ەلوردادا قورعانىس ءمينيسترى نۇرلان ەرمەكباەۆ تۇركيالىق ارىپتەسى حۋلۋسي اكارمەن كەزدەستى. ەكى ەلدىڭ قورعانىس ۆەدومستۆولارى باسشىلارىنىڭ كەزدەسۋىندە وڭىرلىك قاۋىپسىزدىك, اسكەري جانە اسكەري-تەحنيكالىق ىنتىماقتاستىق, سونىڭ ىشىندە كادرلار دايارلاۋ جانە اسكەري ءبىلىم بەرۋ, جاۋىنگەرلىك دايارلىق, وقۋ-جاتتىعۋلارعا قاتىسۋ ماسەلەلەرى تالقىلاندى.
– بۇگىن تۇركيانىڭ قورعانىس ءمينيسترى حۋلۋسي اكار وسى ۆەدومستۆونىڭ باسشىسى رەتىندە قازاقستانعا العاش رەت رەسمي ساپارمەن كەلىپ وتىر. وزدەرىڭىز بىلەتىندەي تۇركيا ءبىزدىڭ ستراتەگيالىق ارىپتەسىمىز سانالادى. بۇل ستراتەگيالىق ارىپتەستىكتىڭ بەرىك نەگىزى ەڭ الدىمەن ەكى مەملەكەتتەر باسشىلارىنىڭ وتە جاقىن, سەنىمدى, دوستاستىق قارىم-قاتىناسى دەپ بىلەمىز. وسىدان ەكى جىل بۇرىن ەلباسى نۇرسۇلتان نازارباەۆتىڭ تۇركياعا رەسمي ساپارى بارىسىندا ماڭىزدى قۇجاتتارعا قول قويىلدى. اسكەري ىنتىماقتاستىق جونىندە جانە قۇپيا مالىمەتتەردى ساقتاۋ جونىندە كەلىسىم جاسالدى. ال ەندى قۇقىقتىق بازانى نىعايتۋ ماقساتىندا ەكى پروتوكول دايىندالىپ جاتىر, – دەدى نۇرلان ەرمەكباەۆ.
وسىلايشا قازاقستان مەن تۇركيا قورعانىس سالاسىنداعى ءوزارا ىنتىماقتاستىقتى دامىتۋعا ءازىر ەكەندىگىن راستاپ وتىر. بۇل رەتتە قازاقستان تۇركيامەن كوپ جوسپارلى ستراتەگيالىق قاتىناستاردى نىعايتۋعا ۇلكەن ءمان بەرەدى. ەكىجاقتى ءوزارا ءىس-قيمىلدى كەڭەيتۋدە ءبىزدىڭ مەملەكەتتەرىمىزدىڭ باسشىلارى اراسىنداعى دوستىق پەن ءوزارا تۇسىنىستىك احۋالى شەشۋشى ءرول اتقاراتىنىن دا ايتا كەتكەن ءجون.
– قادىرلى ارىپتەسىم ءارى دوسىم قورعانىس ءمينيسترى نۇرلان ەرمەكباەۆپەن جەمىستى كەزدەسۋ وتكىزدىك. ءبىز ەكى ەل اراسىنداعى قورعانىس ماسەلەسىنە قاتىستى ىنتىماقتاستىعىمىزدىڭ اۋقىمىن ودان ءارى كەڭەيتۋدى جانە نىعايتا ءتۇسۋدى تالقىلادىق. مەملەكەتتەر باسشىلارىنىڭ ءوزارا ديالوگى مەن تىعىز قارىم-قاتىناسىنىڭ ارقاسىندا ءبىزدىڭ جۇمىسىمىز اسا جەڭىل ءجۇردى دەپ ايتا الامىن. وسىلايشا ءبىز قول جەتكىزىلگەن كەلىسىمدەردى جۇزەگە اسىرۋ ماسەلەسىن كەڭەستىك. مەن ەندى يندۋستريا جانە ينفراقۇرىلىمدىق دامۋ مينيسترلىگىنە بارىپ, بەيبىت اتامقۇلوۆ مىرزامەن كەزدەسپەكپىن. وندا ءبىز قورعانىس ونەركاسىبى تۋرالى اڭگىمەلەسەتىن بولامىز. سونداي-اق وسى مۇمكىندىكتى پايدالانا وتىرىپ, ماعان جانە مەن باستاپ كەلگەن دەلەگاتسياعا زور قۇرمەت كورسەتىپ جاتقانى ءۇشىن ارىپتەسىم نۇرلان ەرمەكباەۆقا شىنايى العىسىمدى بىلدىرەمىن. ەكى ەل اراسىنداعى ىنتىماقتاستىقتى نىعايتۋعا ۇلەسىن قوسىپ جۇرگەن قورعانىس ۆەدومستۆوسىنىڭ باسشىلىعىنا, بارشا اسكەري قىزمەتشىلەرگە العىس ايتامىن, – دەدى ح.اكار.
