سولتۇستىك قازاقستان وبلىسىنداعى احۋال الاڭداتارلىق حالدە قالىپ وتىر. وسىعان بايلانىستى وبلىس اكىمى قۇمار اقساقالوۆ دا ۇندەۋ جاريالاپ, حالىقتى ساقتانۋعا شاقىرعان ەدى. وسىدان كەيىن ءتيىستى قىزمەتتەر دە جاعدايدىڭ وڭاي ەمەس ەكەنىن جەتكىزىپ, كوممۋنيكاتسيانىڭ ايماقتىق قىزمەتىندە بريفينگ بەردى. تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باستىعىنىڭ ورىنباسارى تاتيانا گورلوۆا مەن وبلىستىق دەنساۋلىق ساقتاۋ باسقارماسى باستىعىنىڭ ورىنباسارى قۇمار كۇسەمىسوۆ جاعدايدىڭ وڭاي ەمەس ەكەندىگىنە نازار اۋداردى.
بۇگىنگى تاڭدا بارلىعى 4 326 ادام ناۋقاسقا شالدىققان. سونىڭ ىشىندە سوڭعى تاۋلىكتەردە عانا 9 ادامنىڭ بويىنان ۆيرۋس تابىلىپتى. رەسەي فەدەراتسياسىنان كەلىپ جاتقاندار اراسىنان ۆيرۋس تاسۋشىلار كوپتەپ تابىلۋدا. وسى 9 ادامنىڭ 3-ەۋى سول ەلدەن كەلگەندەر. ەڭ سوراقىسى سول, سوڭعى ەكى اپتادا جامان ىندەتكە ۇشىراعاندار سانى 1,5 ەسە ارتقان. ياعني 103-تەن 157-گە جەتكەن. سونىڭ 37 پايىزى, ياعني 58-ءى سىرتتان كەلگەندەردەن شىققان.
مەديتسينا قىزمەتكەرلەرى ىندەتتى انىقتاۋ جولىنداعى جۇمىستارىن جەتىلدىرە تۇسكەن. بۇگىنگى تاڭدا وبلىستىڭ 117 مىڭ تۇرعىنى تەستىلەۋدەن وتكىزىلگەن. بۇل بارلىق تۇرعىنداردىڭ 21 پايىزى دەگەن ءسوز. سوڭعى اپتادا الدىڭعىعا قاراعاندا تەستىلەۋدەن وتكەندەر سانى 1,6 ەسە ارتىق بولعان نەمەسە الدىڭعى اپتادا 4 541 ادام وتسە, سوڭعىدا 7 414 ادام تەستىلەۋدەن ءوتىپتى. سونىڭ ناتيجەسىندە بويىنان ىندەتتىڭ بەلگىلەرى تابىلعان ادامدار سانى 17 پايىزعا ارتقان.
جامان ىندەتتىڭ ءبىر ەرەكشەلىگى – ول يممۋنيتەتى السىرەگەن, قارتاڭ ادامدار اراسىندا كوپ كەزدەسەدى. سولتۇستىكتە دە بارلىق ناۋقاستاردىڭ اراسىندا 60-تان اسقانداردىڭ ۇلەسى 26%, ال 50 مەن 59 جاس اراسىنداعىلار 20%, 30 بەن 39 جاس اراسىنداعىلار 18% بولىپ وتىر. ال 15 پەن 18 جاس ارالىعىنداعىلاردىڭ ۇلەسى – 2%.
ىندەتتىڭ جۇمىس ىستەيتىندەر, زەينەتكەرلەر, جۇمىس ىستەمەيتىندەر اراسىنداعى تارالىمى دا نازار اۋدارتادى. اۋرۋعا ۇشىراعانداردىڭ ەڭ كوبى جۇمىس ىستەيتىندەر ەكەن. بۇلاردىڭ جۇمىس پەن ءۇي ماسەلەلەرى اراسىنداعى الاڭداۋشىلىقتارى يممۋنيتەتتى السىرەتەتىن بولسا كەرەك. سوندىقتان دا ولاردىڭ بارلىق ناۋقاستاردىڭ اراسىنداعى ۇلەسى 30%-دى قۇراپ وتىر. ال جۇمىس ىستەمەيتىندەردىڭ ۇلەسى – 19%. زەينەتكەرلەر 21 پايىزدىق ۇلەستى قامتىعان. مەديتسينا قىزمەتكەرلەرى اراسىنداعى تارالىم – 9%, ال مەكتەپ وقۋشىلارى اراسىنداعى ۇلەس – 4%. وسىنىڭ ءبارى ىندەتتىڭ قالاي قوزدانۋىن, كىمدەرگە ايرىقشا اسەر ەتۋىن انىقتاۋ ءۇشىن كەرەك دەيدى ماماندار.
