قۇرلىقتىق حوككەي ليگاسىنىڭ (قحل) كەزەكتى تۋر ويىنىن «بارىس ارەنادا» وتكىزگەن ەلوردانىڭ «بارىسى» «يوكەريت» (فينليانديا) كومانداسىنان وۆەرتايمدا جەڭىلىپ قالدى.
جالپى سپورتتا جەڭىس پەن جەڭىلىستىڭ قاتار جۇرەتىنى بەلگىلى عوي. بىراق «بارىستىڭ» كەشەگى جەڭىلىسى كومانداعا دا, جانكۇيەرلەرگە وتە اۋىر ءتيدى. ماتچ بويى ويىن جاعىنان دا, گول سوعۋ بويىنشا دا قارسىلاسىنان الدا تۇرىپ, كەزدەسۋ سوڭىندا جەڭىلىپ قالۋ قاشان دا وڭايعا سوقپايتىنى بەلگىلى. ويىننىڭ ءۇشىنشى كەزەڭىنىڭ باسىندا 4:0 ەسەبىمەن الدا تۇرعان جەرلەستەرىمىز اينالدىرعان 15 مينۋتتىڭ ىشىندە 4 شايبا وتكىزىپ الدى.
العاشقى 20 مينۋتتا ەكى كوماندا ءبىر-ءبىرىنىڭ قاقپاسىنا شايبا سوعا الماعانىمەن, ءبىزدىڭ جىگىتتەر كەزدەسۋدى تاماشا باستادى. العاشقى مينۋتتان شابۋىل شەبىندە سەنىمدى ويىن كورسەتتى. ۇزىلىستەن كەيىن ىسكە كىرىسكەن «بارىس» حوككەيشىلەرى ءا دەگەننەن ەكى شايبا سوعىپ, ەكىنشى كەزەڭدى ءساتتى باستادى. كەزدەسۋدىڭ ەسەبىن 25-مينۋتتا «بارىستىڭ» ءتورتىنشى تورتتىگىندە ونەر كورسەتەتىن ەگور پەتۋحوۆ اشتى. ارادا 12-مينۋت وتكەندە اركادي شەستاكوۆ مەرگەندىگىمەن كوزگە ءتۇسىپ, تابلوداعى كورسەتكىشتى ەسەلەي ءتۇستى. ەكىنشى كەزەڭدى جەڭىسپەن تۇيىندەگەن جەرلەستەرىمىز ءۇشىنشى كەزەڭنىڭ العاشقى 5 مينۋتىندا بىلگەنىنەن جاڭىلعان جوق. 42 جانە 44 مينۋتتاردا «بارىستىڭ» شۆەتسيالىق ەكى لەگيونەرى قاتارىنان ەكى شايبا سوعىپ, ەسەپتى 4:0-گە جەتكىزدى. بۇل گولداردىڭ اۆتورلارى – ياكوب ليليا مەن لينۋس ۆيدەلل.
ءتورتىنشى گولدان كەيىن جەرلەستەرىمىز جەڭىسكە جەتەتىنىنە سەنىمدى بولىپ, مۇزايدىندا وزدەرىن ەركىن ۇستاي باستادى. وسىنىڭ سالدارىنان «يوكەريت» تاراپىنان گولدار شەرۋى باستالدى. العاش پەتەر رەگين مەرگەندىگىمەن كوزگە تۇسسە, كەيىننەن دۋبل اۆتورى اتاندى. سونىمەن قاتار توممي كيۆيستيو مەن ميككو لەحتونەن ءبىر-بىردەن شايبا سوقتى. ال قوسىمشا ۋاقىتتا داۆيد سكلەنيچكا «بارىس» قاقپاسىن ءدال كوزدەپ, كومانداسىنا تاماشا جەڭىس سىيلادى.