تاڭ اعارىپ اتقاننان كەش قارايىپ باتقانعا دەيىن ءبىر جۇرگەن جولىن ون قايىرا جۇرەتىن قوعامدىق كولىك جۇرگىزۋشىلەرىنىڭ قىزمەتى استە وڭاي ەمەس. اۆتوكولىك كەپتەلىسى دە جۇيكەنى جۇقارتادى. كىرىپ-شىققان جولاۋشىلاردى قاداعالاۋ جۇمىسى تاعى بار. سولاي بولدى ەكەن دەپ, جولاۋشىلار كولىگىنىڭ جۇرگىزۋشىلەرى اكىمشىلىك قۇقىقبۇزۋشىلىقتار ءۇشىن جاۋاپكەرشىلىكتەن بوساتىلمايدى. ونداي قۇقىقبۇزۋشىلىقتاردىڭ الدىن الۋدىڭ كورىنىسى رەتىندە قۇقىق قورعاۋ ورگاندارى ەل اۋماعىندا وتكىزگەن اۋقىمدى «اۆتوبۋس» جەدەل الدىن الۋ ءىس-شاراسىن ايتۋعا بولادى.
وسى شارانىڭ اياسىندا اۆتوپاركتەردىڭ 126 قىزمەتكەرى جولاۋشىلار تاسىمالى سالاسىنداعى بۇزۋشىلىقتار ءۇشىن جاۋاپكەرشىلىككە تارتىلىپ ۇلگەرىپتى. تۇراقتى تۇردە وتكىزىلىپ تۇراتىن ءىس-شارا ەڭ الدىمەن جولاۋشىلار كولىگىنىڭ قاتىسۋىمەن بولاتىن اپاتتار سانىن ازايتۋعا, سونداي-اق اۆتوبۋس جۇرگىزۋشىلەرىنىڭ جول قوزعالىسى ەرەجەلەرىن ساقتاۋىن باقىلاۋدى كۇشەيتۋگە باعىتتالعان. جەدەل الدىن الۋ ءىس-شاراسىنا پوليتسيا قىزمەتكەرلەرىمەن بىرگە كولىكتىك باقىلاۋ, توتەنشە جاعداي ورگاندارىنىڭ قىزمەتكەرلەرى جانە قوعام وكىلدەرى قاتىستى.
ءۇش كۇندىك رەيد بارىسىندا اۆتوبۋس جۇرگىزۋشىلەرى جاساعان جول قوزعالىسى ەرەجەلەرىن بۇزۋدىڭ 10 مىڭعا جۋىق جاعدايى انىقتالدى. ولاردىڭ ەڭ كوبى تۇركىستان (1063), قاراعاندى (794), الماتى (775), پاۆلودار (715), شىعىس قازاقستان (708) جانە ماڭعىستاۋ (704) وبلىستارىندا, سونداي-اق الماتى (744) جانە نۇر-سۇلتان (702) قالالارىندا تىركەلىپتى.
سونداي-اق پوليتسەيلەر ماس كۇيىندە جولاۋشىلار كولىگىن باسقارۋدىڭ 15 فاكتىسىنىڭ جولىن كەستى. ونداي جۇرگىزۋشىلەر كولىك جۇرگىزۋ قۇقىعىنان ايىرىلاتىن بولادى.
بۇدان باسقا, ەڭبەك جانە دەمالىس رەجىمىن بۇزۋدىڭ 43 فاكتىسى, ساقتاندىرۋ زاڭناماسىن بۇزا وتىرىپ كولىكتى باسقارۋدىڭ 264 فاكتىسى, تەحنيكالىق بايقاۋدان وتپەگەن جانە زاڭسىز قايتا جابدىقتالعان 1 مىڭنان استام اۆتوبۋس, جىلدامدىقتى ارتتىرۋدىڭ 300-گە جۋىق فاكتىسى انىقتالدى. جولاۋشىلاردى تاسىمالداۋ كەزىندە 1700-دەن استام اۆتوبۋس جۇرگىزۋشىسى تەلەفوندى پايدالانعان, سونداي-اق 114-ءى جولاۋشىلاردى زاڭسىز تاسىمالداعان.
زاڭ بۇزۋشىلىقتارى بار اۆتوبۋستاردى جولعا شىعارعانى ءۇشىن اۆتوبۋس پاركتەرى باسشىلارىنىڭ قاتارىنان 126 لاۋازىمدى تۇلعا اكىمشىلىك جاۋاپكەرشىلىككە تارتىلدى, ال جەكەلەگەن جاعدايلاردا جولاۋشىلاردى تاسىمالداۋعا ارنالعان شارتتاردى بۇزا وتىرىپ, ليتسەنزيالاردىڭ قولدانىلۋى توقتاتىلدى. 377 زاڭسىز قايتا جابدىقتالعان اۆتوبۋس, سونداي-اق پايدالانۋعا تىيىم سالىنعان تەحنيكالىق جاي-كۇيى قاۋىپسىزدىك تالاپتارىنا سايكەس كەلمەيتىن كولىك قۇرالدارى انىقتالدى. 292 كولىك قۇرالى ايىپ تۇراعىنا قويىلدى. جەدەل الدىن الۋ ءىس-شاراسى بارىسىندا پوليتسيا جانە توتەنشە جاعداي مينيسترلىگىنىڭ قىزمەتكەرلەرى اۆتوبۋستاردىڭ الداعى قىس كەزىندە پايدالانۋعا سايكەستىگىن (جىلىتۋدىڭ, قوزعالتقىشتى مايلاۋ جۇيەلەرى, ءورت ءسوندىرۋ قۇرالدارىنىڭ بولۋىن) تەكسەردى. جالپى, وتكەن توعىز ايداعى دەرەكتەر بويىنشا, اۆتوبۋس جۇرگىزۋشىلەرىنىڭ كىناسىنەن بولعان جول-كولىك وقيعالارىنىڭ سانى 352-دەن 215-كە دەيىن (39%) تومەندەگەن.
اكىمشىلىك پوليتسيا كوميتەتىندەگى ءتارتىپ ساقشىلارىنىڭ ايتۋىنشا, اۆتوبۋس جۇرگىزۋشىلەرى مەن اۆتوپارك باسشىلارى جول قوزعالىسى جانە جولاۋشىلاردى تاسىمالداۋ ەرەجەلەرىن ءاردايىم ەستە ساقتاۋى جانە بۇزباۋى ءتيىس. ولار ءوز جولاۋشىلارى مەن جول قوزعالىسىنا قاتىسۋشىلاردىڭ ومىرىنە جاۋاپ بەرەدى. سوندىقتان اۆتوبۋسقا وتىرعان كەزدە ادامدار وزدەرىن تولىق قاۋىپسىز سەزىنۋى ءتيىس.