لوماچەنكو-لوپەس: جاستىڭ اتى جاس ەكەن

جىل جەكپە-جەگى دەپ سانالعان ايقاستا جانكۇيەرلەر دە, بوكس ماماندارى دا ءاۋ باستا ءوز سالماعىندا WBA Super, WBC Franchise جانە WBO نۇسقالارى بو­يىنشا چەمپيوندىق بەلبەۋدىڭ يەگەرى 32 جاستاعى ۋكراينالىق بوكسشىنىڭ جەڭىسىنە سەنىمدى بولدى. ءتىپتى تەوفيمو لوپەستىڭ ەنشىسىندە IBF تۇجىرىمىنىڭ الەم چەمپيو­نى دەگەن اتاعى بولسا دا, لوماچەنكودان وڭباي تاياق جەيتىنىن ايتىپ, سەنىمدى سوي­لەگەندەر دە جان-جاقتان تابىلىپ جاتتى. ونىڭ ۇستىنە اۋەسقوي بوكستا ءبىر عا­نا جەكپە-جەگىندە جەڭىلىپ, قالعان بار­لىق ايقاسىندا قارسىلاستارىن قوعاداي جا­پىرعان لوپەسكە قاراعاندا تاجىريبەلى لوماچەنكو بۇل ايقاستىڭ ءسوزسىز ءفاۆوريتى ەدى. ءوز زامانىندا ەكى دۇركىن الەم جانە وليمپيا ويىندارىنىڭ جەڭىمپازى اتانعان ۋكراينالىق كاسىپقوي بوكستا دا ءبىراز بوكسشىنىڭ مىسىن باسىپ, قارسىلاس شاق كەلتىرمەي جۇرگەن-ءدى.

جەكپە-جەك الدىنداعى ءباسپاسوز ءماسليحاتىندا جۋرناليستەردىڭ سۇراعىنا جاۋاپ بەرگەن ۋكراينالىق بوكسشى: «كەزدەسۋ بارىسىندا شاحمات تاكتيكاسىن قول­دانىپ, ايقاس بارىسىندا جۇدىرىقتاسۋ مانەرىمدى وزگەرتىپ وتىرامىن», دەگەن بولاتىن. بىراق بارشا جانكۇيەر جەكپە-جەكتە لوماچەنكونىڭ ونەرىنەن ەرەكشە ەشتەڭە بايقاي المادى. التىنشى راۋندقا دەيىن تەك اياقپەن جۇمىس ىستەپ, رينگ جاعالاي جۇرگەننەن باسقا ەشتەڭە ىستەي العان جوق. ءتىپتى ءبىرىنشى راۋندتا قارسىلاسىنا بىردە-ءبىر سوققى جۇمساي المادى.

ال لوپەس قارسىلاستىڭ كەز كەلگەن جوسپارىنا قارسى بىرنەشە تاكتيكاسى دايىن ەكەنىن ايتتى. «ەگەر لوماچەنكو شەگىنىپ ءجۇرىپ ۇرىس سالاتىن بولسا نەمەسە العا قاراي ۇمتىلىپ, ءبىرىنشى نومىرمەن جۇدىرىقتاسسا ءبىز وعان دا دايىنبىز», دەپ جاۋاپ بەرگەن-ءدى. جەكپە-جەك باستا­لا سالىپ تىزگىندى ءوز قولىنا العان تەوفيمو لوپەس راۋند سايىن قارقىنىنا قارقىن قوسىپ وتىردى. راس, جەكپە-جەكتىڭ ءبىرىنشى بولىگىندە كوپ سوققى جاساعانىمەن, لوماچەنكوعا ءدوپ تيگەنى از بولدى. بىراق قارسىلاسقا قاراعاندا بەلسەندى ءىس-قيمىل كورسەتتى. التىنشى راۋندتان باستاپ قانا ىسكە كىرىسكەن لوماچەنكو سەريالىق سوققىلارىن جۇمساي باستادى. الايدا ۆاسيلي رينگتە كەش ويانعانىن ءوزى دە سەزگەن شىعار. 12 راۋندتا ەكى بوكسشى ءبىر-ءبى­رىن ايقىن جەڭە الماعان سوڭ, جەڭىم­­پاز بوكسشىنى انىقتاۋ تورەشىلەرگە بۇيىر­دى. جەكپە-جەككە باعا بەرگەن ءۇش تورەشى امەريكالىق تەوفيمو لوپەستىڭ جەڭىسى­نە كۇمان كەلتىرمەيتىنىن مالىمدەپ, ءبىراۋىز­دان ونىڭ جەڭىسكە جەتكەنىن جاريالادى.

