قۇرلىقتىق حوككەي ليگاسىندا (قحل) باق سىنايتىن قازاقستاننىڭ «بارىسى» ەلورداداعى «بارىس ارەنا» مۇزايدىنىندا قازاننىڭ «اك بارسىن» قابىلدادى.
حالىقارالىق بارىس كۇنىنە تۇسپا-تۇس كەلگەن ەكى بارىستىڭ باسەكەسىندە «اك بارس» كومانداسى جەڭىسكە جەتتى. كەزدەسۋدىڭ ءبىرىنشى كەزەڭىندە حوككەيشىلەر ءبىر-ءبىرىنىڭ قاقپاسىنا شايبا سوعا المادى. ەكىنشى 20 مينۋتتىقتى ءساتتى باستاعان ەلوردالىقتار 22-مينۋتتا ەسەپتى اشتى. شايبا اۆتورى – نيكيتا ميحايليس. دەگەنمەن ارادا 7 مينۋت وتكەن «اك بارس» شابۋىلشىسى كيريلل پەتروۆ مەرگەندىگىمەن كوزگە ءتۇسىپ, تارازى باسىن تەڭەستىرىپ كەتتى.
ءۇشىنشى كەزەڭدە قازان كومانداسى ەپتىلىك تانىتتى. 43-مينۋتتا دميتري يۋدين كومانداسىن العا شىعارسا, كەزدەسۋدىڭ اياقتالۋىنا ءۇش مينۋت قالعاندا ۆيكتور تيحونوۆ «اك بارستىڭ» ءۇشىنشى شايباسىن سوعىپ, كەزدەسۋدىڭ نۇكتەسىن قويدى. قورىتىندى ەسەپ – 3:1. «بارىس» كەلەسى كەزدەسۋىن بۇگىن نوۆوسيبيرسكىدە «سيبير» كومانداسىمەن وتكىزەدى.