سقو پوليتسيا دەپارتامەنتىندە جەرلەسىمىز گەرولد بەلگەردىڭ تۋعان كۇنى اتالىپ ءوتتى, دەپ حابارلايدى Egemen.kz.
ءۇش ءتىلدى تەل ەمگەن جازۋشى, اۋدارماشى, پۋبليتسيست, ادەبيەت زەرتتەۋشىسى گ.بەلگەر قازاق دالاسىنىڭ ۇلكەن پاتريوتى ەدى. ونىڭ ءومىر جولى كىمگە بولسا دا ۇلگى بولا الارى ءسوزسىز.
1934 جىلى 28 قازاندا ەدىل بويىنداعى ەنگەلس قالاسىندا تۋعان گەرولدتىڭ وتباسى 1941 جىلى سولتۇستىك قازاقستانداعى قازاق اۋىلىنا جەر اۋدارىلىپ كەلەدى. فەلدشەر بولعان اكەسى كارلدى قازاقتار بەلگەر دەگەن فاميلياسىن وزگەرتىپ, "بىلگىر" دەپ اتاپ كەتكەن. ول شىنىندا بىلگىر دارىگەر بولىپ, تالاي تۇرعىنداردى ەمدەگەن. ال گەرا دەگەن ات العان بالاسى گەرولد تە قازاق اراسىنا وڭاي ۇيرەنىپ, ءتىلدى تازا ۇيرەنۋىمەن قاتار قازاقتىڭ سالت-ءداستۇرىن دە بويىنا سىڭىرگەن. مەكتەپتى التىن مەدالعا بىتىرسە دە ونى ماسكەۋدىڭ جوو-سىنا قابىلداماعان. سوندىقتان ول الماتىداعى قازپي-ءدى بىتىرگەن. ونىڭ بارلىق ءومىر جولى قازاق ادەبيەتىنە قىزمەت ەتۋگە ارنالدى. ول قازاق ادەبيەتىنىڭ كلاسسيكتەرى ب.مايلين, ع.مۇسىرەپوۆتەردى ورىسشاعا اۋدارعان. كەيىن ءا.نۇرپەيىسوۆ, د.دوسجانوۆ جانە ت.ب. اۋدارادى. ول 1992 جىلى پرەزيدەنتتىڭ «بەيبىتشىلىك جانە رۋحاني كەلىسىم» سىيلىعىن العان.
ونىڭ ءوزىنىڭ ەڭبەكتەرى جەڭىل يۋمورمەن قازاق بولمىسىن, قازاقستاندىق شىندىقتى اشۋعا ارنالعان. ناقپا-ناق بەرىلگەن سۋرەتتەرى ءۇشىن ونى حالىق جاقسى كوردى. ءومىر بويى الماتىدا تۇرسا دا ول ءوزىنىڭ وسكەن جەرى سولتۇستىك قازاقستان وبلىسى, اققايىڭدى ارالدار دەپ ايتۋدان جالىقپاعان. ەسىل وڭىرىندەگى دوستارىمەن دە ءومىر-بويى تىعىز بايلانىسىپ تۇرعان. سوندىقتان دا ونىڭ ءومىرىن جەرلەستەرىنە ەتەنە تانىستىرۋ, جاستارعا ءومىرىن ۇلگى ەتۋ – بۇگىنگى كۇننىڭ مىندەتى. پد بولعان كەزدەسۋدە "ۇلت جاناشىرى" دەگەن تاقىرىپتا "قىزىلجار" قوسىمشا ءبىلىم بەرۋ جانە قىزمەت كورسەتۋ ورتالىعى" جشس ديرەكتورى جانات مۇحامەدجانوۆتىڭ تارتىمدى بايانداماسى تىڭدالدى. پد ىشكى جانە سىرتقى كوممۋنيكاتسيالار ءبولىمىنىڭ باسشىسى ءمادينا بالعاشوقوۆا وسىنداي پراكتيكالىق ساباقتار بەلگىلى قوعام قايراتكەرلەرىنىڭ ءومىرى جايلى تەرەڭىرەك بىلۋگە جانە ولاردىڭ شىعارماشىلىعىنىڭ ماڭىزدىلىعىن اشۋعا مۇمكىندىك بەرەتىنىن ايتتى. كارانتيندىك ءىس-شارالارعا بايلانىستى اۋديتوريانى تولىق قامتۋعا مۇمكىندىك بولماسا دا ونلاين-فورماتتار مەن تىكەلەي ەفيرلەردىڭ كومەگى ءتيىپ جاتتى.
سولتۇستىك قازاقستان وبلىسى