ماقسات-مۇرات قوس قولتىعىنان قوس پەرىشتەدەي دەمەپ, جەبەپ العا ۇمتىلدىرۋ ءۇشىن دە ادامعا ايالى ارمان كەرەك ەكەن. ءبىرىنشى توپتاعى مۇگەدەك ناتاليا كۋرديۋكوۆانى دا بيىكتەرگە باستاپ كەلە جاتقان, ۇلى ومىرگە دەگەن سۇيىسپەنشىلىگىن ءار ءسات سايىن ەسەلەپ, دەم بەرىپ كەلە جاتقان ءدال وسىنداي ءبىر نازىك سەزىم.
قارعا ادىم جەر مۇڭ بولىپ قالار دەپ كىم ويلاعان. تاڭى الاۋلاپ اتىپ, ءتۇنى ماناۋراپ باتىپ, بولاشاققا دەگەن سان الۋان جوسپار قۇرىپ, تالاي بيىكتەن كورىنۋگە دامەلى بولىپ جۇرگەن شاعى ەدى. 1985 جىلى ومبى قالاسىنداعى تەمىر جول كولىگى ينجەنەرلەرىن دايىندايتىن ينستيتۋتتى بىتىرگەن. ەڭبەك جولىن ەندى باستاپ, جاستىق جالىنمەن اپىرىپ-جاپىرىپ جۇمىس ىستەۋگە كىرىسكەن شاعى. بويىندا قۋات تۇنىپ تۇرعانداي. ادام جانى ءسۇيىپ ىستەگەن جۇمىستان جالىعار ما, ءتىپتى كەيبىر ادامداردىڭ «شارشادىم» دەگەن ءسوزىن ەستىگەندە تاڭعالۋشى ەدى. ادام قالاي شارشايدى دەپ ويلايتىن. جوعارى وقۋ ورنىندا العان ءبىلىمىن كۇندەلىكتى تاجىريبەمەن ۇشتاستىرىپ, كاسىبي شەبەرلىگىن جەتىلدىرە تۇسۋگە تىرىستى.
اتتەڭ ءومىر جولى بولات جولدىڭ بويىنداي تەپ-تەگىس ەمەس ەكەن. ىلديى مەن ەڭىسى, ءورى مەن قىرى بار ەكەندىگىن سوندا عانا تۇسىنگەن. 1990 جىلى قاتال تاعدىردىڭ جازۋىمەن مۇگەدەك بولىپ قالعانى. توسەككە تاڭىلىپ جاتقاندا تالاي مۇڭ باستى, قايعىنىڭ قارا اسپانى تۇمشالاپ, توبەسىنەن كەتپەي قويدى. باياعى جاستىق جىگەردىڭ ب ۇلىقسىعان بۇلاقتاي قۇيىلىپ تۇراتىن تامىرى سۋالعانداي. الدىنىڭ ءبارى قارا تۇنەك, ادام توزگىسىز جاعداي. تۇنەرگەن توڭىرەككە قاراپ, ءتۇڭىلىپ تە كەتكەن ساتتەرى از بولمادى. ءبىر ءسات قاراۋىتقان كوكجيەكتىڭ ارعى جاعىنان بولماشى ساۋلە كورىنگەن. ول ساۋلە ەندىگى ارادا دەنساۋلىعىن تۇزەۋ ءۇشىن, كادىمگى قارا جەردى نىق باسىپ جۇرگەن قاراپايىم ادامدار ءتارىزدى پەندەنىڭ پەشەنەسىنە جازىلعان ىرىزدىعىن كورۋ ءۇشىن سىناققا كاتەپتى قارا نارداي توتەپ بەرۋ كەرەك ەكەن.
