گرەك-ريم كۇرەسىنەن قازاقستاننىڭ ۇلتتىق قۇراما كومانداسى كەزەكتى وقۋ-جاتتىعۋ جيىنىن الماتى وبلىسىنىڭ ەڭبەكشىقازاق اۋدانىنداعى جاناشىر اۋىلىندا وتكىزەدى.
بالۋاندار 29 قازاندا باس قوسىپ, 15 قاراشاعا دەيىن وسىنداعى ورتالىقتا جاتتىعادى. ۇلتتىق كوماندامىزدىڭ باس باپكەرى باقتيار بايسەيىتوۆ بۇل جيىنعا 24 بالۋاندى شاقىردى. سولاردىڭ اراسىندا قورلان جاقانشا (55 كيلو) مەيرامبەك ايناعۇلوۆ, ايدوس سۇلتانعالي (60 كيلو), المات كەبىسپاەۆ, مەيىرجان شەرماحانبەت (67 كيلو), قاھارمان قيسمەتوۆ (72 كيلو), اسحات دىلمۇحامەدوۆ, تامەرلان شادۋكاەۆ, دەمەۋ جادىراەۆ (77 كيلو) ماقسات ەرەجەپوۆ (82 كيلو), نۇرسۇلتان تۇرسىنوۆ پەن ازامات قۇستىباەۆ (87 كيلو), ەرۇلان ىسقاقوۆ (97 كيلو), نۇرماحان تىناليەۆ پەن مانسۇر شادۋكاەۆ (130 كيلو) سىندى بالۋاندار بار.
بۇل – قازاقستاننىڭ گرەك-ريم كۇرەسى شەبەرلەرى ءۇشىن كۇللى الەمدى شارلاعان كوروناۆيرۋسقا بايلانىستى جاريالانعان كارانتيننەن كەيىنگى ەكىنشى وقۋ-جاتتىعۋ جيىنى.