وڭىرلىك تۋريستىك ءونىمدى دامىتۋدىڭ جاڭا كەزەڭى

KITO TRAVEL كومپانياسىنىڭ جەتەكشىسى جازيرا جانكينا قاراعاندى وبلىسىنداعى تۋريستىك نىساندارعا نازار اۋدارۋعا شاقىردى. ونىڭ ايتۋىنشا, تۋرپاكەتتەرگە قارقارالى, ۇلىتاۋعا بارۋدى قوسۋعا بولادى. «وسى ورىندارعا بارا جاتىپ, اۆتوموبيلدەردى ۋتيليزاتسيالاۋ زاۋىتىنا كىرىپ شىعۋعا بولادى. بىراق وسىنىڭ بارلىعىن ساتۋ ءۇشىن باسقا وڭىرلەردەگى تۋروپەراتورلاردى دا تارتۋ كەرەك جانە اقپاراتتىق تۋرلاردى وتكىزۋدە قولداۋ قاجەت», دەدى ول.

«كارات-تۋر» جشس ديرەكتورى گۇل­بانۋ بەكبوسىنوۆا اتىراۋ ءوڭىرى مۇنايلى ولكە بولىپ سانالعانىمەن, تۋربيزنەس قوناقتارىنا قازاقستان ءۇشىن سيرەك قۇبىلىس – لوتوستىڭ گۇلدەۋىن ۇسىنا الا­تىنىن ايتادى. «بۇل وتە تارتىمدى تۋريستىك ءونىم, وعان رەسەيلىك تۋريستەردى اكەلۋگە بولادى. الايدا اتىراۋ – اس­تراحان تاسجولى تىم ناشار جاعدايدا», دەدى گۇلبانۋ بەكبوسىنوۆا.

ىشكى جانە كوشپەلى تۋريزم قاۋىمداس­تىعىنىڭ توراعاسى البينا ۆەيمەر جانە «تۋي قازاقستان» كوممەرتسيالىق ديرەكتورى سالتانات وماروۆا ءوڭىردى زەرتتەۋ جانە وعان شەتەلدىك تۋريستەردى تارتۋ ماقساتىندا اقپاراتتىق تۋرلاردى ۇيىمداستىرۋدىڭ ماڭىزىن اتاپ ءوتتى. «ماسەلەن, تارازدا بيىل كوپتەگەن قىزىقتى تۋريستىك ورىن پايدا بولدى. ءوڭىرىمىز كيەلى جەرگە باي بولسا دا, بيىل توپ-10-عا كىرمەگەن. ءبىزدىڭ ءوڭىرىمىز تۋرالى كوبىرەك ءبىلۋ ءۇشىن اقپاراتتىق تۋرلاردى وتكىزۋدى قولدايمىن», دەپ ۇسىنىس ءبىلدىردى البينا ۆەيمەر.

«اتامەكەن» ۇكپ باسقارما توراعا­سىنىڭ ورىنباسارى يۋليا ياكۋپباەۆا وقيعالىق كۇنتىزبەگە قايتا ورالىپ, وڭىر­لەردە تۋريستىك جاڭا نىسانداردىڭ ۇزدىك وندىعىن بىرتىندەپ كەڭەيتۋدى ۇسىندى.

«بۇگىندە ساياحاتتاۋ جانە الەۋمەتتىك جەلىگە ءتۇرلى-ءتۇستى سۋرەتتەردى سالۋ ءساندى ترەندكە اينالدى. بىراق تۋريستەرگە باعدار كەرەك. جاپونيا كوپ جىلدار بويى تۋريستەردى ساكۋرانىڭ گ ۇلى ارقىلى تارتىپ كەلەدى. قازاقستان بويىنشا كوزدىڭ جاۋىن الاتىن تابيعات تاماشالارىنىڭ كوپ­تىگىن ەسكەرسەك, جىل بويى تۋريست تار­تۋعا مۇمكىندىگىمىز بار. ماسەلەن, تۋريس­تەر ەرتە كوكتەمدە جامبىل وبلىسىندا جاۋقازىننىڭ, مامىردا الماتى وبلىسىندا قىزعالداقتار مەن الما اعاشىنىڭ, تامىزدا شىعىس قازاقستانداعى كۇنب­ا­عىستىڭ ءپىسۋى, قىركۇيەكتىڭ باسى – باتىس­تا لوتوستىڭ گۇلدەۋىن تاماشالاي الادى. سو­نىمەن قاتار ءجۇزىم, الما, اسقاباقتىڭ ءپىسۋىن دە كۇنتىزبەگە قوسۋعا بولادى», دەپ اتاپ ءوتتى يۋليا ياكۋپباەۆا.

