جۇمىر جەردەگى ءۇش قانا بوكسشىعا ءۇش دۇركىن وليمپيادا چەمپيونى اتانۋ باقىتى بۇيىرعان ەكەن. العاش رەت اسا مارتەبەلى اتاققا ۆەنگريالىق لاسلو پاپپ قول جەتكىزسە, ودان كەيىن كۋبانىڭ قوس قابىلانى – تەوفيلو ستيۆەنسون مەن فەليكس ساۆون سول بەلەستى باعىندىردى. بۇگىنگى اڭگىمەمىز ۇلىلار كوشىن باستاپ تۇرعان ماجارستاننىڭ مارقاسقاسى جايىندا.
وتكەن عاسىردىڭ قىرقىنشى جانە ەلۋىنشى جىلدارى تەڭدەسسىز ونەرىمەن تورتكۇل دۇنيەنى تامساندىرىپ, تالايلارعا تاڭداي قاقتىرعان ايتۋلى بىلعارى قولعاپ شەبەرى جايىندا ءبىز بەكەر اڭگىمەلەپ وتىرعان جوقپىز. الەمدىك بوكس تاريحىندا وشپەس ءىز قالدىرعان داڭقتى لاسلو پاپپ وسىدان ءدال 17 جىل بۇرىن, ءدال وسى كۇنى, ياعني 2003 جىلدىڭ 16 قازانىندا 78 جاسقا قاراعان شاعىندا باقيلىق بولعان ەدى.
ميلليونداعان ادامنىڭ ءومىرىن جالماعان ءىى دۇنيەجۇزىلىك سوعىس ەندى عانا اياقتالىپ, كۇللى الەم جۇرتشىلىعى ءالى دە ەڭسەسىن كوتەرىپ, ەسىن جيا الماي جاتقان تۇستا لاسلو پاپپتىڭ ەسىمى شارتاراپقا تارادى. 1948 جىلى لوندون وليمپياداسىندا 72,6 كيلو سالماق دارەجەسىندە باق سىناعان 22 جاستاعى بۋداپەشتتىڭ تۋماسى العاش رەت التىن مەدالدى يەلەندى. تۇماندى البيون ەلىندە بەس كەزدەسۋ وتكىزگەن ول سونىڭ ۇشەۋىندە قارسىلاستارىن نوكاۋتقا جىبەردى.
1952 جىلى حەلسينكيدە 71 كيلو سالماقتا جۇدىرىقتاسقان پاپپ بەس باسەكەنىڭ ەكەۋىن ايقىن باسىمدىقپەن اياقتادى. ءوزىنىڭ ءۇشىنشى وليمپياداسىنا ول 1956 جىلى اتتاندى. مەلبۋرندە الاۋى تۇتانعان عالامدىق دودادا دا ماجارستاننىڭ مارقاسقاسىنا تەڭ كەلەر ەشكىم تابىلمادى. جارتىلاي فينالدا ەۋروپا چەمپيونى, پولشالىق زبيگنەۆ پەتشيكوۆسكيدىڭ سىلىكپەسىن شىعارعان لاسلو اقتىق ايقاستا ۋاقىت وزا كاسىپقوي بوكستىڭ جارقىن جۇلدىزىنا اينالعان پۋەرتو-ريكونىڭ وكىلى حوسە توررەستى ءۇشىنشى راۋندتا ۇرىپ جىقتى.
وسىلايشا, لاسلو پاپپتىڭ ەسىمى ءۇش دۇركىن وليمپيادا چەمپيونى اتانعان تۇڭعىش بوكسشى رەتىندە تاريحتا قالدى. ءبىر عاجابى, اتالعان جارىس بارىسىندا 13 رەت جەكپە-جەككە شىققان كەيىپكەرىمىز سونىڭ تەڭ جارتىسىنا جۋىعىن نوكاۋتپەن اياقتاعان ەكەن. ول از دەسەڭىز, تاعى مىناداي قىزىقتى دەرەكتى العا تارتايىق: وليمپيا ويىندارى كەزىندە ماجارستاننىڭ وكىلى تەك ءبىر راۋندتا عانا ەسە جىبەرگەن ەكەن. مەلبۋرندەگى فينالدىق دودانىڭ باستاپقى راۋندىندا پاپپ توررەسكە ۇپاي سانىمەن ۇتىلدى. دەسەك تە ودان كەيىن قاھارىنا مىنگەن ول پەرتو-ريكو وكىلىن ەسىنەن تاندىرعانىن ءبىز جوعارىدا ايتتىق.
