قازىر مونۋمەنتالدىق قىلقالام تۋىندىلارىن مۋرال دەپ اتايتىن بولعان. كەشە پەتروپاۆل قالاسىنداعى اباي مەن اۋەزوۆ كوشەلەرىنىڭ قيىلىسىنىداعى بەس قاباتتى ۇيدە ابايدىڭ 175 جىلدىعىنا ارنالعان ۇلى اقىننىڭ قابىرعانى تۇگەل العان سونداي مۋرالى اشىلدى.
مۇنداي مۋرال ازىرگە قازاقستاندا بىرەۋ عانا. ونىڭ ەرەكشەلىگى سوندا – ول كەراميكالىق پليتالاردان قۇراستىرىلعان. مۇنداي پليتالار 830 گرادۋستىق ىستىقتا قاقتالعان, تەمىردەن دە ءتوزىمدى. ولاردان ءونىم جاساۋدىڭ ءوزى ۇلكەن تەحنولوگيالىق پروتسەسستەردەن تۇرادى. قىزىلجاردا ونى الماتىلىق سۋرەتشى – شەبەر بولات اسەربەكوۆ جاساپ شىقتى. ۇلى اقىننىڭ پورترەتى دە اينىماي تۇسىرىلگەن. ونىڭ جان-جاعى اسەم ويۋ-ورنەكتەرمەن بەزەندىرىلگەن. «ەندى بۇل پانو-مۋرال ۇزاق جىلدار بويى قالانىڭ كوركى بولىپ تۇراتىن بولادى. ءبىز قالا تۇرعىندارىنا ۇلى ابايدى تانىستىرۋمەن قاتار ونىڭ بەينەسىنەن ەستەتيكالىق ءلاززات السىن دەگەن ماقساتپەن كەراميكادان وسى كورىكتى سۋرەتتى سالدىردىق», دەدى وبلىس اكىمى قۇمار اقساقالوۆ ونىڭ اشىلۋ سالتاناتىندا.
جامان ىندەتكە بايلانىستى شەكتەۋلى ادامدار عانا قاتىسقان سالتاناتتا سويلەگەن عالىم زارقىن تايشىباي دا, وبلىستىق ارداگەرلەر القاسىنىڭ توراعاسى ەسكەندىر ەلەۋسىزوۆ, ولكەتانۋشى جاقسىباي سامرات تا مۋرالدىڭ كەلبەتىنە ريزاشىلىقتارىن ءبىلدىردى. سونىمەن بىرگە وسى كەراميكادان QR-كودتار ارقىلى ابايدىڭ شىعارمالارىن وقۋعا بولادى. مۋرالدىڭ وسىنداي ەرەكشەلىكتەرىن بىلگەن تۇرعىندار ونى قىزىعا تاماشالاۋدا.
ايتا كەتەتىن جايت, قالا اكىمى بولات جۇمابەكوۆ قىزمەت ىستەگەن جەرلەرىنىڭ بارىندە وسىنداي تاماشا ىستەر قالدىرىپ كەلەدى. بۇعان دەيىن ول ع.
مۇسىرەپوۆ اۋدانىنىڭ اكىمى بولعاندا ماعجان جۇماباەۆقا تاماشا ەسكەرتكىش ورناتقان ەدى. «ارتىڭدا مال قالماسىن, تال قالسىن» دەگەندى ول جۇرەگىنە بەك تۇتقان سياقتى.
قىزىلجار