇسكەن. اسا تاجىريبەلى بوكسشى دەپ سانالعان تانزانيالىق 22 جاستاعى وتانداسىمىزعا تەك ەكى راۋندقا شىداپ بەردى. نۇرداۋلەتوۆ ەكى راۋندتا دا قارسىلاسىن ءبىر رەتتەن نوكداۋنعا ءتۇسىرىپ, ەكىنشى راۋندتىڭ سوڭىندا اۋىر سوققىسىمەن سۇلاتىپ سالدى.
سونداي-اق وسى بوكس كەشىندە باق سىناعان الەم چەمپيوناتىنىڭ ەكى دۇركىن قولا جۇلدەگەرى ابىلايحان ءجۇسىپوۆ التى راۋند قورىتىندىسى بويىنشا تانزانيالىق مەشاك مۆاكەنۆانى تىزە بۇكتىردى. ايتا كەتەلىك, توكيو وليمپياداسىنا دايىندالۋ ماقساتىندا باپكەرلەر ءجۇسىپوۆ پەن نۇرداۋلەتوۆتىڭ كاسىبي بوكستا باق سىناۋىنا مۇمكىندىك بەرگەن بولاتىن.