قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە قازاقستان حالقى اسسامبلەياسى اتىنان سايلانعان ءماجىلىس دەپۋتاتتارى ەگور كاپپەل, رومان كيم, احمەت مۇرادوۆ, نادەجدا نەستەروۆا جانە روزاقۇل حالمۇرادوۆ قاتىسقان بريفينگتە ماجىلىستەگى قحا دەپۋتاتتىق توبىنىڭ جۇمىسى جان-جاقتى تانىستىرىلدى.
قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە قازاقستان حالقى اسسامبلەياسى اتىنان سايلانعان ءماجىلىس دەپۋتاتتارى ەگور كاپپەل, رومان كيم, احمەت مۇرادوۆ, نادەجدا نەستەروۆا جانە روزاقۇل حالمۇرادوۆ قاتىسقان بريفينگتە ماجىلىستەگى قحا دەپۋتاتتىق توبىنىڭ جۇمىسى جان-جاقتى تانىستىرىلدى.
قحا اتىنان سايلانعان ءماجىلىستەگى دەپۋتاتتىق توپتىڭ قۇرامىنا ءۇش ساياسي پارتيانىڭ وكىلى بولىپ تابىلاتىن جانە ءماجىلىستىڭ جەتى كوميتەتىندە جۇمىس ىستەيتىن 12 دەپۋتات كىرەدى. اتالعان دەپۋتاتتىق توپ تۋرالى بەكىتىلگەن ەرەجە جانە جۇمىس جوسپارى بار. ءماجىلىستىڭ ەكولوگيا ماسەلەلەرى جانە تابيعاتتى پايدالانۋ كوميتەتىنىڭ مۇشەسى ەگور كاپپەل اتالعان دەپۋتاتتىق توپ جۇمىسىن كەڭىنەن اڭگىمەلەدى. ونىڭ ايتۋىنشا, كوپپارتيالى پارلامەنتتە قحا دەپۋتاتتىق توبى پارتياارالىق دوستاستىقتىڭ ۇنقاتىسۋ الاڭى قىزمەتىنىڭ كوپتۇرلى ءادىس-تاسىلدەرىن قولدانادى. «ءبىزدىڭ ۇنقاتىسۋ الاڭىمىزدا الەۋمەتتىك ماڭىزدى ماسەلەلەر, اتاپ ايتقاندا, ازىق-ت ۇلىك تاۋارلارىنىڭ شەكتى باعالارىنان باستاپ اۋىلدىق اۋماقتاردى دامىتۋدىڭ مەملەكەتتىك باعدارلامالارىنا دەيىنگى بارلىق دەرلىك ماسەلەلەر تالقىلانادى», دەدى دەپۋتات ءوز سوزىندە.
ە.كاپپەل بۇل رەتتە ساياسي باسەكەلەستىك بار ەكەنىن, ءبىراق تا ول تاۋەلسىزدىك, ۇلتتىق ءبىرلىك, بەيبىتشىلىك جانە كەلىسىم سياقتى نەگىزگى ماسەلەلەر بويىنشا جالپىۇلتتىق كونسەنسۋستى جوققا شىعارمايدى دەگەندى دە ەرەكشە اتاپ كەتتى. دەپۋتاتتىق توپ پارتياارالىق ىنتىماقتاستىق فۋنكتسياسىن اتقارادى, بۇل ماسەلەلەر بويىنشا ءىس-شارالاردىڭ ارنايى قوعامدىق-ساياسي جوسپارى جاسالعان. ونداعى باستى ماقسات قوعامدىق-ساياسي تۇراقتىلىقتى, قوعامدىق-ۇلتتىق كەلىسىمدى زاڭنامالىق قامتاماسىز ەتۋ جانە تاۋەلسىزدىكتى نىعايتۋ بولىپ تابىلادى. مەملەكەت باسشىسى اتاپ كورسەتكەندەي, اسسامبلەيا – جالپىحالىقتىق وكىلدىك, ياعني ازاماتتىق, جالپىحالىقتىق ينستيتۋت, دەدى ول.
