شىعىس قازاقستان وبلىسىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ وكىلدەرى سەمەيدەگى پتر-تەست زەرتحاناداعى كەزەككە قاتىستى تۇسىنىكتەمە بەردى, دەپ حابارلايدى Egemen.kz
ۆەدومستۆو وكىلدەرىنىڭ ايتۋىنشا, كەزەككە قاتىستى ماسەلە شەشىمىن تاپقان كورىنەدى.
"الەۋمەتتىك جەلىلەردە, مەسسەندجەرلەردە وسكەمەن جانە سەمەي قالالارىنىڭ تۇرعىندارى زەرتحانالاردا ۋاقىتىلى پتر-تەست تاپسىرا الماعانى تۋرالى حابار تارادى. 2020 جىلدىڭ 2 قاراشاسىندا ساعات 12:00-گە دەيىن وسىنداي جاعدايدىڭ بولعانى راس. شىعىس قازاقستان وبلىسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى بۇل پروبلەمانى رەتتەپ, كەزەككە قاتىستى ماسەلەنى شەشتى", دەيدى دەپارتامەنت وكىلدەرى.
3 قاراشادان باستاپ قوسىمشا ەكى زەرتحانا اشىلادى. جالپى شىعىس قازاقستان وبلىسىندا 10 كلينيكا زەرتتەۋ جۇرگىزەدى.
"وبلىس بويىنشا 298 547 زەرتتەۋ جۇرگىزىلدى. ورتا ەسەپپەن كۇنىنە 2000-2200 زەرتتەۋ جاسالادى", دەيدى ۇيىم وكىلدەرى.
ايتا كەتەيىك, بۇگىن سەمەيدەگى پتر-تەست زەرتحاناسىنىڭ الدىندا ۇزىن-سونار كەزەك پايدا بولعانى تۋرالى حابارلاندى. زەرتحانالارداعى جاعداي كولىكتەگى باس مەملەكەتتىك سانيتار دارىگەردىڭ قاۋلىسى شىققاننان كەيىن باستالعان كورىنەدى. 2 قاراشادان باستاپ شىعىس قازاقستاندىقتارعا جولاۋشىلار پويىزى مەن ۇشاققا پتر-تەستىنىڭ ناتيجەسى بولماسا, وڭىردەن شىعۋعا تىيىم سالىنعان.