مەملەكەت باسشىسى نۇرسۇلتان نازارباەۆ كسرو حالىق ءارتسى, قازاق كسر حالىق ءارتىسى, اسا كورنەكتى وپەرا ءانشىسى ەرمەك سەركەباەۆتىڭ قايتىس بولۋىنا بايلانىستى وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى. بۇل تۋرالى اقوردانىڭ ءباسپاسوز قىزمەتى حابارلادى.
جەدەلحاتتا ءوز دارا داۋىسى ارقىلى جاستاي تانىلعان ەرمەك سەركەباەۆتىڭ ءومىر بويى ەلىمىزدىڭ باستى ونەر ورداسى – اباي اتىنداعى قازاق مەملەكەتتىك وپەرا جانە بالەت تەاترىندا جەمىستى ەڭبەك ەتكەنى اتاپ وتىلگەن.
«داۋىسى قانداي اسەم بولسا, جانى دا سونداي سۇلۋ ونىڭ ورىنداۋىنداعى قازاقتىڭ حالىق اندەرى مەن الەمدىك وپەرا تۋىندىلارىنداعى باستى اريالار تىڭداۋشىلاردىڭ جانىن ءاردايىم نۇرعا بولەيتىن», – دەلىنگەن جەدەلحاتتا.
مەملەكەت باسشىسى ەرمەك سەركەباەۆتىڭ الەمنىڭ كوپتەگەن ەلدەرى ساحنالارىندا ونەر كورسەتۋ باقىتىنا يە بولىپ, حالىقارالىق اۋديتوريا ىقىلاسىنا بولەنگەنىن اتاپ وتكەن. ول كونسەرۆاتوريادا ۇستازدىق ەتە ءجۇرىپ, كەڭىنەن تانىمال بولعان كوپتەگەن شاكىرتتەر دە تاربيەلەدى. كسرو جوعارعى كەڭەسىنىڭ, سونداي-اق قازاق كسر-نىڭ دەپۋتاتى بولىپ سايلاندى. سوتسياليستىك ەڭبەك ەرى اتاعىنا يە بولىپ, «وتان» وردەنىمەن ماراپاتتالدى.
قازاقستان پرەزيدەنتى ەرمەك سەركەباەۆتىڭ ەڭبەگى ەلىمىزدىڭ ءان ونەرى تاريحىندا, ال ەسىمى حالقىمىزدىڭ جۇرەگىندە ءاردايىم ساقتالاتىنىنا سەنىمىن بىلدىرگەن.