قۇرلىقتىق حوككەي ليگاسىنىڭ (قحل) كەزەكتى تۋر ويىنىن ەلوردادا وتكىزگەن نۇر-سۇلتاننىڭ «بارىسى» چەرەپوۆەتستىڭ «سەۆەرستال» كلۋبىنان جەڭىلىپ قالدى.
ەكاتەرينبۋرگتە ساتسىزدىكتەن سوڭ قازاقستاندىق كوماندانىڭ باپكەرلەرى قۇراماعا ءبىراز وزگەرىس ەنگىزگەن ەدى. الايدا ودان ەش ناتيجە شىقپادى. باسەكە باستالعان بەتتە ويىن تىزگىنىن قولعا العان «سەۆەرستال» حوككەيشىلەرى كەزدەسۋدىڭ 27 سەكۋندىندا شايبا سوعىپ كەتتى. گول اۆتورى – يگور گەراسكين. ارادا ەكى جارىم مينۋت وتكەندە قوناق كوماندا ساپىنان ادام ليشكا مەرگەندىگىمەن كوزگە ءتۇستى. ەكى گولدان كەيىن «سەۆەرستال» ويىنشىلارىنىڭ قارقىنى باسەڭدەگەندەي بولىپ ەدى. بىراق 11-مينۋتقا كەلگەندە تابلوداعى كورسەتكىش 3:0-گە جەتتى. ليشكا دۋبل اۆتورى اتاندى.
«بارىس» حوككەيشىلەردى ەكىنشى كەزەڭنىڭ ورتا تۇسىنا كەلگەندە عانا شايبا سوعۋعا مۇمكىندىك الدى. العاش 30-مينۋتتا ەگور پەتۋحوۆ ەسەپ ايىرماسىن قىسقارتسا, 31-مينۋتتا كەرتيس ۆولك قارسىلاستىڭ قاقپاسىن ءدال كوزدەپ, ەسەپتى 3:2-گە جەتكىزگەن-ءدى. وكىنىشكە قاراي, قالعان ۋاقىتتا جەرلەستەرىمىز جەڭىستى ج ۇلىپ الۋ بىلاي تۇرسىن, تەڭ ناتيجەگە قول جەتكىزە المادى. «بارىس» كەلەسى كەزدەسۋىن بۇگىن ۋفادا جەرگىلىكتى «سالاۆات يۋلاەۆ» كلۋبىمەن وتكىزەدى.