جامباستاپ جاتىپ الماي, سپورتپەن اينالىسۋعا بەكەم بەل بۋدى. وندا دا ون ەكى مۇشەسىن تۇگەل قوزعالىسقا ەنگىزەتىن – ۇستەل تەننيسى. دوڭگەلەنگەن دۇنيەدەي زىر قاققان دومالاق شاردى قول باسىنداي قالاقپەن قاعىپ الىپ, قايتا سەرپۋ دەنى ساۋ ازاماتتاردىڭ دا قولىنان كەلە بەرمەس. باستاپقىدا ادام ايتقىسىز قيىندىقتى باسىنان كەشىردى. بىرتە-بىرتە قول جاتتىققان, ماشىق قالىپتاستى. جارىق دۇنيەنىڭ جاقسىلىعىن كورۋگە دە مۇمكىندىك تۋا باستادى. ۇزبەي جاتتىعۋ ارقىلى شىنايى شەبەرلىك پايدا بولدى.
– 1999 جىلدان باستاپ قالالىق, وبلىستىق, رەسپۋبليكالىق جارىستارعا ۇزبەي قاتىسىپ, جەڭىمپاز اتانا باستادىم, – دەيدى ناتاليا ۆلاديميروۆنا, – 2018 جىلى پەتروپاۆل قالاسىندا وتكەن ەل چەمپيوناتىندا ءبىرىنشى ورىن يەلەندىم. وسى جىلدىڭ جەلتوقسان ايىندا ۇستەل تەننيسىنەن سپورت شەبەرى اتاندىم.
سپورتتى سەرىك ەتكەن جىگەرلى جان 2017 جىلدان باستاپ «ينۆاتاكسي» قىزمەتىندە ديسپەچەر بولىپ جۇمىس ىستەيدى. كەيدە قاربالاسقان شارۋامەن ءبىرىنشى توپتاعى مۇگەدەك ەكەنىن دە ۇمىتىپ كەتەتىنى بار. ءوزىنىڭ ايتۋىنا قاراعاندا, ادامداردىڭ وتىنىشىنە جوعارى جاۋاپكەرشىلىكپەن قاراپ, مۇقيات بولۋ قاشاندا ساۋاپتى ءىس.
– تاعدىر تالكەگىنە ۇشىراعان مەن ءتارىزدى ادامداردىڭ كوپ ەكەنىن كورىپ ءجۇرمىز. تەك باسقا تۇسكەن باتپانداي اۋىرلىقتى بويىڭداعى جىگەرمەن, الاپات قاجىر-قايراتپەن عانا جەڭە الاسىڭ, – دەيدى كەيىپكەرىمىزدىڭ ءوزى, – مىناۋ جارىق دۇنيەگە ادام بولىپ كەلگەن سوڭ قانداي جاعدايعا ۇشىراساڭ دا كادىمگى ادام قالپىڭدا قالۋىڭ كەرەك. ول ءۇشىن وتكىنشى وكىنىشتى ىسىرىپ تاستاپ, قاتارىمنان قالمايمىن دەپ ۇمتىلۋى كەرەك.
قولى بوساي قالسا, تاڭعى شىقتاي مولدىرەگەن ادەمى مارجان تاعىپ, كوزدىڭ جاۋىن الاتىن كەستە تىگەدى. ءار بۇيىمىنا كورگەن ادامعا وي سالاتىن مازمۇن-ماعىنا سىيعىزىپ, وندا دا ساۋلەلى, جارقىن بولۋعا ءتيىستى. مۇڭلى كەيىپ ادام ەڭسەسىن تومەن تارتادى. ونى كورگەن جان ءوزى سياقتى ءومىر وكپەلەتكەن ادام بولسا شە؟ كەيىپكەرىمىزدىڭ پايىمىنشا, ءتورت قۇبىلاڭ تەگىس سالتاناتتى سانمەن ادىپتەلسە, ومىرگە دەگەن قۇشتارلىق ەسەلەپ ارتا تۇسپەك.
بالكىم سولاي دا شىعار؟!.
اقمولا وبلىسى,
ستەپنوگورسك قالاسى