تۋريستىك سالا وكىلدەرى جاڭا ونىمدەر­دىڭ قالىپتاسۋىنا ساپالى جولدىڭ جانە باسقا دا ينفراقۇرىلىمداردىڭ بولماۋى ءجيى كەدەرگى كەلتىرەتىندىگىنە نازار اۋداردى. مادەنيەت جانە سپورت مينيس­تر­لىگى تۋريزم يندۋسترياسى كوميتەتىنىڭ تور­اعاسى داستان رىسپەكوۆ بيىل مينيس­ترلىك ۇلتتىق پالاتامەن بىرلەسىپ, «جۇ­مىس­­پەن قامتۋدىڭ جول كارتاسى-2020» باعدارلاماسى اياسىندا تۋريستىك يندۋس­تريا جو­بالارىن ىلگەرىلەتكەنى جايىندا اتاپ ءوتتى.

«اتامەكەن» ۇكپ تاراپىنان اتالعان باعدارلاماعا تۋريزم بويىنشا جوبالاردى قوسۋ ءبىز ءۇشىن جاقسى ۇسىنىس بولدى. ءبىرىنشى كەزەكتە جەرگىلىكتى اتقارۋ­شى ورگاندار الەۋمەتتىك جوبالاردى ىلگە­رى­لەتۋگە تىرىسادى. ەگەر تۋريزم سا­لا­­سى باع­­دارلامانىڭ ءبىر يندي­كاتورى بولسا, جو­بالار سانىن ەكى ەسە ارت­تىرۋعا بولادى», دەدى داستان رىسپەكوۆ.

ەۋرازيا تۋريزم قاۋىمداستىعىنىڭ جەتەكشىسى رىستى قاراباەۆا ۇسىنىستى قولداپ, «Kazakh Tourism ۇك» اق تۋريس­تىك نارىق جانە ۇلتتىق پالاتامەن بىر­لەسىپ, وڭىرلىك رەسۋرستار, وڭىرلىك تۋريس­تىك ءونىم جانە تۋروپەراتورلارعا قاتىستى جۇمىستى جانە ماركەتينگتى قولعا الۋ قا­جەتتىگىن ايتتى. Kazakh Tourism ۇلتتىق كوم­پانياسىنا ىشكى نارىقتى دامىتۋ جانە قازاقستاندى شەتەلدە جارنامالاۋ­دا تەڭگەرىم تابۋ قاجەت ەكەنىن ۇسىندى.

جيىن بارىسىندا Kazakh Tourism اق وتكەن جىلدىڭ ەسەبىن بەرىپ, 2020 جىلى تۋريستىك سالانى دامىتۋعا باعىتتالعان جوبالار تۋرالى ايتتى. 2020 جىلى ۇلتتىق كومپانياعا وتاندىق تۋريستىك ءونىمدى دامىتۋ جانە ىلگەرىلەتۋ ءىس-شارالارىنا

1 ملرد 793 مىڭ تەڭگە بولىنگەن. باسقارما توراعاسى ەرجان ەركىنباەۆتىڭ ايتۋىنشا, بەس جوبا ىشىندە – قازاقستاندىق تۋريستىك نىساندارعا ارناپ ستاندارتتاردى دايىنداۋ, سونىڭ ىشىندە قىتاي, يتاليا جانە شۆەيتساريا ساپا ستاندارتتارىنا تالداۋ جۇرگىزۋ بار.