جەكپە-جەكتەن كەيىن پىكىر بىلدىرگەن ۋكراينالىق بوكسشى تورەشىلەردىڭ شەشى­مىمەن كەلىسپەيتىنىن جەتكىزدى. «شىنىمدى ايتسام, جەكپە-جەكتىڭ العاشقى التى راۋندى تەڭ دارەجەدە ءوتتى. ءيا, ءبىر-ەكى راۋندتا لوپەس باسىم تۇسكەن شىعار, بىراق قالعان التى راۋندتا مەن جەڭىسكە جەتتىم دەپ ەسەپتەيمىن. سوندىقتان تورەشىلەردىڭ شەشىمىمەن كەلىسپەيمىن. بىراق تورەشى مەنىڭ قولىمدى كوتەرمەگەن سوڭ ءبارى بەكەر», دەيدى ول. ال جەڭىل سالماقتاعى ءتورت بەلبەۋدى يىعىنا تاققان لوپەس: «بۇگىن مەن جەڭىسكە لايىق ونەر كورسەتتىم جانە مەن جەڭدىم», دەپ قىسقا قايىردى.

اقش-تا جۇدىرىقتاسىپ جۇرگەن قازاقستاندىق بوكسشى ماديار اشكەەۆ لوپەسكە قاراعاندا لوماچەنكو جەڭىسكە ابدەن لايىق بولدى, بىراق بۇل جەردە ساياسات پەن بيزنەس ءوز اسەرىن تيگىزبەي قويمادى دەپ ەسەپتەيدى.

«لوماچەنكو العاشقى التى راۋندتا تۇك ىستەي الماعانىمەن, جەكپە-جەكتىڭ ەكىنشى بولىگىندە كوپ سوققى جاساپ, بەلسەندى بولدى. ادەتتە مۇنداي تەڭ دارەجەدە وتكەن جەكپە-جەكتە جەڭىستى چەمپيوندىق راۋندتا (10, 11, 12 راۋندتار – رەد.) باسىم بولعان بوكسشىعا بەرەتىن. بىراق بۇل جولى ولاي بولمادى. ونىڭ ەكى سەبەبى بار دەپ ەسەپتەيمىن. ءبىرىنشىسى – لوماچەنكو ۋكراينالىق بوكسشى بولعاندىقتان, ول اقش نارىعىنا اسا قىزىق ەمەس. ونىڭ جەكپە-جەكتەرىنىڭ ترانسلياتسيا ساتىلىمى دا از بولادى, بيزنەسمەن دە جارناماعا كوپ اقشا تولەي قويمايدى. ال اقش, مەك­سيكا, كانادا ەلدەرىنىڭ بوكسشىسى كەز كەلگەن جاعىنان ارقاشان اقش نارىعىندا سۇرا­نىس­قا يە. ەكىنشىسى – ەكى بوكسشىنىڭ دا پرو­موۋتەرى ءبىر كىسى. ياعني, بوب ارۋم. تالاي جىلدان بەرى وسى سالادا جۇمىس ىستەپ كە­لە جاتقان سوڭ ءارى ول وسى بيزنەستىڭ وكىلى بول­عاندىقتان, قالاي اقشا تابۋ كەرەك ەكەنىن جاقسى بىلەدى. ەگەر لوماچەنكو ءابسوليۋتتى الەم چەمپيونى اتانىپ كەتسە, ول كارەراسىن اياقتاۋى دا مۇمكىن ەدى. سوندىقتان چەمپيوندىق اتاقتى جاس ءارى بولاشاعىنان زور ءۇمىت كۇتتىرەتىن لوپەسكە بەردى. ەندى تاراپتار رەۆانش وتكىزەدى دە, تاعى دا اقشانىڭ استىندا قالادى», دەيدى بوكسشى.

وسىلايشا 23 جاسىندا جەڭىل سالماقتا الەمنىڭ ءابسوليۋتتى چەمپيونى اتانعان تەوفيمو لوپەس مۇنداي اتاققا قول جەت­كىزگەن الەمدەگى ەڭ جاس بوكسشىنىڭ ءبىرى اتاندى.