ۆەلوسپورتتان الەمدەگى ەڭ ماڭىزدى ءۇش ءىرى جارىستىڭ ءبىرى سانالاتىن «يسپانيا ۆۋەلتاسى» گراند-تۋرىنىڭ جالاۋى جەلبىرەدى. 8 قاراشاعا دەيىن جالعاساتىن باسەكەگە قازاقستاندىق «استانا» ۆەلوكومانداسىنىڭ وكىلدەرى دە قاتىسىپ جاتىر.
75 جىلدىق تاريحى بار ايگىلى دودادا تالاي مىقتى ۆەلوشاباندوزداردىڭ ونەر كورسەتكەنى بەلگىلى. بيىل دا بۇل جارىستان اتاقتى سپورتشىلار تىس قالعان جوق. اتاپ ايتار بولساق, اتاقتى «تۋر دە فرانس» باسەكەسىنىڭ ءتورت دۇركىن (2013, 2015, 2016, 2017) جەڭىمپازى, «يسپانيا ۆۋەلتاسى» (2017) مەن «دجيرو د'يتاليا» (2018) دوداسىندا ءبىر مارتە دارا شىققان بريتانيالىق كريس فرۋم, جۋىردا عانا مارەسىنە جەتكەن «تۋر دە فرانستا» ەكىنشى ورىن يەلەنگەن سلوۆەنيالىق پريموج روگليچ, بىلتىرعى «دجيرو د'يتاليا» دوداسىنىڭ باس جۇلدەسىن ولجالاعان ەكۆادورلىق ريچارد كاراپاس جانە 2017 جىلعى جەڭىمپاز توم ديۋمۋلەن (نيدەرلاند) جانە تاعى باسقا ەسىمدەرى الەمگە ايگىلى ۆەلوشباندوزدار وسى جارىستىڭ كورىگىن قىزدىرۋدا.
اتالعان جارىسقا ەلىمىزدىڭ «استانا» ۆەلوكومانداسىنىڭ الەكساندر ۆلاسوۆ, يون يساگيررە, گوركا يساگيررە, لۋيس لەون سانچەس, ومار فرايلە, الەكس ارانبۋرۋ, دميتري گرۋزدەۆ جانە مەرحاۆي كۋدۋس سەكىلدى سپورتشىلارى قاتىسىپ, باس جۇلدە ءۇشىن باق سىناپ جاتىر. ارينە جانكۇيەرلەر دە, كلۋب باسشىلىعى دا بۇل قۇراممەن جارىستىڭ كوشىن باستاۋ وڭاي ەمەس ەكەنىن جاقسى تۇسىنەدى. ايتكەنمەن لوندون وليمپياداسىنىڭ چەمپيونى الەكساندر ۆينوكۋروۆ باسشىلىق ەتەتىن ۇجىم «ۆۋەلتادا» جوق دەگەندە كەزەڭ جەڭىمپازى اتانۋ ءۇشىن بار كۇشىن سالاتىنى انىق. ويتكەنى يسپانيا تاس جولىندا «استانانىڭ» جەڭىسپەن ورىلگەن ءداستۇرلى جولى بار. ماسەلەن, 2006 جىلى الەكساندر ۆينوكۋروۆ باستاپ بەرگەن جەڭىستى البەرتو كونتادور (2008) مەن فابيو ارۋ (2015) ءساتتى جالعاعان. سونىمەن قاتار بىلتىرعى دودادا ميگەل انحەل لوپەس پەن ياكوب فۋلسانگ كەزەڭ جەڭىمپازى اتانسا, «استانا» كوماندالىق ەسەپتە ۇزدىكتەر قاتارىنان كورىندى.
وزگە جارىستار سياقتى «يسپانيا ۆۋەلتاسى» دا بيىل ەرەكشە جاعدايدا ءوتىپ جاتىر. كوروناۆيرۋس پاندەمياسىنا بايلانىستى وسى جىلعى بارلىق جارىس بەلگىلەنگەن ۋاقىتىنان كەش ۇيىمداستىرىلعانى بەلگىلى. سوندىقتان بيىل ءبىرىنشى مارتە ۆەلوشاباندوزدار اراسىنداعى ەڭ مارتەبەلى ەكى جارىس – «يسپانيا ۆۋەلتاسى» مەن «دجيرو د'يتاليا» دوداسى تاريحتا العاش رەت ءبىر ۋاقىتتا وتكىزىلىپ جاتىر. سونداي-اق الەمدەگى كوروناۆيرۋستىڭ ەكىنشى تولقىنىنا بايلانىستى «ۆۋەلتاعا» ادەتتەگىدەن از كوماندا قاتىسىپ جاتقانىن دا ايتا كەتەيىك.
يسپانيا تاس جولىندا ءوتىپ جاتقان جارىستىڭ العاشقى كۇنىندە بىلتىرعى جەڭىمپاز – سلوۆەنيالىق پريموج روگليچ (Team Jumbo – Visma) توپ جاردى. يرۋن – ارراتە قالالارىن جالعاعان 173 شاقىرىمدىق قاشىقتىقتى ول 4 ساعات, 22 مينۋت, 34 سەكۋندتا باسىپ ءوتتى. روگليچتەن 1 سەكۋندقا ارتتا قالىپ قويعان ەكۆادورلىق ريچارد كاراپاس (Ineos) پەن يرلانديالىق ۆەلوشاباندوز دەنيەل مارتين (Israel Start-Up Nation) ەكىنشى جانە ءۇشىنشى ورىندى ءوزارا ءبولىستى. «استانا» كومانداسىنان ءبىرىنشى كەزەڭدە جاقسى ناتيجەگە يسپانيالىق گوركا يساگيررە قول جەتكىزدى. مارە سىزىعىن 13-ءشى بولىپ كەسكەن يساگيررە جەڭىمپازدان 51 سەكۋندقا قالىپ قويدى. سونىمەن قاتار قالىڭ توپپەن بىرگە كەلگەن «استانانىڭ» تاعى ەكى وكىلى – لۋيس لەون سانچەس پەن الەكساندر ۆلاسوۆ 41 جانە 42-ورىندارعا جايعاستى.