كۇنى كەشە عانا پاريجدە وتكەن رولان گارروس ءتۋرنيرى اياقتالعان بەتتە تەننيسشىلەردىڭ الەمدىك رەيتينگى قايتا جاڭاردى, دەپ حابارلايدى Egemen.kz.
ايەلدەر اراسىندا اۋستراليالىق ەشلي بارتي (8717 ۇپاي) ءالى دە جەكە-دارا كوش باستاپ تۇر. ەكىنشى جانە ءۇشىنشى ورىنداردى رۋمىنيالىق سيمونا حالەپ (7255) پەن جاپونيالىق ناومي وساكا (5780) يەلەنۋدە.
سونداي-اق, امەريكالىق سوفيا كەنين (5760), ۋكراينالىق ەلينا سۆيتولينا (5260), چەحيالىق كارولينا پليشكوۆا (5205), كانادالىق بيانكا ۆانەسسا اندرەەسكۋ (4555), چەحيانىڭ تاعى ءبىر وكىلى پەترا كۆيتوۆا (4516), نيدەرلاندتىق كيكي بەرتەنس (4505) جانە اقش ايگىلى ويىنشىسى سەرەنا ۋيليامس (4080) ۇزدىك وندىقتىڭ قاتارىنا ەنىپ وتىر.
ال, بيىلعى تۋرنيردە ايدى اسپانعا شىعارىپ, رولان گارروستىڭ جەڭىمپازى اتانعان 19 جاستاعى پولشانىڭ جاس جۇلدىزى يگا سۆيونتەك (2960) قازىرگى كەزدە 17 ورىنعا تابان تىرەدى. وعان دەيىن ول 54 ساتىعا تۇراقتاعان ەدى.
WTA رەيتينگىندە قازاقستاندىق تەننيسشىلەر اراسىندا ەڭ ۇزدىك كورسەتكىش ەلەنا رىباكيناعا (2696) تيەسىلى. ول 19 ورىندى يەلەنۋدە. يۋليا پۋتينتسەۆا (2015) 27 ساتىعا جايعاسسا, زارينا دياس (928) 79 ورىندى ەنشىلەۋدە.