قازىر وبلىسقا سىرتتان كەلەتىندەر مۇقيات تەكسەرۋدەن وتە باستادى. اسىرەسە, رەسەي فەدەراتسياسىنان كەلگەندەر ىجداھاتتى تەكسەرىلەدى. مەملەكەتتىك شەكارانىڭ بويىندا 3 بەكەت اشىلعان, وندا كارانتيندىك ستاتسيونارلار بار. سوڭعى اپتادا مەملەكەتتىك شەكارادان بارلىق ءۇش بەكەتتەن 4 509 ادام وتكەن. كۇدىك كەلتىرىلىپ, كارانتيندىك ستاتسيونارلارعا ورنالاستىرىلعان 352 ادامنىڭ 20-سىنىڭ بويىنان ىندەت تابىلدى. بۇلار قازاقستان ازاماتتارى بولسا, كۇدىكتى دەلىنگەن 8 شەتەلدىك ازاماتتىڭ شەكارادان بەرى وتۋىنە رۇقسات بەرىلمەگەن.
ىندەتكە ۇشىراعان وبلىس تۇرعىندارىنىڭ 56 پايىزى پەتروپاۆل قالاسىنىڭ تۇرعىندارى بولىپ وتىر. 3 اۋداننىڭ تۇرعىندارى بەس پايىزدىق ۇلەستەن استى. سونىڭ ىشىندە قىزىلجار اۋدانىندا – 7 پايىز, ياعني – 321, م.جۇماباەۆ اۋدانىندا – 6 پايىز, ياعني – 276, تايىنشا اۋدانىندا – 5 پايىز, ياعني – 233 ادام.
وبلىس اكىمىنىڭ جانىنداعى ايماقتىق كوميسسيانىڭ وتىرىسىندا جامان ىندەتكە ۇشىراعاندار سانى 7 ادامنان اسسا, اۋدان ورتالىقتارى مەن ەلدى مەكەندەردى جابۋ تۋرالى شەشىم قابىلدانعان. وسى تالاپقا سايكەس التى اۋدانداعى 10 ەلدى مەكەن جابىلدى. سونىڭ ىشىندە بۋلاەۆ, مامليۋت, ياۆلەنكا سياقتى اۋدان ورتالىقتارى بار. وندا ەپيدەميالىق جاعداي جاقسارعانشا كارانتين الىنبايدى.
جامان ىندەتكە بايلانىستى شەكتەۋلەردىڭ ورىندالۋىن تەكسەرۋ جونىندەگى مونيتورينگتىك توپ بۇگىنگە دەيىن 969 حاتتاما تولتىردى. ونىڭ 884-ءى جەكە ادامدارعا جاسالدى. ال شارۋاشىلىق سۋبەكتىلەرىنىڭ 83-ءى وسىنداي جازا تارتتى. سونىڭ ىشىندە ەكى لاۋازىمدىق تۇلعا بار. بارلىق سالىنعان ايىپپۇل كولەمى 53 ملن تەڭگە بولىپ وتىر.
ىندەتتىڭ بالالار اراسىنداعى تارالىمى دا از ەمەس. وقۋ جىلى باستالعاننان بەرى 30 وقۋشىنىڭ ىندەتكە ۇشىراعانى انىقتالدى. ونىڭ جارتىسى مەكتەپتە وقيتىندار بولسا, قالعان جارتىسى قاشىقتان وقيتىندار. مەكتەپتەردىڭ كارانتين تالابىن ورىنداۋىن تەكسەرۋ بارىسىندا 10 مەكتەپتە وقۋدى توقتاتۋ جونىندە قاۋلى قابىلدانعان. وندا تالاپتاردى بۇزۋشىلىققا جول بەرىلگەن. الايدا جۋىردا ونداعى شەكتەۋ شارالارى الىنىپ, مەكتەپتەر قايتا اشىلدى. بارلىعى 126 مەكتەپكە مونيتورينگ جاسالدى.
وبلىستاعى جامان ىندەتتىڭ احۋالى ازىرگە وسىنداي.
سولتۇستىك قازاقستان وبلىسى