قۇرلىقتىق حوككەي ليگاسىندا ونەر كورسەتەتىن ەلوردانىڭ «بارىس» كلۋبىنىڭ كەيىنگى بەس ويىنىندا 3:2 ەسەبى تىركەلىپ ءجۇر. قازاقستاندىق كوماندانىڭ كەزدەسۋلەرىن قالت جىبەرمەي, ۇنەمى باقىلاپ وتىراتىن جانكۇيەرلەر بۇل ستاتيستيكانى جاقسى ءبىلۋى كەرەك. 4 قازاندا باستالعان ءداستۇرلى ەسەپتىڭ ءالى كۇنگە دەيىن مۇرتى بۇزىلماي كەلە جاتىر. 3:2 ەسەبىمەن اياقتالعان بەس ويىننىڭ ۇشەۋىندە «بارىس» كلۋبى جەڭىسكە جەتسە, ەكەۋىندە قارسىلاستارىنا ەسە جىبەردى.
قحل-ءدىڭ كەزەكتى تۋرىندا ماسكەۋگە ساپار شەككەن جەرلەستەرىمىز «سپارتاك» كلۋبىنان وۆەرتايمدا ادەتتەگىدەي 3:2 ەسەبىمەن باسىم ءتۇستى. باسەكەنىڭ العاشقى 20 مينۋتى «سپارتاكتىڭ» باسىمدىعىمەن ءوتتى. كەزدەسۋدىڭ ءتورتىنشى مينۋتىندا ايدىن يەلەرىنىڭ ويىنشىسى سەرگەي شيروكوۆ مەرگەندىگىمەن كوزگە ءتۇسىپ, كومانداسىن ەسەپتە العا شىعاردى. ۇزىلىستەن كەيىن تىڭ كۇشپەن مۇزايدىنعا شىققان جەرلەستەرىمىز اينالدىرعان ءۇش مينۋتتا قارسىلاس كوماندانىڭ قاقپاسىنا قاتارىنان ەكى شايبا ەنگىزدى. بۇل گولداردىڭ اۆتورلارى – نيكيتا ميحايليس (20 مينۋت) پەن داررەن ديتس (23 مينۋت). ال ءۇشىنشى كەزەڭدە كوماندالار ءبىر-ءبىرىنىڭ قاقپاسىنا گول سوعا المادى. نەگىزگى ۋاقىتتا جەڭىمپاز كوماندا انىقتالماعان سوڭ ويىن وۆەرتايمعا ۇلاستى.
قوسىمشا ۋاقىت باستالعان ساتتە قارسىلاستىڭ قاتەلىگىن ۇتىمدى پايدالانىپ, شايباعا يەلىك ەتكەن كوماندا كاپيتانى داررەن ديتس نىسانانى ءدال كوزدەپ, «بارىسقا» جەڭىس سىيلادى. بۇل ءديتستىڭ ويىنداعى ەكىنشى گولى بولاتىن. ەسەپ – 2:3.
11 ويىننان كەيىن 13 ۇپاي جيناعان «بارىس» كلۋبى قحل-ءدىڭ «شىعىس» كونفەرەنتسياسىنداعى تۋرنير كەستەسىندە توعىزىنشى ورىنعا جايعاستى. «سپارتاك» تا 13 ۇپايمەن «باتىس» كونفەرەنتسياسىندا توعىزىنشى ورىنعا تۇراقتادى. «بارىس» كەلەسى كەزدەسۋىن بۇگىن قازان قالاسىندا جەرگىلىكتى «اق بارس» كومانداسىمەن وتكىزەدى.