2018 جىلدىڭ قىركۇيەگىندە قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ انكاراعا رەسمي ساپارى بارىسىندا بىرقاتار ماڭىزدى ەكىجاقتى قۇجاتتارعا, سونىڭ ىشىندە اسكەري ىنتىماقتاستىق تۋرالى كەلىسىمگە قول قويىلعان بولاتىن. تۇرىك قارۋلى كۇشتەرى مەن باس شتابى العاشقىلاردىڭ ءبىرى بولىپ قازاقستاننىڭ قارۋلى كۇشتەرىنە ولاردىڭ قالىپتاسۋى مەن دامۋىنىڭ باستاپقى كەزەڭىندە جان-جاقتى قولداۋ كورسەتتى.
تۇرىك رەسپۋبليكاسى 1990 جانە 2000 جىلداردىڭ باسىندا ۇيىمداستىرۋ تەحنيكاسىن, كارتوگرافيالىق جابدىقتاردى, بايلانىس قۇرالدارىن, ءجۇرىپ ءوتۋ مۇمكىندىگى جوعارى اۆتوموبيلدەردى قوسا العاندا, قازاقستاندىق قارۋلى كۇشتەر ءۇشىن وتەۋسىز نەگىزدە اسكەري م ۇلىك جەتكىزدى.
بۇدان ءارى تاراپتار كوپماقساتتى جەڭىل بروندالعان اۆتوموبيلدەردى, وپتيكالىق-ەلەكتروندىق قۇرالداردى جەتكىزۋ جانە بىرلەسىپ ءوندىرۋ جولىمەن ءوزارا ءتيىمدى ءوزارا ءىس-قيمىلعا كوشتى. اسكەري ءبىلىم بەرۋ شەڭبەرىندە تۇركيانىڭ اسكەري ۋچيليششەلەرىندە كۋرسانتتاردى وقىتۋ جۇرگىزىلەدى, سونداي-اق قازاقستان قارۋلى كۇشتەرىنىڭ اسكەري قىزمەتشىلەرىن ءتۇرلى وقۋ ورتالىقتارىندا دايارلاۋ جۇزەگە اسىرىلادى. 2020 جىلعا قازاقستاندىق تاراپتىڭ ءوتىنىشى بويىنشا «كيبەرقاۋىپسىزدىك» ماماندىعى بويىنشا وقىتۋ ءۇشىن كۆوتالار ءبولىندى.
ءوز كەزەگىندە, وتكەن جىلى قازاقستان قورعانىس مينيسترلىگى العاش رەت تۇرىك اسكەري قىزمەتشىلەرىن ۇلتتىق قورعانىس ۋنيۆەرسيتەتىنىڭ بازاسىندا وقىتۋدى ۇيىمداستىردى. كەلىسسوزدەر بارىسىندا وسى باعىتتاعى ىنتىماقتاستىقتى جالعاستىرۋ تۋرالى شەشىم قابىلداندى. جاۋىنگەرلىك دايارلىق سالاسىنداعى ىنتىماقتاستىقتىڭ نەعۇرلىم وزەكتى باعىتتارىنىڭ ءبىرى – ارنايى وپەراتسيالار كۇشتەرىن دايارلاۋ (ديۆەرسياعا قارسى, تاۋ-كەن, سۇڭگۋىرلىك دايارلىق, قالالىق جاعدايلارداعى ءىس-قيمىلدار).
قازاقستاندىق اسكەري قىزمەتشىلەردىڭ تۇركيا اۋماعىندا قىسقى كەزەڭدە تومەن تەمپەراتۋرالار كەزىندە وتكىزىلەتىن «ەفەس» كوپۇلتتى وقۋ-جاتتىعۋىنا جانە «كىش» وقۋ-جاتتىعۋىنا قاتىسۋى جاۋىنگەرلىك دايارلىق دەڭگەيىن ارتتىرۋعا, سونداي-اق ءارتۇرلى جاعدايلاردا جاۋىنگەرلىك ءىس-قيمىلدار داعدىلارىن پىسىقتاۋعا مۇمكىندىك بەرەدى.
كەزدەسۋ سوڭىندا قورعانىس ءمينيسترى نۇرلان ەرمەكباەۆ تۇركيا قورعانىس ءمينيسترىنىڭ قازاقستانعا ساپارىنىڭ قورىتىندىلارى اسكەري جانە اسكەري-تەحنيكالىق سالاداعى ەكىجاقتى ءوزارا ءىس-قيمىلعا جاڭا سەرپىن بەرەتىنىن جانە قاۋىپسىزدىك مۇددەلەرىنە قىزمەت ەتەتىنىن اتاپ ءوتتى.