كەشە ق.توقاەۆ ۇجىمدىق قاۋىپسىزدىك شارتى ۇيىمى پارلامەنتتىك اسسامبلەياسىنىڭ (ۇقشۇ پا) وتىرىسىنا قاتىستى.
سول كۇنى ۇقشۇ پارلامەنتتىك اسسامبلەياسىنىڭ توعىزىنشى وتىرىسى بولدى. شارانىڭ كۇن تارتىبىنە ۇيىمداستىرۋ, زاڭ جوبالارى جانە ەرەجەلەر ازىرلەۋ سيپاتىنداعى ماسەلەلەر كىردى. اتاپ ايتقاندا, داعدارىستى جاعدايلاردا ارەكەت جاساۋ; ماماندار دايارلاۋ جانە ءبىلىمىن جەتىلدىرۋ; تەحنولوگيالىق تەرروريزمگە قارسى ءىس-قيمىلدى قامتاماسىز ەتۋ; ەسىرتكى, پسيحوتروپتىق زاتتار جانە پرەكۋرسورلاردىڭ اينالىمىن باقىلاۋ; سىبايلاس جەمقورلىققا قارسى ءىس-قيمىلدى نورماتيۆتىك-قۇقىقتىق تۇرعىدا قامتاماسىز ەتۋ باعىتىندا ۇقشۇ-عا مۇشە مەملەكەتتەردىڭ زاڭناماسىن ۇيلەستىرۋ بويىنشا قۇجاتتار قابىلداندى.
وتىرىستا «زاڭدى تۇلعالاردىڭ جانە (نەمەسە) ونىڭ اكتيۆتەرىن زاڭسىز يەلەنۋ جانە باسقارۋعا قارسى ءىس-قيمىل تۋرالى» ۇلگى رەتىندەگى زاڭ جوباسى قارالدى. سونداي-اق, ۇقشۇ-عا مۇشە مەملەكەتتەردىڭ ۇلتتىق زاڭنامالارىن ەڭبەك ميگرانتتارىن زەينەتاقىمەن قامتاماسىز ەتۋ جانە ادام ساۋداسىنىڭ ءتۇرلى ارەكەتتەرىنە قاتىستى بولىگىنە جەتىلدىرۋ جونىندەگى ۇسىنىمدار دا قابىلداندى.
ق.توقاەۆتىڭ رەسەيدىڭ فەدەرالدىق جينالىسى فەدەراتسيا كەڭەسىنىڭ توراعاسى ۆالەنتينا ماتۆيەنكومەن كەزدەسۋىندە قازاقستان مەن رەسەيدىڭ پارلامەنتارالىق ىنتىماقتاستىعىنىڭ ماڭىزدى ماسەلەلەرى تالقىلاندى. ق.توقاەۆ ءارىپتەسىن قازاقستان پارلامەنتى قابىلداعان, ەلىمىزدىڭ جەتىستىكتەرى تۋرالى اۋقىمدى قۇجات مازمۇندالعان قازاقستان رەسپۋبليكاسى تاۋەلسىزدىگىنىڭ 25 جىلدىعى دەكلاراتسياسىمەن تانىستىردى. ءتوراعا اتاپ وتكەندەي, پارلامەنت دەپۋتاتتارى ەلوردادا «تاۋەلسىز قازاقستان» مونۋمەنتىن ورناتۋ, ەلىمىزدىڭ كونستيتۋتسياسىندا تۇڭعىش پرەزيدەنت – ەلباسى نۇرسۇلتان نازارباەۆتىڭ جاڭا مەملەكەت قۇرۋداعى قوماقتى ۇلەسىن اتاپ ءوتۋ, ەلوردا جانە ەلىمىزدەگى باسقا دا ماڭىزدى نىسانداردا مەملەكەت باسشىسىنىڭ ەسىمىن كورسەتۋ تۋرالى ۇسىنىس ايتتى.
ق.توقاەۆ ۆ.ماتۆيەنكونىڭ بيىلعى مامىردا قازاقستانعا ساپارى جەمىستى بولعانىن جانە ونىڭ سەناتتا ءسوز سويلەگەنىن اتاپ ءوتتى. قازاقستان سەناتىنىڭ توراعاسى, سونداي-اق استانادا وتكەن «دىندەر تەرروريزمگە قارسى» حالىقارالىق كونفەرەنتسياعا قاتىسقانى ءۇشىن رەسەيلىك پارلامەنتشىلەرگە العىس ايتتى. جۇزدەسۋ بارىسىندا 2016 جىلعى 4 قازاندا ەكى مەملەكەت باسشىلارىنىڭ قاتىسۋىمەن استانادا وتكەن قازاقستان مەن رەسەيدىڭ XIII ايماقارالىق ىنتىماقتاستىق فورۋمىندا قابىلدانعان شەشىمدەردى ىسكە اسىرۋعا دا ەرەكشە نازار اۋدارىلدى.
