اۋەسقوي بوكستا ءبىراز بەلەستى باعىندىرىپ, بوكس ماماندارىن ءوزىنىڭ مىقتىلىعىمەن مويىنداتقان وتانداسىمىز تۇرسىنباي قۇلاحمەتتىڭ كاسىپقوي بوكسقا اۋىسقانى بارشاعا بەلگىلى.
بوكسشىمىزدىڭ ءىسىن جۇرگىزەتىن MTK Kazakhstan مەنەدجەرلىك كومپانياسىنىڭ حابارلاۋىنشا, قۇلاحمەت كاسىپقوي بوكستاعى ەكىنشى كەزدەسۋىن 11 قاراشادا وتكىزەدى. ۇلىبريتانيادا ۇيىمداستىرىلاتىن بوكس كەشىندە شارشى الاڭعا شىعاتىن جەرلەسىمىزدىڭ بۇل جولعى جەكپە-جەگىنىڭ جۇگى اۋىر بولماق. ويتكەنى ورتا سالماقتا ونەر كورسەتەتىن ورەنىمىز كاسىپقوي بوكستا 14 كەزدەسۋ وتكىزىپ, بىردە-بىرىندە جەڭىلمەگەن جەرگىلىكتى بوكسشى ماكلەي̆ ماكگوۋەنمەن (14-0-1, 3 كو) WBC International ۆاكانتتى تيتۋلى ءۇشىن جۇدىرىقتاسادى.
ايتا كەتەيىك, تۇرسىنباي قۇلاحمەت كاسىپقوي بوكستاعى دەبيۋتتىك جەكپە-جەگىن 23 تامىزدا الماتىدا وتكىزىپ, ساعادات راحمانقۇلوۆتى (6-2, 4 كو) تەحنيكالىق نوكاۋتپەن جەڭگەن بولاتىن.