بۇگىن ەلىمىزدەگى وزىق جوو-نىڭ ءبىرى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن "قازاق راديولارى" سەرىكتەستىگى شىعارماشىلىق جانە كاسىبي بايلانىستى نىعايتۋ ماقساتىندا مەموراندۋمعا قول قويدى, دەپ حابارلايدى Egemen.kz. بۇل تۋرالى "قازاق راديولارى" جشس باسديرەكتورى ەرنۇر بۋراحان جازدى.
ونىڭ نەگىزىندە ۋنيۆەرسيتەت ۇجىمى "قازاق راديولارى" راديوستۋديا بازاسىندا القاسوز, سەمينار, ترەنينگ, ۆيدەو-كونفەرەنتسيالار وتكىزەدى. ال سەرىكتەستىك جۋرناليستيكا جانە ساياساتتانۋ فاكۋلتەتى ستۋدەنتتەرىنە نۇر-سۇلتان جانە الماتى قالالارىنداعى رەداكتسيالاردا وقۋ جانە وندىرىستىك تاجىريبەدەن وتۋگە جاعداي جاسايدى.
قازاق رۋحانياتىنىڭ قاراشاڭىراعى 100 جىلدىعىن تويلار جىلى ەۇۋ شيرەك عاسىرعا قادام باسادى. ايتۋلى قوس مەرەكە قارساڭىندا بىرلەسە اتقارار جوبالار دا جەتەرلىك.
"رەكتورى ەرلان ءباتتاش ۇلىنىڭ ىسكەرلىگى مەن كورەگەندىگىنىڭ ناتيجەسىندە ۋنيۆەرسيتەت بيىلدان باستاپ سپورت ءجۋرناليسىن ارنايى ماماندىق رەتىندە ەنگىزگەن ەلىمىزدەگى تۇڭعىش جوعارعى وقۋ ورنىنا اينالدى. ال "قازاق راديولارى" سەرىكتەستىگىنىڭ 20-دان استام قىزمەتكەرى وسى ۋنيۆەرسيتەت تۇلەگى. حالىقارالىق ءبىلىم ارەناسىندا وزىندىك ورنى بار ەۇۋ قابىرعاسىندا جۋرناليستيكا ماسەلەلەرىن زەرتتەيتىن ينستيتۋت تا اشىلعان بولاتىن. ونىڭ ديرەكتورى – راجيوجۋرناليستيكانىڭ جاناشىرى, وسى سالادا توم-توم ەڭبەك جازعان پروفەسسور نامازالى وماشەۆ اعامىز. بۇگىنگە دەيىن دە "قازاق راديولارى" مەن ەۇۋ بىرلەسە اتقارعان جۇمىستار جەتەرلىك. الدا دا ەكىجاقتى ىنتىماقتاقتاستىق ارقاسىندا اۋقىمدى جۇمىستار اتقارىلا بەرەتىنىنە كامىل سەنەمىز", دەدى ەرنۇر بۋراحان.
ايتا كەتەيىك, بۇعان دەيىن سەرىكتەستىك ءال-فارابي اتىنداعى قازاق ۇلتتىق ۋنيۆەرسيتەتىمەن ەكىجاقتى بايلانىس ورناتتى. كەلىسىمگە سايكەس قازاق راديوسىنىڭ 100 جىلدىعى قارساڭىندا ۋنيۆەرسيتەت عيماراتىندا راديوستۋديا اشۋ جۇمىسى باستالىپ كەتتى. ⠀