دەپۋتات مەملەكەتتىك مادەنيەت قازاق مادەنيەتى بولىپ تابىلاتىنىن, ال ونىڭ اينالاسىنا 130-دان استام ەتنوس وكىلدەرىنىڭ مادەنيەتتەرى شوعىرلانۋى قاجەتتىگىن اتاپ ءوتتى. مادەنيەتتەر جويىلىپ كەتپەيدى, قايتا ءبىر-ءبىرىن دامىتىپ وتىرادى. مەملەكەت باسشىسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ اتاپ كورسەتكەن جانە اسسامبلەيا دەپۋتاتتارى قولداعان «التىن ەرەجە» تۋرالى دا ايتىلماي قالمادى. «تاعدىردىڭ جازۋىمەن ءبىزدىڭ ەلىمىزدە 130 ۇلت پەن ۇلىستىڭ وكىلدەرى تۇرىپ جاتىر. قازاقستان حالقى اسسامبلەياسىنىڭ اتىنان 9 دەپۋتات وسى ۇلتتاردىڭ وكىلدەرى رەتىندە سايلاندى. جانە و باستا ناقتى ايتىلعانداي, ءبىزدىڭ ەشقايسىمىزدىڭ ءبىر عانا ەتنوستىڭ اتىنان عانا سويلەۋىمىزگە قۇقىعىمىز جوق. ءبىز وسى «التىن ەرەجەنى» ۇستانامىز, وسى ەرەجەگە باعىنامىز», دەدى ە.كاپپەل.
ءماجىلىستىڭ جوعارىدا اتالعان كوميتەتىنىڭ مۇشەسى احمەت مۇرادوۆ قازاقستان حالقى اسسامبلەياسى بۇرىنعى كەڭەستىك كەڭىستىكتە جانە باسقا مەملەكەتتەردە جۇمىس ىستەيتىن باسقا اسسامبلەيالارعا قاراعاندا بىرەگەي ەكەنىن ەرەكشە اتادى. قۇرىلىمى قوعامدىق-حالىقتىق ەكەنىن, ال ونى قازاقستان پرەزيدەنتى باسقاراتىنىن تىلگە تيەك ەتكەن دەپۋتات وسىنىڭ ءوزى اسسامبلەيا مارتەبەسىنە حالىقارالىق دەڭگەيدە قىزىعۋشىلىق تانىتىلىپ وتىرعانىنا نازار اۋداردى. «بىزگە ەلىمىزدىڭ بارلىق ءوڭىرلەرىنەن وتىنىشتەر كەلىپ تۇسەدى, ۇلتىنا, ۇلىسىنا قاراماستان, بارشا ازاماتتار ارىز-شاعىمدارىن ايتىپ جاتادى. ياعني, بايلانىس بار دەگەن ءسوز. ولار ءبىزدىڭ پارلامەنت وتىرىسىندا اتقارۋشى ورگاندارعا ساۋال سالۋىمىزعا نەگىز بولادى», دەدى احمەت سەيداراحمان ۇلى.
سونداي-اق, ءماجىلىستىڭ اگرارلىق ماسەلەلەر كوميتەتىنىڭ مۇشەسى روزاقۇل حالمۇرادوۆ قازاق جەرىن مەكەن ەتكەن ەتنوس وكىلدەرى تاتۋلىعىنىڭ سىرىن بىلايشا سيپاتتاپ بەردى: «بۇل سىر قازاق حالقىنىڭ كەڭپەيىلدىگى مەن قوناقجايلىعىندا, تابيعي بولمىسى مەن بىتىمگەرشىلىك جاراتىلىسىندا جاتىر», دەدى ول. قازاق حالقىنىڭ باسىنان وتكەرگەن قيىندىقتارىن سانامالاپ بەرگەن دەپۋتات سولاردىڭ بارلىعىن ەتنوس وكىلدەرى بىلەتىندىگىن العا تارتتى. «سول سەبەپتەن ءوز تاعدىرىن قازاق حالقىمەن بىرگە بايلانىستىرعان ەتنوس وكىلدەرىنە ەڭ كەرەكتىسى ەلىمىزدىڭ بىرلىگى, قوعامدىق كەلىسىم, تۇراقتىلىق جانە تاتۋلىق. سول بولاتىن بولسا, ەلباسىنىڭ «قازاقستان-2050» ستراتەگياسىندا ايتقان دامىعان 30 مەملەكەتتىڭ قاتارىنا قوسىلامىز دەگەن تاپسىرماسى مىندەتتى تۇردە ورىندالاتىن بولادى», دەدى روزاقۇل ساتىبالدى ۇلى.
اسقار تۇراپباي ۇلى,
«ەگەمەن قازاقستان».