بوكستان بيىلعى ەل بىرىنشىلىگى قاراشا ايىندا شىمكەنت قالاسىندا وتەتىن بولىپ بەكىتىلدى. بۇل تۋرالى قازاقستان بوكس فەدەراتسياسىنىڭ ءباسپاسوز قىزمەتى مالىمدەدى.
«قازاقستان بوكس فەدەراتسياسى 2020 جىلعى ەل بىرىنشىلىگىن وتكىزۋ ءۇشىن شىمكەنت قالاسىن تاڭداپ الدى. ەرلەر دە, ايەلدەر دە ءبىر مەزەتتە سىنعا تۇسەتىن دودا 23-29 قاراشا ارالىعىندا وتەدى. شىمكەنت قالاسىنىڭ رەسپۋبليكالىق جارىستاردى ۇيىمداستىرۋدا تاجىريبەسى مول. سوندىقتان چەمپيونات ءساتتى وتەدى دەگەن سەنىمدەمىز», دەيدى قبف پرەزيدەنتى كەڭەس راقىشەۆ.
شىمكەنت قالاسى 2017 جىلى ەل بىرىنشىلىگىن, 2019 جىلى V جازعى سپارتاكيادانى ابىرويمەن وتكىزگەن. كوروناۆيرۋستىڭ الدىن الۋ جونىندەگى ۆەدومستۆوارالىق كوميسسيانىڭ مالىمەتى بويىنشا, شىمكەنت قالاسى مەن تۇركىستان وبلىسى ەپيدەميالىق جاعداي تۇراقتى سانالاتىن «جاسىل ايماققا» ەنەدى. اتالعان وڭىردە ۆيرۋس جۇقتىرعاندار از تىركەلۋدە.
ء«بىز شىمكەنت قالاسىنىڭ باس سانيتار دارىگەرىنەن رۇقسات الدىق, ەندى ەلىمىزدىڭ بار ايماعىنان كەلەتىن سپورتشىلاردى قابىلداۋعا دايىندالىپ جاتىرمىز. بۇل ەرلەر مەن ايەلدەر اراسىنداعى دودا بىرلەسە وتكىزىلەتىن العاشقى بىرىنشىلىك بولماق. وكىنىشكە قاراي, زالعا كورەرمەندەر كىرگىزىلمەيدى. ال ءبىز ۇلتتىق چەمپيوناتتى جوعارى دەڭگەيدە وتكىزۋ ءۇشىن بار كۇشىمىزدى سالامىز», دەيدى شىمكەنت بوكس فەدەراتسياسىنىڭ اتقارۋشى ديرەكتورى راحمانبەك ارعىمباەۆ.
ال ۇلتتىق قۇرامانىڭ باس باپكەرى عالىمبەك كەنجەباەۆتىڭ ايتۋىنشا, قۇرامادا جۇرگەن بارلىق سپورتشى كارانتين ۋاقىتىندا بوس جاتپاي, ءبارى ءوز بەتتەرىنشە جاتتىعۋ جاساعان. كەيىننەن الماتىداعى ايبا اكادەمياسىندا باس قوسىپ, ەكى وقۋ جاتتىعۋ جيىنىن وتكىزگەن. قازىرگى تاڭدا بارلىعى ءوز وبلىسىنىڭ جىگىتتەرىمەن ىشكى بىرىنشىلىككە تىڭعىلىقتى دايىندالىپ جاتىر. سونداي-اق باس باپكەر جارتى جىلدان اسا شارشى الاڭعا شىقپاعان شاكىرتتەرىنىڭ كۇشى بويىنا سىيماي, بارلىعى تەزىرەك جەكپە-جەك وتكىزۋگە اسىعىپ جاتقانىن جەتكىزدى.
«كارانتينگە قاراماستان, بوكسشىلار دايىندىعىن توقتاتقان جوق. فەدەراتسيانىڭ جاڭا پرەزيدەنتى كەڭەس راقىشەۆتىڭ قامقورلىعىنىڭ ارقاسىندا ۋاقىتىندا قارجىلاندىرۋ الدى. قازاقستان بوكس فەدەراتسياسىنىڭ قۇرمەتتى پرەزيدەنتى تيمۋر ق ۇلىباەۆتىڭ تاپسىرماسى بويىنشا سپورتشىلارعا جاڭا سپورتتىق فورما بەرىلدى. بىزگە جەتىسپەيتىن جالعىز نارسە – باسەكەلەستىك رۋحى, ناعىز جاۋىنگەرلىك تاجىريبە, ونسىز بوكسشىلاردىڭ شەبەرلىگى وسپەيدى. جارىستا وزدەرىن جاقسى قىرىنان كورسەتكەن جىگىتتەر ۇلتتىق قۇراماعا الىنىپ, الداعى ۋاقىتتا ەل نامىسىن قورعايتىن بولادى. سوندىقتان ءبىز وسى چەمپيوناتتان كەيىن جاڭا بوكسشىلارمەن قۇرامانى جاڭارتامىز دەگەن ويدامىن. ال جەلتوقساننان باستاپ شەتەلگە جيىندار مەن تۋرنيرلەرگە شىعامىز دەپ ۇمىتتەنەمىن», دەيدى باس باپكەر.
ايتا كەتەيىك, چەمپيوناتتى Qazsport تەلەارناسى تىكەلەي ەفيردە كورسەتۋدى جوسپارلاپ وتىر.