قۇرلىقتىڭ حوككەي ليگاسىندا (قحل) باق سىنايتىن نۇر-سۇلتاننىڭ «بارىس» كلۋبى ءتورت جەڭىلىستەن كەيىنگى بەسىنشى ويىنىندا جەڭىسكە جەتتى. ەلورداداعى «بارىس ارەنادا» وتكەن كەزدەسۋدە جەرلەستەرىمىز قىتايدىڭ «كۋنلۋن» كومانداسىنان باسىم ءتۇستى.
تۇراقتى بىرىنشىلىكتىڭ كەيىنگى بەس ويىنىنىڭ تورتەۋىندە جەڭىسكە جەتكەن «كۋنلۋن» ەلورداعا جاقسى كوڭىل كۇيمەن كەلدى. الايدا ءتورت ويىن قاتارىنان جەڭىلىپ, جەڭىسكە سۋساپ قالعان «بارىس» بۇل ويىندا بارىن سالدى. جەرلەستەرىمىز العاشقى كەزەڭدى ءساتتى باستادى. ءبىرىنشى 20 مينۋتتىڭ ورتا تۇسىندا «بارىستىڭ» شۆەتسيالىق شابۋىلشىسى ياكوب ليليا ارىپتەسىنىڭ تاماشا پاسىنان كەيىن قارسىلاستىڭ قاقپاسىن ءدال كوزدەدى.
كەزەڭ سوڭىنا دەيىن سان باسىمدىعىنا يە بولعان «بارىس» حوككەيشىلەرى ۇتىمدى ءساتتى ءتيىمدى پايدالانىپ قالۋعا تىرىستى. ناتيجەسىندە, كەزدەسۋدىڭ 14-مينۋتىندا بيىلعى ماۋسىمدا ەلوردا كومانداسىنا قايتا ورالعان مەتت فرەتتين مەرگەندىگىمەن كوزگە ءتۇستى. بۇل – كانادالىق شابۋىلشىنىڭ وسى ماۋسىمداعى العاشقى گولى.
ەكىنشى كەزەڭنىڭ باسىندا قوناقتار تىزگىندى ءوز قولدارىنا الدى. 24-مينۋتتا نيكوليشيننىڭ ءدال سوققىسى قاقپادان تابىلىپ, ەسەپ ايىرماسىن قىسقارتتى. ال ءۇشىنشى كەزەڭدە تابلوداعى كورسەتكىش وزگەرىسسىز قالدى. بۇل جەڭىسىنەن كەيىن جەرلەستەرىمىز 18 ۇپايمەن 10-ورىنعا تۇراقتادى. «بارىس» كەلەسى ويىنىن ەرتەڭ ريگانىڭ «ديناموسىمەن» وتكىزەدى.