لاسلونىڭ ودان بولەك ەكى دۇركىن ەۋروپا چەمپيونى دەگەن اتاعى بار. 1949 جىلى وسلودا جانە 1951 جىلى ميلاندا ول قارسىلاس شاق كەلتىرمەي, قارت قۇرلىقتىڭ ەكى بىردەي باس جۇلدەسىن قانعىجاسىنا بايلادى. اۋەسقوي رينگتە بارلىعى 319 جەكپە-جەك وتكىزگەن پاپپ 301 رەت جەڭىسكە جەتىپ, 55 قارسىلاسىن سۇلاتىپ سالدى. 12 مارتە ۇتىلىپ, 6 رەت تەڭ ءتۇستى.
مەلبۋرن وليمپياداسىندا توپ جارعاننان كەيىن 30 جاستاعى لاسلو پاپپ كاسىپقوي رينگتە كۇش سىناسۋدى قۇپ كوردى. ءسويتىپ, ونىڭ ەسىمى سوتسياليستىك باعىتتاعى مەملەكەتتەر اراسىندا وسىنداي باتىل قادامعا بارعان تۇڭعىش بوكسشى رەتىندە دە تاريحتا قالدى. بۇل رەتتە دە ماجارستاندىق سپورتشىنىڭ قول جەتكىزگەن تابىسى قوماقتى. 1962 جىلدىڭ 16 مامىرىندا دانيالىق كريس كريستەنسەندى ۇرىپ جىعىپ, ەۋروپا چەمپيونى اتاندى. ءوزىنىڭ سول التىن بەلبەۋىن ول قاتارىنان التى رەت ءساتتى قورعادى. بارلىعى 29 رەت رينگكە كوتەرىلگەن لاسلو 27 مارتە جەڭىس تويىن تويلادى. 15 قارسىلاسىن نوكاۋتقا جىبەردى. تاعى ەكى كەزدەسۋدە تەڭ ەسەپ تىركەلدى. ياعني ول ءوزىنىڭ كارەراسىندا بىردە-ءبىر رەت جەڭىلگەن جوق. بىراق الەم چەمپيونى اتانۋ باقىتى وعان بۇيىرمادى. ويتكەنى, 1965 جىلى ماجارستان بيلىگى پاپپقا كاسىپقوي بوكسپەن ودان ءارى اينالىسۋعا قاتاڭ تىيىم سالدى. 39 جاسىندا كەيىپكەرىمىز بىلعارى قولعابىن شەگەگە ءىلدى.
سپورتتىق كارەراسى اياقتالعاننان كەيىن لاسلو بۇل سالادان الىستاعان جوق. 1971-1992 جىلدار ارالىعىندا اتالعان مەملەكەتتىڭ ۇلتتىق قۇراما كومانداسىنىڭ باس باپكەرى بولدى. ءدال سول كەزدەرى ماجارستان بوكسى ورلەۋ كەزەڭىن باسىنان كەشىردى. شاعىن عانا ەلدەن وليمپيا ويىندارىنىڭ جەڭىمپازدارى, الەم جانە قۇرلىق چەمپيوندارى كوپتەپ شىقتى. سول ارالىقتا ول «اۋىر قولعاپتار» مەن «ارىستان سەكىرۋگە دايىن» دەپ اتالاتىن ەكى بىردەي كوركەم فيلمگە ءتۇسىپ, ءوزىن تاعى ءبىر قىرىنان تانىتتى. ال 2001 جىلى پاپپتىڭ ەسىمى حالىقارالىق بوكس داڭقى زالىنا ەندى.