«قاۋىمداستىقتارمەن بىرگە بارلىق مودەلدى قارادىق, بىزگە قازاقستانعا ساي جەكە ستاندارتتار مودەلى كەرەك دەگەن ويعا كەلدىك جانە بيزنەس-قوعامداستىقپەن بىرگە وسىنداي مودەلدى دايىنداۋ بويىنشا جوبا جۇرگىزىپ جاتىرمىز. ۇلتتىق پالاتامەن بىرلەسكەن «جول كارتاسى» اياسىندا كاتالوگ پەن ينتەراكتيۆتى كارتانى قالىپتاستىرۋ مەن تۋريستىك مارشرۋتتاردى تۇگەندەۋ بويىنشا جۇمىستار باستالدى, وندا وڭىرلەردىڭ بارلىق وڭ جانە تەرىس جاقتارىن كورسەتەتىن بولادى. جىل سوڭىنا دەيىن ساناتوري-كۋرورتتىق وڭىرلەردى تۇگەندەۋ, ەلدەگى قولونەردى زەرتتەۋ بويىنشا كاسىپكەرلەرگە ارنالعان جۇمىس جانە انىقتامالىق ماتەريالدار ۇسىنىلادى», دەدى ەرجان ەركىنباەۆ.

سالالىق قاۋىمداستىق اگرارلىق تۋريزم سۋبەكتىلەرىنە ارنالعان ەگجەي-تەگجەيلى نۇسقا تانىستىرادى. جۇمىس تۇركىستان, اقمولا, الماتى جانە جام­بىل وبلىستارىندا جۇرگىزىلىپ جاتىر. 2020 جىلى قازاقستاندىق مەكتەپ­تەردە وسى سالاعا قاتىستى ارنايى ساباقتاردى ەنگىزۋ تاجىريبەسى بويىنشا جۇمىس باستالعان. بۇل ايماقتاردىڭ تابيعي, مادەني, تاريحي, وندىرىستىك جانە عىلىمي الەۋەتىنە نەگىزدەلگەن ءارتۇرلى وقۋ باع­دارلامالارىنا سايكەس جاسالعان ەكس­كۋرسيالار مەن تۋرلار ۇيىمداستىرۋ دا قولعا الىنىپ جاتىر. پيلوتتىق جوبادا 500-دەن استام مەكتەپ وقۋشىسى تار­تىلاتىن 3 وڭىردە ەكسكۋرسيالار جوس­پارلانعان.

«بيىل پاندەميا بارلىق سالاعا وزگەرىس ەنگىزگەنى بەلگىلى. سوندىقتان بىزدە روۋد-شوۋعا قاراستىرىلعان قاراجاتتى بىرنەشە جوباعا ءبولۋ كەرەك دەگەن ۇسىنىس بولدى. شوۋدى ونلاين فورماتتا وتكىزەمىز, وسى ماسەلەنى سىزدەرمەن تالقىلاپ, جىل سوڭىنا دەيىن جۇزەگە اسىرىلۋى مۇمكىن بىرنەشە شارانى تاڭداي الامىز», دەپ ۇسىندى Kazakh Tourism باسقارما توراعاسى.

«باستىسى, جوبالاردى اياعىنا دەيىن جەتكىزۋ كەرەك, سوندىقتان ناقتى كرى بويىن­شا جۇمىس ىستەگەن ءجون. نىساندارى بار كارتانى جاي عانا قۇرىپ نەمەسە قولونەر, ستاندارتتار, اگروتۋريزم تالداۋىن جۇرگىزۋ عانا ەمەس – ناقتى جوبالاردى ىسكە اسىرۋدى تاپسىرامىن. تسيفرلاندىرۋ بويىنشا جوبالارعا كەلەر بولساق, ماقساتتى حاكاتوندارعا ءوتۋ كەرەك. وسى رەتتە ءىت نارىق الەۋەتىمەن قوسا, تۋريستىك نارىق, ديزاينەرلەر, ماركەتولوگتەردىڭ كاسىبي بىلىكتىلىگىن پايدالانۋ قاجەت», دەدى يۋليا ياكۋپباەۆا.

جيىن سوڭىندا Kazakh Tourism, «اتامەكەن» ۇكپ مەن بيزنەس قوعامداستىق جىل سوڭىندا وڭىرلەردىڭ دامۋىن ەسكەرە وتىرىپ, ءىس-شارالار مەن كومپانيانىڭ 2021 جىلعا ارنالعان بيۋدجەتىن بىرلەسىپ جوسپارلاۋعا ۋاعدالاستى.