سانكت-پەتەربۋرگتە ق.توقاەۆ پاكىستان يسلام رەسپۋبليكاسى ۇلتتىق اسسامبلەياسىنىڭ ءتوراعاسى ساردار اياز ساديكپەن كەزدەستى. توراعالار قازاقستان مەن پاكىستاننىڭ پارلامەنتارالىق ديالوگىن ۇدەتۋ تۋرالى ۋاعدالاستى. جۇزدەسۋ بارىسىندا ەكى جاقتىڭ حالىقارالىق تەرروريزمگە قارسى ءىس-قيمىلى جونىندەگى ءتيىمدى قۇرىلىمداردى قالىپتاستىرۋدىڭ كەلەشەگى تۋرالى پىكىر الماستى.
دەپۋتاتتار ءالي بەكتاەۆ پەن ميحايل بورتنيك ۇقشۇ پارلامەنتتىك اسسامبلەياسىنىڭ الەۋمەتتىك-ەكونوميكالىق جانە قۇقىقتىق, سونداي-اق ساياسي ماسەلەلەر جانە حالىقارالىق ىنتىماقتاستىق جونىندەگى تۇراقتى كوميسسيالارىنىڭ وتىرىستارىنا قاتىستى. سەناتورلار سەرگەي پلوتنيكوۆ, سەرىك بەكتۇرعانوۆ, سەرىك جاقسىبەكوۆ, جەڭىس نۇرعاليەۆ جانە ۆلاديمير رەدكوكاشين تمد پارلامەنتارالىق اسسامبلەياسىنىڭ مەملەكەت قۇرىلىسى مەن جەرگىلىكتى ءوزىن-ءوزى باسقارۋ تاجىريبەسىن زەردەلەۋ جونىندەگى, اگرارلىق ساياسات, تابيعي رەسۋرستار جانە ەكولوگيا جونىندەگى, عىلىم جانە ءبىلىم بەرۋ جونىندەگى تۇراقتى كوميسسيالارىنىڭ وتىرىسىنا قاتىستى.
كەشە كەشكىسىن قازاقتىڭ كورنەكتى قوعام جانە مەملەكەت قايراتكەرى, رەسەي يمپەرياسى تۇڭعىش مەملەكەتتىك دۋماسىنىڭ دەپۋتاتى ءاليحان بوكەيحانوۆتىڭ ءبيۋستىن تمد پارلامەنتارالىق اسسامبلەياسىنا تارتۋ ەتۋ سالتاناتى بولدى.
بيۋست رەسەيدىڭ العاشقى دۋماسىنىڭ وتىرىسى وتكەن تاۆريا سارايىنداعى تمد پارلامەنتارالىق اسسامبلەياسىنىڭ شتاب-پاتەرىنە قويىلدى. سكۋلپتۋرانى جاساعان ومىرزاق شاڭوۆ.
سالتاناتتى اشا كەلىپ, سەنات توراعاسى قاسىم-جومارت توقاەۆ «قازاقستان تاۋەلسىزدىگىنىڭ 25 جىلدىعى مەن حح عاسىردىڭ باسىنداعى كورنەكتى قازاق زيالىسىنىڭ تۋعانىنا 150 جىل تولعانى اتالىپ وتەتىن جىلى ءبيۋستىنىڭ سانكت-پەتەربۋرگتەگى تاۆريا سارايىنا ورناتىلۋى ەرەكشە ماعىناسى بار شارا ەكەنىن اتاپ ءوتتى. توراعا وسى مەرەيتويعا بايلانىستى ەستەلىك شارالار يۋنەسكو اياسىندا ءوتىپ وتىرعانىن ەسكە سالدى.
«ءاليحان بوكەيحانوۆتىڭ قىزمەتى بيىك ادامگەرشىلىكتىڭ, ۇلتتىق جانە ازاماتتىق پارىزىنا كىرشىكسىز ادالدىق پەن شىنايى بەرىلۋدىڭ ۇلگىسى بولىپ تابىلادى», – دەپ اتاپ ءوتتى سەنات توراعاسى.
سالتانات بارىسىندا قازاقستان پارلامەنتى ءماجىلىسىنىڭ توراعاسى نۇرلان نىعماتۋلين, تمد پاا كەڭەسىنىڭ توراعاسى, رەسەي فەدەراتسيا كەڭەسىنىڭ ءتورايىمى ۆالەنتينا ماتۆيەنكو, رەسەي مەملەكەتتىك دۋماسىنىڭ توراعاسى ۆياچەسلاۆ ۆولودين, ازەربايجان ميللي مەدجليسىنىڭ توراعاسى وكتاي اسادوۆ ءسوز سويلەدى.
سالتاناتتى شارانى اياقتاي كەلىپ ق.توقاەۆ, ءا.بوكەيحانوۆتىڭ ءبيۋستى رەسەي, قازاقستان جانە دوستاستىق ەلدەرىنىڭ اراسىنداعى تاريحي بايلانىستار ۋاقىتى مەن دوستىق قارىم-قاتىناستاردىڭ بەلگىسىنە اينالاتىنىنا نىق سەنىم ءبىلدىردى.
سونداي-اق, كەشە تمد پاا كەڭەسىنىڭ وتىرىسى ءوتتى.